1 कोरिन्थि 1 - धिमाल1 परमेस्वरको ताइकोङ लाल्सासो ख्रिस्ट इसुको साल्तेङ दिङगिल्का जेङलि काइन्हाका का पावल रो केलाइको ओने सोस्थेनेससो, 2 कोरिन्थता हिका परमेस्वरको मन्डलिहेङ इदोइ चिथि लेखेदोङन्हाखे। नेलाइचाहिँ ख्रिस्ट इसुता पुनित जेङलि काइन्हाका द्याङगेलाइ एइ। हाइपानु ख्रिस्ट इसुको मिङता पुकार पाका झाराङ परमेस्वरको पुनित जनगेलाइहेङ वा काइकाभाइपाङ नेलाइ झाराङहेङ ख्रिस्ट इसुसो पुनित बान्हाइका हि। कालाउ ख्रिस्टचाहिँ एम्बालाइको रो केलाइको प्रभु हि। 3 केलाइको आबा परमेस्वर रो प्रभु इसु ख्रिस्ट नेलाइहेङ निगाहा रो सुबिस्ता प्याको। पावल परमेस्वरहेङ च्याबास चार्हाइका 4 नेलाइको भाअ्सिङ का परमेस्वरहेङ च्याबास चार्हाइखा, हाइदोनु नेलाइ ख्रिस्ट इसुको द्याङगेलाइ हिनाङसिङ परमेस्वर वाको निगाहा नेलाइहेङ पिका हि। 5 हाइदोनु परमेस्वर ख्रिस्टता नेलाइको मन्डलिता गोताङ खाल्को सहसाम्पा पिकाहि। कालाउ नेलाइ गोताङ खाल्को धुइका सरबङ रो बुझिका आकिल निङका हिसुन्हा। 6 हाइपानु ख्रिस्टको बारेता पिका दासि सत हि दोअ्तेङ परमेस्वर नेलाइता तिङपाहि। 7 इदोइखातिर केलाइको प्रभु इसु ख्रिस्ट लोका दामा र्हुमलाउ नेलाइहेङ हिदिङ बरको हारजा माज्यावा। 8 केलाइको प्रभु इसु ख्रिस्ट लोका दिनाता नेलाइ दुस मान्थुका जेङसु दोअ्तेङ वा नेलाइहेङ न्हुअ्थिकापाङ बोल्याका बान्हायावा। 9 परमेस्वर इदोइ काथा पावा, हाइदोनु वा खान्धुरलाएक हि। वा दोङ ताइको चान केलाइको प्रभु इसु ख्रिस्टदोफा मिलापता हिलि नेलाइहेङ काइहि। मन्डलिता खेङन्हाका 10 दादाओने बाइओनेगेलाइ, केलाइको प्रभु इसु ख्रिस्टको मिङता का नेलाइहेङ दोअ्खा नेलाइ झाराङ मिलितेङ हिसु रो नेलाइको माझाता खेङन्हाका काथा माज्याको। कालाउ नेलाइ एलोङदोङ मन रो एलोङदोङ बिचारको जेङसु। 11 हाइदोनु नेलाइ ताइमिङता झागारा पातेङहिका काथा क्लोएको साअ्को जाहानगेलाइ कासेहेङ हिङपाका हि। 12 काङको हिङका काथाचाहिँ इदोङ, नेलाइता आधेमिचाहिँ “का पावलको द्याङ” आधेमि “का अपोल्लोसको द्याङ” आधेमि “का पत्रुस को द्याङ” रो आधेमि “का ख्रिस्टको द्याङ” दोअ्सुखेना आङ। 13 हाइ ख्रिस्ट बाखाराइन्हाका हि कुनु? हाइ पावल नेलाइको भाअ्सिङ कुरुसता भोक जेङहि कुनु? हाइ नेलाइ पावलको मिङता चिभुअ्लि र्हुसुन्हा कुनु? 14 परमेस्वरहेङ च्याबास चार्हायाङका, क्रिस्पस रो गायसबेगार बो हासुहेङ बुङ का चिभुअ्लि पिका मान्थुघा। 15 इदोइखातिर नेलाइ हासुङ बुङ काङको मिङता चिभुअ्लि र्हुन्हाहि दोअ्तेङ दोअ्लि मानिङस्वाना। 16 जातिङको का स्तिफनासको जाहानगेलाइहेङ चिभुअ्लि पिघा। इदोइबेगार हासुहेङ चिभुअ्लि पिघा बे मापिघा इङको का माग्याङका। 