1 कोरिन्थि 10 - धिमालदिरहेङ मापुजिका काथा 1 दादाओने बाइओनेगेलाइ, मोसाहेङ पिताइलाउ केलाइको खालगेलाइहेङ हाइ जेङका हिघाहि, इङको काथा का नेलाइहेङ गेपालि भोखा। एम्बालाइ झाराङ मिस्रसो ओल्हेलाउ बादेल दामा तिङपातेङ चुम्पुहि रो झाराङ जाहादिको माझासो तेतेङ हानेहि। 2 कालाउ झाराङ बादेल रो जाहादिता मोसाहेङ पिताइलाउ एम्बालाइ चिभुअ्लि निङका भाइपाङ जेङहि। 3 कालाउ एम्बालाइ झाराङ परमेस्वरको पिका एलोङदोङ खाल्को हाङसाको चाकाचिज चाहि। 4 एम्बालाइ झाराङ परमेस्वरको पिका एलोङ दोङ खाल्को उन्थुइसो ओल्हेका हाङसाको चि आम्हि। इङको हाङसाको उन्थुइचाहिँ ख्रिस्ट ताइमिङ हिघाहि। 5 कौलाउबुङ एम्बालाइता हेन्जाङदोफा परमेस्वर मालेङचाहि रो एम्बालाइ उदादाङका थामेता मुअ्हि। 6 इङको द्याङगेलाइ भाइपाङ केलाइ बुङ आखेका लाल्सा मापाइने दोअ्तेङ इदोइ काथागेलाइ केलाइहेङ चेतानि पिलिको भाअ्सिङ जेङका हिघाखे। 7 एम्बालाइता हेअ्मि ते दिर पुजिका जेङहि। कालाउ नेलाइ एम्बालाइ भाइपाङ माजेङसु। धरमकिताबता इसिका लेखेन्हाका हि, “द्याङगेलाइ चालि रो आम्लि योम्हि, कालाउ ताइ मनलागि पालि तेङहि।” 8 केलाइ एम्बालाइ पाका भाइपाङ दुराचार मापाइने। हाइपानु एम्बालाइ दुराचार पानाङसिङ एनिताङ एकुरिसुम हाजार सिहि। 9 एम्बालाइ पाका भाइपाङ केलाइ बुङ ख्रिस्ट प्रभुहेङ जाच मापाइने। हाइपानु एम्बालाइ प्रभुहेङ जाच पानाङ दोङ एम्बालाइहेङ पुह्याँ चोतेङ सेअ्हि। 10 केलाइ एम्बालाइ भाइपाङ गानगान मापाइने। हाइपानु एम्बालाइ परमेस्वरदोफा गानगान पानाङ मुअ्पाका सादेलचर लोतेङ एम्बालाइहेङ सेअ्हि। 11 एम्बालाइता जेङका इदोइ गोताङ उपमाको आकारता केलाइहेङ हुस पापालि लेखेन्हाहि। केलाइ एला दुनियाको आखिरको पहरता लोका हिन्हाहि। 12 इदोइखातिर हासुङ खान्धुरता बोल्याका हिघा दोअ्तेङ दोअ्खे पानु इङको कुकरमता वालाकासो हुस पातेङ ह्याको, माकोनुते इङको लोनावा। 13 नेलाइको ज्यानता लोलितोम्का गोताङ जाँचगेलाइ द्याङगेलाइ सहेलि दोका खालकोङ हिखे। कालाउ परमेस्वर खान्धुरलाएक हिनाङसिङ कालाउ वा नेलाइहेङ सहेलिङ मादोपाङ जाचता वालालि माप्यावा। वा जाँचसो पारालि दोका दामा बुङ बान्हाइपिखे रो जाच जेङलाउ नेलाइ इङकोहेङ सहेलि दोस्वाना। 14 इङकोखातिर मोन्दाताका दादाओने बाइओनेगेलाइ, दिरहेङ पुजिलि लाअ्सु। 15 का नेलाइहेङ आकिलहिका द्याङ दोअ्तेङ दोअ्दोङखा। काङको दोअ्का काथा नेलाइ ताइमिङ बिचार पासु। 16 जेलाउ केलाइ प्रभु भतेरको बाति चुम्तेङ परमेस्वरहेङ च्याबास चार्हाइतेङ बातिसो आमन्हाखे, एन्सालाउ हाइ केलाइ ख्रिस्टको हितिता माजोमन्हाखे कुनु? एन्साङ पातेङ जेलाउ केलाइ तोले पेङतेङ चान्हाखे एन्सालाउ बुङ हाइ केलाइ ख्रिस्टको जिउता माजोमन्हाखे कुनु? 