1 कोरिन्थि 12 - धिमालपुनित हाङसाको बरगेलाइ 1 दादाओने बाइओनेगेलाइ, एला का पुनित हाङसाको बरको बारेता नेलाइहेङ जातिङको काथा दोअ्लि भोखा। 2 नेलाइ दोङ गेसुखेना, प्रभुहेङ खान्धुर मापाकाखान्तेङ लाम्फा नेलाइ हिदिङ ना हिदिङ खाल्सो मामाधुइका दिरहेङ पुजितेङ बान्दालाइका हिघासुन्हा। 3 इदोइखातिर नेलाइ इदोइ काथा बुझिसु दोअ्का का भोखा, हाइपानु परमेस्वरको हाङसासो धुइका हिदिङ द्याङ इसुको खिलापता माधुइखे। कालाउ पुनित हाङसासो खिनिङ इसु दोङ प्रभु हि दोअ्तेङ दोअ्लि द्वावा। 4 पुनित हाङसाको बरगेलाइ हेन्जाङ खालको हि, कालाउ पुनित हाङसा एलोङदोङ हि। 5 एसापा प्रभुहेङ केलाइ हेन्जाङ खालहोइ चाकर पालि द्वाङ, कालाउ केलाइको चाकर पाका प्रभुचाहिँ ए खिनिङ हि। 6 केलाइ भेभेनेङ खाल्को कामगेलाइ पालि द्वाङ, कालाउ एलोङ खिनिङ परमेस्वर केलाइ झाराङहेङ इदोइ कामगेलाइ पालि सरबङ पिखे। 7 झाराङको भालाइको भाअ्सिङ दोङ पुनित हाङसाको काम देखाल ज्याको दोअ्तेङ झाराङहेङ परमेस्वर बरगेलाइ पिका हि। 8 कालाउ पुनित हाङसा आधेमिहेङ आकिलको काथा धुइका रो आधेमिहेङ बुझिलि दोका सरबङ पिखे। 9 इङकोङ पुनित हाङसा आधेमिहेङ खान्धुरता बोल्याका जेङका रो आधेमिहेङ रोगाइका एल्पाका बर पिखे। 10 एन्साङ पातेङ आधेमिहेङ भारभुसाइका काम पाका, आधेमिहेङ आगाधुइ धुइका, आधेमिहेङ सत रो असत हाङसा खेङलि दोका, आधेमिहेङ भेभेनेङ खाल्को राउ धुइका रो आधेमिहेङ इङको राउको माने हेपिलि दोका सरबङ पिखे। 11 कालाउ इदोइ गोताङ एलोङदोङ पुनित हाङसाको कामगेलाइ एइ। कालाउ वा झाराङहेङ ताइकोङ लाल्सा आन्सार इदोइ बरगेलाइ पिखे। एलोङदोङ जिउ, हेन्जाङ आङगेलाइ 12 द्याङको एलोङदोङ जिउता हेन्जाङ आङगेलाइ हिखे रो इङकोङ भेभेनेङ आङगेलाइ मिलितेङ एलोङदोङ जिउ जेङखे। एन्साङ पातेङ ख्रिस्ट बुङ इन्सिकाङ हि। 13 केलाइ यहुदि हिलाउ बुङ, बो जात्या हिलाउ बुङ, बान्धाइ हिलाउ बुङ, फुक्का हिलाउ बुङ, केलाइ झाराङ एलोङदोङ पुनित हाङसासो चिभुअ्लि निङका हिन्हाहि। कालाउ केलाइ झाराङ एलोङदोङ पुनित हाङसा निङका हिन्हाहि। 14 हाइदोनु द्याङको जिउ एलोङ खिनिङ आङसो बनेका माको। कालाउ हेन्जाङ आङगेलाइ मिलितेङ बनेका एइ। 15 यदि खोकोइ “का खुर माको, एन्साङ पातेङ का जिउको आङ बुङ माको” दोअ्हि पानु हाइ इङको जिउको आङ माज्यावा कुनु? 16 एदि न्हातोङ “का मि माको, एन्साङ पातेङ का जिउको आङ बुङ माको” दोअ्हि पानु हाइ इङको जिउको आङ माज्यावा कुनु? 17 एदि गोताङ जिउता मि खिनिङ हिनु हितासो हिङलि? एदि गोताङ जिउता न्हातोङ खिनिङ हिनु हितासो न्हुम्लि? 18 कालाउ जिउता हिका गोताङ आङगेलाइ परमेस्वर ताइको लाल्सा आन्सार मिलिपातेङ ताअ्पिका हि। 19 एदि एलोङदोङ आङ गोताङ जिउता हि पानु जिउ दोङ माहिधावा। 20 कालाउ आङगेलाइ हेन्जाङ हि, कोलाउबुङ जिउचाहिँ एलोङदोङ हि। 21 जेसापा मि खुरहेङ “कासेहेङ नाङको हारजा मान्थु” दोअ्लि माद्वावा। एन्सा पातेङ पुरिङ खोकोइहेङ बुङ “कासेहेङ नाङको हारजा मान्थु” दोअ्लि माद्वावा। 22 भुरुङ जिउको गोताङ खान्तेङ निरधो तिङका आङगेलाइ दोङ माकोसा माजेङखे। 23 जेदोङ आङहेङ केलाइ म्हुइका फोमपान्हाखे, इङकोहेङ हेन्जाङ मान पान्हाखे। कालाउ तिङपालि माएल्का आङगेलाइहेङ चाहिँ केलाइ थुमतेङ ताअ्न्हाखे। 24 कालाउ बोमिहेङ तिङपालि एल्का आङगेलाइ केलाइ माथुमन्हाखे। कालाउ केलाइ म्हुइका फोमपाका आङगेलाइ हेन्जा मान पिलि परमेस्वर इङको आङगेलाइहेङ मिलिपातेङ दोसाङ ताअ्का हि। 25 कोलाउ जिउता बेमेल माज्याको, कालाउ आङगेलाइ एमि भेनेङदोफा मिलितेङ ह्याको। 26 हाइपानु एलोङ आङहेङ तु:हि पानु गोताङ जिउहेङ तु:खे। एन्साङ पातेङ एलोङ आङ मान निङलाउ गोताङ जिउ दोङ मान निङखे। 27 एलासो नेलाइ झाराङ ख्रिस्टको जिउ एइ रो नेलाइ एमिएमि वाको जिउको आङगेलाइ एइ। 28 परमेस्वर दोङ मन्डलिगेलाइता: साल्तेङ दिङगिल्कालाइ, आगाधुइकालाइ, धिरपाका मास्टरगेलाइ, भारभुसाइका काम पाकालाइ, मासाअ्धेका एल्पाकालाइ, बोमिहेङ साघाइकालाइ, मन्डलि चालाइका आगुवागेलाइ रो भेभेनेङ राउ धुइका बर निङकालाइ ताअ्पिका हि। 29 कालाउ झाराङ दोङ साल्तेङ दिङगिल्कालाइ, आगाधुइकालाइ, धिरपाका मास्टरगेलाइ माज्यावा रो झाराङ भारभुसाइका कामगेलाइ बुङ पालि माद्वावा। 30 कालाउ झाराङदोफा एल्पाका बर मान्थुखे, झाराङ भेभेनेङ राउ धुइलि मादोखे रो झाराङ भेभेनेङ राउको माने बुङ हेलि मादोखे। 31 कालाउ पुनित हाङसाको पिका गोताङ एल्का बरगेलाइ निङलि लाल्सा पासु। कालाउ का नेलाइहेङ बरहेङ चालाइका उपाइको बारेता एल्का दामा तिङप्याङका। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.