17 हाइदोनु ख्रिस्ट कासेहेङ चिभुअ्लि माको, कालाउ रेम्काबानाल पारचारपालि खाटाइका एइ। दुनियाको आकिलको काथाता माको, माकोनुते ख्रिस्टको सरबङ बिथाको जेङधावा। ख्रिस्ट दोङ परमेस्वरको आकिल रो सरबङ 18 हाइदोनु मुअ्कालाइको भाअ्सिङ कुरुसको बानाल निरबुदि एइ। कालाउ केलाइ बान्चिकालाइको भाअ्सिङ परमेस्वरको सरबङ एइ। 19 धरमकितापता इसिका लेखेन्हाका हि, “का आकिलहिका द्याङगेलाइको आकिल मुअ्पाप्याङका रो चालाकगेलाइको चालाकि बेकामको बान्हाइ पाप्याङका।” 20 खोइ, आकिलहिका द्याङगेलाइ हिसो हि? खोइ, धरममास्टरगेलाइ हिसो हि? खोइ, चालाक जेङतेङ धुइकालाइ हिसो हि? हाइ परमेस्वर इदोइ दुनियाको आकिलहेङ बेकामको माबान्हाइहि कुनु? 21 दुनियाको द्याङगेलाइ ताइकोङ आकिलहोइ परमेस्वरहेङ नाल्लि माद्वाङ दोअ्का काथा परमेस्वर ताइको आकिलहोइ निधो पाहि। कालाउ इङकोको बादाला केलाइको पारचार पाका निरबुदि काथासो दोङ खान्धुर पाका द्याङगेलाइहेङ सिन्हुपालि विचार पाहि। 22 यहुदिगेलाइ भारभुसाइका कामको दासि भोखे, कालाउ बोजात्यागेलाइचाहिँ आकिल भोखे। 23 कालाउ केलाइचाहिँ कुरुसता टाङघाइन्हाका ख्रिस्टको बानाल पारचार पान्हाखे। यहुदिगेलाइ इदोइ बानाल र्हुलि मोन्दा माताहि रो बोजात्यागेलाइचाहिँ इदोइ बानाल काम मालाग्याङ दोअ्तेङ फोमपाहि। 24 कालाउ परमेस्वर काइका यहुदिगेलाइ ह्याको माकोनु बोजात्यागेलाइ ह्याको, ख्रिस्ट दोङ परमेस्वरको सरबङ रो आकिल हि। 25 हाइदोनु परमेस्वरको निरबुदि काथा द्याङगेलाइको आकिलखान्तेङ बुङ हेन्जा बाराका हि रो परमेस्वरको निमसरो द्याङगेलाइको बलखान्तेङ बुङ सरबङहिका हि। 26 दादाओने बाइओनेगेलाइ, परमेस्वर काइका पहरता नेलाइ हिसिका द्याङगेलाइ हिघासुन्हा? नेलाइ दोङ बिचार पासु। दुनियाको नजरता नेलाइ हेन्जाङ द्याङगेलाइता आकिलहिका मान्थुसुघाना। कालाउ नेलाइ हेन्जाङ द्याङगेलाइता सरबङ हिका रो धनि बुङ मान्थुसुघाना। 27 कालाउ परमेस्वर आकिलहिकाहेङ लेदेरपालि दुनियाको निरबुदिगेलाइहेङ साल्हि। कालाउ सरबङहिकालाइहेङ लेदेरपालि दुनियाको निमसरोगेलाइहेङ साल्हि। 28 दुनियाता ताइमिहेङ बारा ठानेकालाइहेङ बिथाको बान्हाइलिको भाअ्सिङ परमेस्वर दुनियाता हेपेन्हाका रो म्हुइका ठानेकालाइहेङ साल्हि। 29 परमेस्वरको आगाता हासु बुङ तुजुक मापाको दोअ्तेङ वा इदोइ पाहि। 30 परमेस्वर नेलाइहेङ इसु ख्रिस्टदोफाङ ए बान्हाइका हि। वाकोङ कामसो ख्रिस्ट केलाइको आकिल जेङका हि। केलाइ ख्रिस्टसो परमेस्वरको आगा धरमाति ठर्हाइन्हाङ। कालाउ केलाइ परमेस्वरको पुनित रो छुटकारा निङका द्याङ जेनाङ। 31 इदोइखातिर धरमकिताबता इसिका लेखेन्हाका हि, “एदि हासुङ तुजुक पालि भोखे पानु प्रभुको पाका कामता दोङ तुजुक पाको।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.