2 Sámìɔ̀ 22 - Aaɓi Kwì

Dèɓéa kɔ̀zie tã̀

¹ Lɛ̀ Yàwɛ yà Dèɓé gɔ̀la Sɔ́ɔ̀ gɔ̀, ĩ́ĩ́ à dǝgbɵnù wótoɛ gɔ̀ɛ̀, Dèɓé è tã́ nɛ̀ ɓò Yàwɛ píé.

² Yàwɛ ɓɛ é tɔɔ ma gùǝ̀ wãã̀ ma sã́ã́ gbéè.

³ Ma Aaɓi é tɔɔ n bĩ̀lɛ̀, má kǝ à píéɛ n gɔ̀lasɥ̀mɥ̀. È n bĩ̀lɛ̀ɓò nɛ̀zɛ̃ã lɛ lɵ́ mɛ tàkpààlà à káɛ lɵ́, é n tàkòzǝ é n gɔ̀la. Ye é tɔɔ n lamɛ̀, yàkǝɛ è n bĩ̀lɛ̀ɓo é n gɔ̀la wɔ̃́gbéè gɔ̀.

⁴ A Yàwɛ lɔ̀ɔ̀kǝ̀, é n gɔ̀la n dǝgbɵnù gɔ̀. Gó Yàwɛ tɔ́ è ɓɔ!

⁵ Ga è nù n là nɛ̀ɛ̀ yóógɔ̃ dɔsɥ̀ lɵ́, é gɥ́sìèle yí è pa n là.

⁶ Ga gblɥ́n è nìɛ̀ n zɥ̀, é bũlà è yaa sɔ́ lì n gɔ̀.

⁷ Ma wɔ̃́gbéè gɥ́ɛ a Yàwɛ ɓɛɛ lɔ̀ɔ̀kǝ̀. A ma Aaɓi lɔ̀ɔ̀kǝ̀ gbũ̀ɓàle mɔ́ɔ̀wɔ̃̀ ɓà. È n wò mà yaa kɔ́ ɓɛ gɥ́, éye tóto n gbɵbɔ wò gɔ̀ nyɛ̀ɛ̀ gbũ n ɓà.

⁸ Lɛ̀kɔ̀ɔɛ kpɔ̃́ànlúlɛ̀ è zùù, é gakǝ̀ dèèdè. Nakwi gɛ̃̀gbã̀lɛ̀ è zã̀ã̀zã, é zùù ɓií Yàwɛ è dà nààgɥ́.

⁹ Síégbĩ́ɛ̃́ è go à nyulí gɥ́ dúdúlɵ̀, é síé nɛ é pǝ mǝ́nlàɛ̀ wãã̀ sɛ̃ síènù wó pǝ gɥ́ɵ́làɛ̀ wó gò à lígɥ́ zùzùlɵ.

¹⁰ È nakwi ɓɛ blɥ̀ǝ̀ é nu sɛa, kǝ lakpo tii yà gɛ̃̀ xlɵ̀ɵ̀.

¹¹ È yà kɛlɛ́nù tàà, é xlɵ̀ nakwií, é tà búú ɓɛ gbãnù là.

¹² È bĩ́tii dɔ́ e de là. Lakpo gbɥ́ɥ́gbɥ̀ wó kǝ̀ paɥ̀ yí káɛ wó nìɛ̀ à zɥ̀.

¹³ Sɛ̃ síènù nɛ è gbɛ̀ì la nyábɔù gɥ́ à líé.

¹⁴ Lɛ̀kɔ̀ɔɛ Yàwɛ è wè nɛ̀ɛ̀ gbãdɔ wò lɵ́ naalú lɛ̀ ɓà, Mɛ É Nań Gbɛ̃ɛ̃ ɓɛɛ è gblà é wo ká.

¹⁵ Yàwɛ è yaa srṹṹnù zùò é à dǝgbɵnù wó pɛ̃̀, à ɓà la nyábɔù gɥ́ɛ é wo bɔ wó lo blàa.

