1 कोरिन्थि 11 - धिमालबेबालाइ पुरिङ थुम्का काथा 1 का ख्रिस्टको पाकाभाइपाङ पाखा, नेलाइ बुङ काङको पाकाभाइपाङ पासु। 2 का नेलाइहेङ हेन्जाङ बाखिन्खा, हाइदोनु गोताङ काथाता नेलाइ कासेहेङ फोमपासुखेना रो काङको धिरपाका बिद्या साअ्सुखेना। 3 एला नेलाइ इदोइ काथा बुङ गेसु दोअ्का का भोखा, ख्रिस्ट झाराङ द्याङको मुलेङ हि। बेअ्को मुलेङ केअ् रो ख्रिस्टको मुलेङ चाहिँ परमेस्वर हि। 4 पुरिङ थुमतेङ पुकार पाका माकोनु आगाधुइ धुइलाका द्याङ ताइको मुलेङ ख्रिस्टकोङ बिजेत पाखे। 5 कालाउ ताइको पुरिङ माथुम्सिङ पुकार पाका माकोनु आगाधुइ धुइका बेबाल ताइ मुलेङ केअ्को बिजेत पाखे। इन्सिका बेबाल ते पुसुङ सिअ्पाका बेबालभाइकाङ जेङखे। 6 एदि हिदिङ बेबाल ताइको पुरिङ माथुम्खे पानु भुरुङ इङको पुसिङ सिअ्ताको। कालाउ पुसिङ सिअ्लिचाहिँ लेदरको काथा हिनासिङ इङको ताइको पुरिङ थुमाको। 7 वाबाल ताइको पुरिङ थुम्लि मागोयाङ, हाइदोनु परमेस्वर वाबालहेङ ताइकोङ आकारता रो वाको प्रताप पालिको भाअ्सिङ बान्हाइका एइ। कालाउ परमेस्वर बेबालहेङचाहिँ ताइको केअ्हेङ मान पालिको भाअ्सिङ बान्हाइका एइ। 8 हाइपानु वाबाल बेबालसो बान्हाइन्हाका माको, कालाउ बेबालचाहिँ वाबालसो बान्हाइन्हाका एइ। 9 कालाउ वाबाल बेबालको भाअ्सिङ सिरजाइका माको, कालाउ बेबाल वाबालको भाअ्सिङ सिरजाइका एइ। 10 इदोङखातिर सादेलचरको आगाता बेबाल ताइको केअ्को आधिनता हिघा दोअ्तेङ तिङपालिको भाअ्सिङ इङको ताइको पुरिङ थुमाको। 11 कौलाउबुङ प्रभुको आगाता बेबालको भाअ्सिङ वाबाल गोइखे रो वाबालको भाअ्सिङ बेबाल गोइखे। 12 हाइदोनु बेबाल वाबालसो बान्हाइन्हाका रो वाबाल बुङ बेबालसोङ जोन्मिखे। कालाउ गोताङ थोकको मुलचाहिँ परमेस्वर दोङ हि। 13 नेलाइ ताइमिङ बिचार पासु, बेबालहेङ पुरिङ माथुम्सिङ परमेस्वरहेङ पुकार पालि सोबायावा कुनु? 14 एदि वाबाल बेबाल भाइपाङ धाङगापा पुसिङ पोसेहि पानु इङको वाको भाअ्सिङ लेदेरका काथा दोअ्तेङ झाराङहेङ था मान्थु कुनु? 15 कालाउ एदि बेबालको पुसुङ धाङगाका हि पानु इङको वाको भाअ्सिङ मानको काथा एइ। हाइपानु बेबालको पुसुङ इङकोहेङ थुम्लिको भाअ्सिङ पिन्हाका एइ। 16 कालाउ हासुङ इदोइ बारेता झागारा पालि भोखे पानु का दोअ्ताङका, इदोइ बेगार केलाइको हिदिङ चलन मान्थु रो परमेस्वरको मन्डलिता बुङ बो हिदिङ बिधि मान्थु। प्रभु भतेर ( मत्ति २६:२६-२९ ; मर्कुस १४:२२-२५ ; लुका २२:१४-२० ) 17 एला का इदोइ काथा दोअ्लाउ नेलाइहेङ माबाखिनाङका। हाइपानु नेलाइ एदोसा मन्डलिता जोम्लाउ इङको रेम्काको भाअ्सिङ माजेङखे, कालाउ इङको मारेम्काको भाअ्सिङ जेङखे। 