1 कोरिन्थि 13 - धिमालझाराङ खान्तेङ रेम्का माया 1 का द्याङगेलाइ रो सादेलचरगेलाइको राउता धुइलाउ बुङ बोमिहेङ माया मापाखा पानु, का धुइका काथाचाहिँ हाला पाका घालतिन रो झाइँ झाइँ पाका झ्याम्ता खिनिङ ज्याङका। 2 कादोफा आगाधुइ धुइका बर हि, परमेस्वरको म्होअ्न्हाका काथागेलाइ गेका आकिल बुङ हि रो आरदाङहेङ लाअ्पालि दोका खान्धुरको सरबङ बुङ हि, कालाउ का बोमिहेङ माया मापाखा पानु का हाइ दोङ बुङ माको। 3 कालाउ का गोताङ ताकाकाउरि निरधनगेलाइहेङ बाखाराइ पिखा रो काङको जिउ बुङ बोमिहेङ दु:लि पिखा, कालाउ का बोमिहेङ माया मापाखा पानु कासेहेङ हाइ दोङ लाभ माज्यावा। 4 माया पाका द्याङ हेन्जाङ काथागेलाइ सहेलि दोखे रो दायाका बुङ हिखे। वा चेर माताङपाखे, तुजुक मापाखे रो बारालि बुङ माभोखे। 5 माया पाका द्याङ बोमिहेङ मारेम्का मापाखे, ताइकोङ खिनिङ भालाइ माभोखे, मारफाङ चेरमाताम्पाखे रो आखेका काथा बुङ मनता माताअ्खे। 6 माया पाका द्याङ आखेकाता मालेङचाखे, कालाउ उचित काथाता लेङचाखे। 7 माया पाका द्याङ गोताङ काथा सहिखे, गोताङ काथाता खान्धुर पाखे, गोताङ काथाता आस ताअ्खे रो गोताङ काथाता थिर हिखे। 8 आगाधुइ धुइका बर मुअ्तेङ हानावा, राउगेलाइ गिअ्न्हावा, आकिल बुङ दोकावा, कालाउ माया हेअ्लाउ माद्वावा। 9 केलाइ हेन्जा काथा बुझिलि मादोन्हाखे रो आगाधुइ बुङ आतुइसा खिनिङ धुइन्हाखे। 10 कालाउ जेलाउ ख्रिस्ट ल्वावा, कोलाउ भुझिलि मादोका गोताङ काथा ताइमिङ राम्तेङ हानावा। 11 जेलाउ का जामाल हिघाखा कोलाउ जामाल भाइपाङ धुइघाखा, जामाल भाइपाङ बुझिघाखा रो जामाल भाइपाङ फोम पाघाखा। जेलाउ का धाना जेङघा कोलाउ जामाल भाइपा जेङलि लाअ्घा। 12 एला केलाइ ना:का आइनाता तिङका भाइपाङ तिङन्हाखे। कालाउ इङको पहरचाहिँ गोताङ थोक फाइसालामपा तिनाङ। एला का आतुइसा खिनिङ गेखा, कालाउ इङकोपहरचाहिँ परमेस्वर काङको बारेता गोताङ काथा गिकाभाइपाङ का बुङ गोताङ थोक ग्याङका। 13 एला खान्धुर, आस रो माया जेलाउ बुङ ह्यावा। कालाउ इदोइ सुमलोङता झाराङखान्तेङ बाराका माया दोङ एइ। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.