¹⁶ Sɛalɛ̀ é yóó xlɵ̀ɵ̀ɛ̀ è zɔ̃̀ plãlà, é lɛ́ è go kpónlà gɛ̃̀gbã̀lɛ̀ là. Lɛ̀ Yàwɛ ɓɛ é wɔ̃́gbéè bìɛ̀ e dǝgbɵnù ká, é ŋlà wo ɓa yaa nàzòà gɥ́ɛ ká.

¹⁷ Yàwɛ ɓɛ yè gò nan é nu sɛa é n sɥ̀lúú, é n ɓo yígrù gbɛ̃̀ɛ̃̀ nù ɓɛ ɓàà.

¹⁸ È n ɓò n dǝgbɵnù gɥ́gbéèzǝ̀ kwɛɛ é n ɓo mɛ̀nù n lɔ̀nyiɛ wo ɓàɛ̀ kwɛɛ n kɔ̀ gbɛ yaá mɔ̀ wo ɓà.

¹⁹ Yiá kǝà wɔ̃́gbéè gɥ́ɛ, wò nù n gɔ̀, kǝ Yàwɛ ɓɛ yè n tàkòzǝ̀.

²⁰ Yè gbũ̀ n ɓà é n ɓo lɛ̀ gblɥ́nzǝ̀ ɓà. Yè n là ɓií à zòɔ grúlì n mɔ́ɔ̀wɔ̃̀gɥ́.

²¹ Yàwɛ è wɔ̃́ zǝ nù n lǝ nɛzɛ̃ã n kǝ wɔ̃̀ lɵ́ ká kpenlɵɛ lɵ́. É lúàkpɔ n ɓà ɓií n kɔ̀ yaâ wɔ̃́yaa gɥ́.

²² Wɛakũɛ à to Yàwɛ zòkṹwɔ̃̀ kǝɥ̀ píé kplàɓo, n ká gó Aaɓi píé ã́ã̀ kɛ̃ayààwɔ̃̀ kǝ gbɛɛɓo dó.

²³ Ƃií à tɛ̃ã̀ sáálɵɛ wò n nyaàká, àmɔ́ɔ̀wɔ̃̀ gɥ́ɛ n ká à ɓà tɔn dà n kɔ̀tàà dó.

²⁴ Yàwɛ yà gɥ́dɔ̀ nɛ̀ɛ̀ gèè yaâ n ɓà, nɛ̀ɛ̀ má n dè kṹsɛa kɵ́kǝ̀ á nù wɔ̃́yaa kǝ.

²⁵ Lɛ̀ é pɵ́ɛ, yà wɔ̃́zǝnù n lǝ nɛ̀zɛ̃ã n kǝ wɔ̃̀ lɵ́ ká kpenlɵɛ lɵ́, ɓií yà gɥ́dɔ̀ nɛ̀ɛ̀ n kɔ̀ yaâ wɔ̃́yaa gɥ́.

²⁶ Óó Yàwɛ, ɥɥ zòdɔ̀ mɛnù wóo zòdɔ ɥ ɓàɛ̀ ɓà, ɥɥ dè zɔ̃̀ nɛ̀ɛ̀ ɥ kpenlɵ mɛ é kpenlɵɛ lǝ̀.

²⁷ Ч púú mɛnù wo zòɔ lɵ́ púúɛ wo lǝ̀, kǝǝ ɥɥ wɥǝ kpo dɔ̀ mɛ é sɔn lɵ́ yàɛ ɓà.

²⁸ Mɛnù wó dèsɥ̀téé mɛ̀ káɛ ɥ wo là, kǝǝ mɛnù wó dèsɥ̀và mɛ̀ káɛ ɥ nù wo ká sɛa.

²⁹ Yàwɛ, ɓi ɥ́ tɔɔ ma lɛ̀púúlɛ̀, ma Aaɓi, ɥ lò lɛ̀po lɛtrɵ̀ n là nɛ̀ gɥ́.