17 हाइदोनु केलाइको चाका तोले एलोङ हिनाङसिङ केलाइ हेन्जाङ हिलाउ बुङ ख्रिस्टता एलोङ जिउ एइ। 18 इस्राएलको द्याङगेलाइहेङ खाङसु, जाइ भोक चार्हाइका चाकाचिज चाखे, एम्बालाइ परमेस्वरको चाकर पालि दोसाङ माजोम्खे कुनु? 19 एन्सानु का हाइ दोअ्दोङखा? दिरहेङ चार्हाइका चाकाचिज हाइ एइ कुनु? एन्साङ पातेङ दिर बुङ हाइ एइ कुनु? 20 हाइदोनु दिर पुजिकालाइ जेदोङ भोक चार्हाइखे इङको परमेस्वरहेङ माको, कालाउ मासानहेङ चार्हाइखे। एन्साङ नेलाइ मासानदोफाङ हिमखिम पासु दोअ्तेङ का माभोखा। 21 नेलाइ प्रभुको बातिसो रो मासानको बातिसो आम्लि मादोस्वाना। एन्सा पातेङ नेलाइ प्रभुको टेबुलसो रो मासानको टेबुलसो चालि मादोस्वाना। 22 हाइ नेलाइ इङको इस्राएलको द्याङगेलाइभाइपाङ प्रभुहेङ चेरताम्पा पिसुखेना? हाइ नेलाइ वाको दार सहेलि द्वाङ दोअ्तेङ बिचार पासुखेना? 23 नेलाइता हेअ्मि दोअ्स्वाना, “केलाइ गोताङ काथा पालिएलाङ।” कालाउ गोताङ काथाहोइ भाला मापाखे। “केलाइ गोताङ काथा पालि निनाङ दोअ्न्हाखे।” कालाउ गोताङ काथाहोइ केलाइहेङ भाला मापाखे। 24 हासु बुङ ताइको भाला माको, कालाउ बो द्याङगेलाइको भाला भोकाको। 25 हातेता पिअ्लि ताअ्का बिहा हाइकोको दोअ्तेङ माहिअ्सिङ नेलाइ चोल्पुतेङ चालि दोस्वाना। 26 हाइदोनु धरमकिताबता इसिका लेखेन्हाका हि, “सुमिङ रो इङकोता हिका गोताङ थोकगेलाइ परमप्रभुकोङ।” 27 एदि प्रभुता खान्धुर मापाका हासुङ नेलाइहेङ चालि काइलाउ नेलाइ हानेलि किअ्नु हानेसु रो आकिलको भाअ्सिङ जेदोङ चालि पिलाउ बुङ माहिअ्सिङ चासु। 28 कालाउ हिदिङ द्याङ “इदोइ ते भोक पिका” दोअ्हि पानु इङको द्याङको भाअ्सिङ रो आकिलको भाअ्सिङ माचासु। 29 इदोइ नेलाइको आकिलको भाअ्सिङ माको, कालाउ इङको दोअ्का द्याङको आकिलको भाअ्सिङ। कोलाउ नेलाइ एसा दोअ्स्वाना वाला, बोमिको आकिलको भाअ्सिङ केलाइको पालि एल्का काम बुङ हाइपालि मापालि? 30 एदि का परमेस्वरहेङ च्याबास चार्हाइतेङ चाका चिजता हाइपालि बोमि कासेहेङ दुसिलि? 31 इदोइखातिर का नेलाइहेङ दोअ्खा, नेलाइ चालाउ बुङ, आम्लाउ बुङ रो हाइदोङ पालाउ बुङ, गोताङ परमेस्वरको बाखिन्काको भाअ्सिङ पासु। 32 नेलाइ यहुदिगेलाइ, बोजात्यागेलाइ माकोनु परमेस्वरको मन्डलिको हासुको बुङ मन तु:पापिका काम मापासु। 33 नेलाइ बुङ का पाका भाइपाङ पासु, हाइपानु का ताइमिङ लेङचाका काथा माभोखा। कालाउ का झाराङ छुटकारा निनाको दोअ्तेङ झाराङको भालाइ जेङका काथा भोखा। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.