2 Sámìɔ̀ 4 - Aaɓi Kwì

Wò Íbósɛ̀ zǝ̀

¹ Lɛ̀ Sɔ́ɔ̀ gbɵ Íbósɛ̀ yà ma nɛ̀ɛ̀ wà Ábínǝ̀ zǝ Hɛ́brɔ̀nɛ̀, yè sùò dèèdè é Ézrɛ̀mɛ̀ sáálɵɛ wo zòɔ è dà zrɥɵ.

² Íbósɛ̀a yuɔkǝmɛ̀ pèètɛ wó kǝ̀ wã́ã́dɔmɛ̀nùa líésɥ́mɛ̀nù káɛ, wó tɔɔ Báánà wãã̀ Wrɛ́kà, wó kǝ̀ Wrímɔ̀n gó Bíírɔ̀ pɵɵ, é go Bɛ́nzémɛ̀ sɛ̀ gɥ́ɛ à gbɵnù káɛ. Bíírɔ̀ lɛ̀ ɓɛ Bɛ́nzémɛ̀ sɛ̀ kɔ̀pɛ̃́ã́ do mɥ̀.

³ Bíírɔ̀ pɵ̀gɥ́ mɛ̀nù dè ɓɛɛ wà dùà kwɛ̀i wà ló Gétìn pɵ̀ gɥ́, é wó má gbɔɔ.

⁴ Sɔ́ɔ̀ gbɵ Zɔ̀nátã̀ a nǝ́gɔ̃ɔ̃̀zǝ̀ do è kǝ̀ lɵ̀ wô lɛ̀ Mɛ̀fíbósɛ̀. Yi wó Sɔ́ɔ̀ wãã̀ Zɔ̀nátã̀ zǝáɛ kǝ à kwɛ̀ yà kǝ sɔ́ɔ́lú. Lɛ̀ wo gawɔ̃̀ tàà è go Zɛ́zrìɛ̀ pɵɵ é gbɛ̀ìɛ̀, le é kǝ̀ e zòkǝlɛ̀à nǝ́ ɓɛ píéɛ yà sɥ̀ sɛa záúlɵ é dùà à ká. Kǝǝ à bũ è zùù àɓà dùò é nǝ́ ɓɛ é goà kwɛ é pɥ̀ɵ̀, é kǝ̀ gbɔɔ kplɔ́mɛ̀ ká.

⁵ Yi do káɛ, Wrímɔ̀n gbɵnù pèètɛ wó Wrɛ́kà wãã̀ Báánà káɛ wò lò Íbósɛ̀ píékee ŋlǝn kǝ è ŋlǝnyì zǝlà.

⁶ Le é to kɔ́ píéɛ, à wrɔ̀nyí yà ga lɛ̀ é kǝ̀ wítì gɥ́ wàà lɛ̀à, yà dàyiá, àmɔ́ɔ̀wɔ̃̀ Wrɛ́kà wãã̀ Báánà wó dà kee srǝ̀ǝ̀lɵ.

⁷ Lɛ̀ wó dàkeeɛ, wó lo Íbósɛ̀ wɔ̀lɛ̀ ɓà kǝ è yizǝlà. Wô zǝ, wô gɔ̀ kã̀, wó tàa gben gben Zɔ́dàn Goopíé lɛ̀ ɓà.

⁸ Wó nu Íbósɛ̀ gɔ̀ ká Dèɓé lɛ̀ Hɛ́brɔ̀n pɵɵ. É wô pɵ kíŋ ɓɛ lǝ̀, “Íbósɛ̀ ye ɥ dǝgbɵ Sɔ́ɔ̀ ê mɛ̀ɛ̀ nyɛ̀ɛ̀ ɥ zǝɛ, gbɵ káɛ, à gɔ̀ gà é nɛ̀. Yàwɛ ɓɛɛ yà ɥ gbɔ̀ɓo Sɔ́ɔ̀ wãã̀ e dùnnù ɓà gbɛ̃́ã̀ yì nɛ̀ ká.”

⁹ Kǝǝ Dèɓé è Wrɛ́kà wãã̀ e legrú Báánà wó Wrímɔ̀n é Bíírɔ̀mi káɛ à gbɵnù káɛ zǝnù ê pɵ, “A n sɵ̀ɓɵ̀ Yàwɛ é ɓéì é yà n gɔ̀la wɔ̃́gbéè sáálɵɛ gɔ̀ɛ̀ tɔ́á!

¹⁰ Bɔmɛ̀ é nu n píé Zíklà pɵɵ é Sɔ́ɔ̀ gawɔ̃̀ bìɛ̀ n lǝ̀ɛ̀, yè kǝ̀à zòà nɛ̀ɛ̀ yà nu wɔ̃́tààsǝ̀ ká. Aà kũ̀ â zǝ. E kɔ̀ɔ̀ ê ye yaa wɔ̃́tààsǝ̀ é nuáɛ gɥ́ɛ é ɓǝ.

¹¹ Lɛ̀ é pɵ́ɛ pǝ lo kǝ kǝpǝ̀yaa mɛ̀nù wó mɛ kpenlɵ zǝ e dè píékeeɛ gɔ̀ɛ̀ yaáló kǝ và nyɛ̀ɛ̀ zie à làà! A lòà gbɔ̀ɓo kaɓà, á ka ɓo kpɔ́ánluo!”

¹² É Dèɓé èye píémɛ̀nù pã́ã́ɓo, é àɓà mɛnù wó Wrɛ́kà wãã̀ Báánà zǝ, wóo gbìènù wãã̀ wo gɛ̃̀nù kã̀ woɓà wóo gɵ̀ɵ̀kpǝ̀nù wãã̀ wo dɔpǝnù ɓɛ dũ Hɛ́brɔ̀n Yìpɔ́á sɔ́. Kǝǝ wò Íbósɛ̀ gɔ̀ ɓɛ sɥ̀ wô bĩ̀ Ábínǝ̀a bũlà gɥ́ má Hɛ́brɔ̀n pɵɵ.