2 Sámìɔ̀ 7 - Aaɓi Kwì

Wɔ̃́ Nétàn yà bìɛ̀ Dèɓé lǝ̀ɛ̀

¹ Lɛ̀ kíŋ Dèɓé yè kǝ e píékee kǝ Yàwɛ yàà gɔ̀ la e dǝgbɵ sáálɵ wó kǝ̀ à zɥ̀tópíéɛ gɔ̀ɛ̀,

² yà pɵ̀ Dɔ̀-Aaɓilílàmɛ̀ Nétàn lǝ̀, “Ƃò kɔ́ á yàà gɥ́ nɛ̀ ye, wà dɔ̀ sídà xlɥ̀ ká. Kǝǝ Aaɓia Wòdɔwò Gblɔ̀n ɓɛ è sɔkɔ́ gɥ́!”

³ Lɛ̀kɔ̀ɔɛ Nétàn yà pɵ kíŋ lǝ̀, “Ló ɥ́ wɔ̃́ sáálɵ é ɥ zòɔgɥ́ɛ kǝ, ɓií Yàwɛ ɓɛ yè ɥ píé.”

⁴ Kǝǝ gben do ɓɛ gɥ́ɛ Yàwɛ è wɔ̃́ bìɛ̀ Nétàn lǝ̀,

⁵ “Ló ɥ́ pɵ ma yuɔkǝmɛ̀ Dèɓé lǝ̀ nɛ̀ɛ̀ a pɵ̀àlǝ̀, ‘Ƃi ɥ́ lo kɔ́ dɔ n lǝ̀ ã́ã̀ yàà gɥ́a?

⁶ Maá yà kɔ́ gbɛ gɥ́ gó yi á goá Ézrɛ̀mɛ̀nù ká Ízè sɛ̀ gɥ́ ɥ́ wòa gbɛ̃́ã̀ ɓàɛ̀ ká, kǝǝ a n yàlɛ̀ kǝ̀ sɔkɔ́ gɥ́ píé maà nìɛ̀ à ká.

⁷ Lɛ̀ sáálɵ nyia Ézrɛ̀mɛ̀nù yíá zie à ɓàɛ̀, n ká líésɥ́mɛ̀nù á wo sɥ ma mɛnù wó Ézrɛ̀mɛ̀nù káɛ làɛ̀ à mɛ do wɛ́á lɛ̀ɛ̀kpɔ́kǝ nɛ̀ɛ̀ mǝ̀kǝ̀ yaá ma sídà kɔ̀dɔɛ̀ lɵ.’

⁸ “Lɛ̀ é pɵ́ɛ ɓòà biɛ̀ ma yuɔkǝmɛ̀ Dèɓé lǝ̀ nɛ̀ɛ̀ ma á naàlúmɛ̀ sáálɵɛ waa Yàwɛ káɛ â pɵ̀ à lǝ̀, ‘A ɥ sɥ̀ ɓlá píé píílàà kǝ ɥ́n kǝ kíŋ ká ma mɛnù wó Ézrɛ̀mɛ̀nù káɛ làluo.

⁹ A ɥ píé lɛ̀ sáálɵ ɥ́ loàɛ̀ ɓà, é má ɥ dǝgbɵnù ɓo ɥ líé ɓǝ. A lò ɥ tɔ́ kǝ kpàozǝ̀ líésɥ́mɛ̀ kpã̀ã̀zǝ̀nù wó kpɔ́ànluoɛ son.