18 हाइदोनु झाराङखान्तेङ लाङ काथा, नेलाइ मन्डलिता एदोसा जोम्लाउ नेलाइको माझाता मिलाप माजेङखे दोअ्का का हिङखा, इदोइ काथा जातिङको बुङ वाला दोअ्तेङ का खान्धुर पाखा। 19 नेलाइको माझाता र्हुकालाएक ठार्हाइन्हाकागेलाइहेङ नाल्लिको भाअ्सिङ नेलाइता बेमेल जेङलि दोङ गोयाङ। 20 जेलाउ नेलाइ एदोसा जोम्तेङ चाकाआम्का पासुखेना पानु इङकोचाहिँ प्रभु भतेर माको। 21 हाइपानु चालि योम्का झाराङ ताताइमिको चुमाका चाकाचिज हासुहेङ मार्हुम्सिङ चालि तेङखे। मान्थुकालाइ चाहिँ हाइदोङ माचासिङ एन्साङ म्हितुपाङ हिखे। कालाउ हिकालाचाहिँ मारेम्फाङ अङगुरको निघार आम्तेङ म्हाखे। 22 हाइ चालि रो आम्लि नेलाइको ताताइकोङ साअ् मान्थु कुनु? बे नेलाइ परमेस्वरको मन्डलिहेङ म्हुइका फोमपासुखेना? ना मान्थुकालाइहेङ लेदेर पालि भोसुखेना? इदोइ बारेता का नेलाइहेङ हाइ दोअ्लि? हाइ याको बारेता नेलाइ रेम्फा पासुन्हा दोअ्लि? आहाँ, नेलाइ रेम्का पासुन्हा दोअ्तेङ का दोअ्लिङ माद्वाङका। 23 हाइदोनु प्रभुसो का जेदोङ धिरघा, इङको दोङ नेलाइहेङ धिरपाका। प्रभु इसु रिमनिङचाका न्हिसिङ वा तोले र्हुहि। 24 कालाउ परमेस्वरहेङ च्याबास चार्हाइकान्हुअ्सो वा तोले पेङहि रो दोअ्हि, “इदोइ नेलाइको भाअ्सिङ पिका काङको जिउ एइ। इदोइ काङको फोमको भाअ्सिङ पासु।” 25 एन्साङ पातेङ तोले चाकान्हुअ्सो बाति चुम्तेङ एसा दोअ्हि, “इदोइ बाति काङको हितिता हिका नावा कबोल। जेलाउजेलाउ नेलाइ इदोइ आमस्वाना, काङको फोमको भाअ्सिङ एसाङ पासु।” 26 हाइदोनु जेलाउजेलाउ नेलाइ इदोइ तोले चास्वाना रो इदोइ बातिसो आमस्वाना, प्रभु मालोपाधाउ नेलाइ वाको सिकाको पारचार पास्वाना। 27 इदोइभाअ्सिङ जाजाइ मान मापासिङ प्रभुको तोले चावा रो बातिसो आमावा, इङको द्याङ प्रभुको जिउ रो हितिको खिलापता कुकरम पावा। 28 झाराङ ताइमिहेङ लाम्फा जाच्याको, कालाउ खिनिङ इङको तोले चाको रो बातिसो आमाको। 29 हाइपानु जाइ प्रभुको जिउहेङ मानाल्सिङ चाखे रो आम्खे पानु इङको ताइमिर्हुता दार चुमावा। 30 इदोइखातिर नेलाइता हेअ्मि निरधो रो मासाअ्धेका हिसुन्हा रो हेअ्मिचाहिँ नासालि बुङ दोका हि। 31 कालाउ लाम्फा दोङ केलाइ ताइमिहेङ रेम्फा जाचेन्हाहि पानु परमेस्वरको दारता मावालाङ। 32 प्रभु केलाइहेङ निया पालाउ दुनियाको द्याङगेलाइदोफा दुस मानिङचाको दोअ्तेङ वा केलाइहेङ सोपेरपालि दार बुङ प्यावा। 33 इदोइखातिर खान्धुरि दादाओने बाइओनेगेलाइ, प्रभु भतेर चालि ए दोसा जोम्लाउ एमि भेनेङहेङ र्हुम्सु। 34 एदि नेलाइता जाइ म्हितुखे पानु इङको ताइको सितासोङ चातेङ ल्वाको। माकोनु ते प्रभु भतेर चालि एदोसा जोम्लाउ नेलाइ परमेस्वरको दारता परेस्वाना। बो काथा का इन्ताङ लोका पहरता नेलाइहेङ दोअ्ताङका। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.