¹⁰ Bààmɥ́ɛ má yàlɛ̀ sɥ́ ma mɛnù wó Ézrɛ̀mɛ̀nù káɛ lǝ̀, kǝ ã́ã̀ wo yàlɛ̀ɓo mɥ́, kǝ wɔ̃̀ɔ̃̀ kǝ wo dè yàlɛ̀ é mɛgbɛ yaáló wo fũ̀ã̀fṹã́ kǝ àɓà gbɔɔɛ ɓà. Pǝgbéè kǝmɛ̀nù waáló wɔ̃́gbéè kǝ woá gbɔɔ nɛ̀zɛ̃ã é kǝ̀a líé,

¹¹ gó yi á mɛtàkòzǝ-mɛ̀nù sɥá ma mɛnù wó Ézrɛ̀mɛ̀nù káɛ làɛ̀ lɵ́. A lò fùàsɥ̀ nu ɥ lǝ̀ ɥ yaagɥ́mɛ̀ sáálɵɛ kwɛ. Zɥ́ɛ má n wòɓɵ̀ nɛ̀ɛ̀ a lò ɥ dùnnù kǝlɵ̀.

¹² Àyé ɓa yi yà wò ɓá wɔan ɥ dǝnù píéɛ, a lò ɥ dùn é ɥ dè kpɔ́nǝ́ káɛ wruùlú ã́ã̀ à ɓà kíŋsɛ̀ píí kǝ gbéè.

¹³ Ye é lo ma kɔ́ dɔ, ĩ́ĩ́ a lò àɓà kíŋsɛ̀ táná ɓɛɛ gbã̀ toapɵ́ká.

¹⁴ A lò kǝ à dǝ ká, ĩ́ĩ́ yè lò kǝ n gbɵ ká. Àyé yà sɔ̀nyaa kǝɛ a lòà mà klàkpà e à flá lɵ́ plǝǝ̀zǝ̀, dǝa nǝ́ màa pǝ̀ káɛ ká.

¹⁵ Kǝǝ n ká ló ma lɔ̀kǝ̀a kũ à gɔ̀ nɛ̀zɛ̃ã â kũã́ Sɔ́ɔ̀ gɔ̀ â ɓo ɥ líéɛ lɵ́.

¹⁶ Ƃa kɔ́ wãã̀ ɓa kíŋsɛ̀ wò lò kǝ gbàn tòapɵ́ká n pɛá. Ƃa táná lò to lɵ̀ tòapɵ́ká.’ ”

¹⁷ Zɛ̃ã é Aaɓi wònù nɛ̀ wó nuáɛ, ĩ́ĩ́ zɛ̃ã nyápíé pǝ̀ è gbɛ̀ìa Nétàn làɛ̀ ê bìɛ̀a Dèɓé lǝ̀.

Dèɓéa zuopɵle ɓɛàsɥ̀

¹⁸ Lɛ̀kɔ̀ɔɛ Kíŋ Dèɓé è dà Yàwɛa Sɔkɔ́ ɓɛ gɥ́ é yà sɛa é ɓɛ̀à wòa nɛ̀ɛ̀, “Ô n Dɛn Yàwɛ, dɵmɥ̀ n káɛ, ĩ́ĩ́ n kɔ̀ è mǝ́ɛ, é ɓá nu n ká gbɛ̃̀ɛ̃̀ nǝ̀ǝ nɛ̀?

¹⁹ Pooɛ, n Dɛn Yàwɛ, ɥ́ tũ̀ wɔ̃́ plǝǝ̀zǝ̀ kǝ. Ƃá ɥ wò dɔ n lǝ̀ n dùnnù mɔ́ɔ̀wɔ̃̀ɓà, é ɓá n lɛ̀apíé kpɔ̀grúzǝ̀ zɔ̃̀ n lǝ̀!

²⁰ Mǝ̀ ɓáá á loà biɛ̀ ɥ lǝ̀ɛ̀! Ч ɓa yuɔkǝmɛ̀ é n káɛ dɔ̀, n Dɛn Yàwɛ!

²¹ Ƃií ɓa wòdɔwò wãã̀ ɥ zòkṹwɔ̃̀ mɔ́ɔ̀wɔ̃̀ɓàɛ̀ ɓá wɔ̃́ và sùu nǝ̀ǝɛ kǝ, é ɓâ kǝ mâ gɥ́dɔ.

²² N Dɛn Yàwɛ, ɥ kpàozǝ̀, ɓií mɛgbɛɛ yaálɵ̀ nɛ̀ɛ̀ ɥ lɵ́, ĩ́ĩ́ aaɓi gbɛɛ yaálɵ̀, è kã́ ɥ ɓàɛ̀ ká wɔ̃́ sáálɵ yi tó yàà maɛ gɥ́.

²³ Sɛ́gɔ̀ gbɛ mlǝ̀ǝ̀zǝ̀ é kpɔ́ànluo nɛ̀ɛ̀ ɓa mɛnù wó Ézrɛ̀mɛ̀nù káɛ lɵ́e? Mɛnù ɓɛ ɥ́ lo wo ɓògã́gɥ́ lɛ̀à wɔ̃̀ɔ̃̀ kǝ ɓa mɛnù ká. É ɓá ɥ tɔ́ kǝ kpàozǝ̀ kpɔ́ànlúlɛ̀ sáálɵɛ ɓà. Ч́ wɔ̃́ kpàozǝ̀ wãã̀ wɔ̃́ gblɥ́nzǝ̀nù kǝ̀, sɛ́gɔ̀ gbɛgbɛ wãã̀ waa aaɓinù ɓò wo líésɥ̀ ká.

²⁴ Lɛ̀kɔ̀ɔɛ ɥ́ Ézrɛ̀ sɛ̀ dɔ ɥ lǝ̀ wɔ̃̀ɔ̃̀ kǝ ɓa mɛnù ká tòapɵ́ká. Óó Yàwɛ ɓá kǝ waa Aaɓi ká.

²⁵ “Lɛ̀ é pɵ́ɛ, óó n Dɛn Yàwɛ, gó wɔ̃́ ɥ́ bìɛ̀ é gbã̀ n ɓà ĩ́ĩ́ n dùn nù ɓàɛ̀ è kǝ pɵ́ tòapɵ́ká, ɥ́n pǝ ɥ̂ pɵ ɥ lòà kǝɛ kǝ.

²⁶ Yàkɔɔ́ɛ ɥ tɔ́ è lò kǝ và, ĩ́ĩ́ mɛnù wòlòà pɵ, ‘Yàwɛ é naàlúmɛ̀ sáálɵɛ gɔ̀lààɛ̀ ye é Aaɓi ká Ézrɛ̀ sɛ̀ làlùo.’ É ɥ́ lo n dùnnù kǝ kíŋnù ká tòapɵ́ká.

²⁷ Ƃií ɓi Yàwɛ ɥ́ naàlúmɛ̀ sáálɵɛ gɔ̀làà, ɥ́ Ézrɛ̀a Aaɓi ká! È gà n gɥ́ kǝ ã́ã̀ ɓɛàsɥ̀ nɛ̀ kǝ ɥ lǝ̀, ɓií ɓá wɔ̃́ nɛ̀ zɔ̃̀ n lǝ̀, ɓâ biɛ̀ nɛ̀ɛ̀ ɥ lò n dùnnù kǝ kíŋnù ká.

²⁸ “Lɛ̀ é pɵ́ɛ, óó n Dɛn Yàwɛ, ɓi ɥ́ tɔɔ Aaɓi, ɥ wò è wɔ̃́dèzǝ̀. Ye gà ɓá ɥ wòdɔ n lǝ̀ wɔ̃́ sǝ̀ sùu nǝ̀ǝɛ ká ɓǝ.

²⁹ Gó ɥ zòɔ è wɔsɛa ɥ́ lúàkpɔ́ n dùnnù ɓà, kǝ wo wɔ̃̀yí nyɛ̀ɛ̀ kã́ ɥ lǝ̀ tòapɵ́ká. Óó n Dɛn Yàwɛ, ɓií ɓá wé, é ɓa lúà ɓɛ é lo kpɔ n dùnnù ɓà tòapɵ́ká.”