³⁰ Ƃi ɥ́ gɥ́gbéèlɛ̀ nu n lǝ̀ ã́ã̀ kózǝ n dǝgbɵnù ká ɥ́ píígbéèlɛ̀ nu kǝ ã́ã̀ bɔ waa sã́ã́nù là.

³¹ Aaɓi é nɛ̀ à kǝwɔ̃̀ è kpenlɵ, zɛ̃ã mlǝ̀ǝ̀zǝ̀ à wònù wô ká zòdɔ̀àzǝ̀ pɵ́e! Ye é ɓɛ è kɛ̃̀ɛ̃̀ lɛ lɵ́ mɛ sáálɵ wô mɛɛ̀là nyɛ̀ɛ̀ wo tàkpààɛ̀ lǝ̀.

³² Yàwɛ ɓɛ à sróó é tɔɔ Aaɓi. Aaɓi sróó é tɔɔ yia gùǝ̀.

³³ Aaɓi é nɛ̀ é tɔɔ ma sã́ã́ gbéè. Ye é n gɛ̃̀ ye lɛ̀ pǝ̀kǝ̀ é kǝ̀ sǝ̀.

³⁴ Ye é n gɛ̃̀ kǝ̀ nɛ̀ɛ̀ sòòlà wɥ̀nù gɛ̃̀ lɵ́ ê kǝ̀ á tà tɔ̃̀píélɛ̀nù ɓà pǝ́ǝ́pǝ̀ ká.

³⁵ Ye é n dã̀ã̀ grùkǝsɥ̀ mɔ́ɔ̀wɔ̃̀ã̀, àmɔ́ɔ̀wɔ̃̀ gɥ́ɛ, à pìɛsào kòò n kɔ̀ ká.

³⁶ Óó Yàwɛ, ɓá n gbà lɛ é làsɥ̀ káɛ ká, ɓa gbũ̀ɓàle yà n kǝ mɛ và dèèdè ká.

³⁷ Ƃá n dɔ̀lɛ̀ kǝ gbɛà tɛ́nɛ́ tɛ̀nɛ̀, lɛ̀ é pɵ́ɛ n gɛ̃̀ ká ló drɔɔ̀.

³⁸ Má n dǝgbɵnù kǝ̀ blàaɛ á wo gɥ́sìè. Maa yiɛ n zɥ́, é toàpɵ́ á wo gɥ́síé fɛfɛlɵ̀.

³⁹ Má wo zǝpǝáɛ wáá wruùlú gbɔ. Wo gɵ̀ɵ̀kpǝ̀nù wròsɛa n líé.

⁴⁰ Ƃií wɛakũɛ, ɓá n tàkṹ gɥ́gbéèlɛ̀ ká kǝ ã́ã̀ kózǝ grùà. Mɛnù wó wrùù n gɔɛ, wà ló n gɛ̃̀ xlɵ̀ɵ̀.

⁴¹ Baazɥ́ɛ ɓâ kǝ̀ n dǝgbɵnù wà duà n lǝ̀, mɛ n lɔ̀nyiɛ wo ɓàɛ, má wo gɥ́sìè.

⁴² Wò gbũ̀ɓàle mɛ̀ɛ̀, kǝǝ mɛgbɛ ká wo gɔ̀la. Wò gbɵbɔ Yàwɛ dèpíé, kǝǝ yaa è tóto wó wo gɔ̀ gbɛɛɓo.

⁴³ A yèèyè wo là wó kǝ̀ nɛ̀ɛ̀ muù lɵ́ wɛ́á, á tààta wo là nɛ̀ɛ̀ mɛ è tà bɵɥ̀ gɥ́ kpìnpíéɛ lɵ́.

⁴⁴ Ч n là dɔ̀ n gɔ̀ nyǝ́n mɛ̀nù gɔ̀, ɥ́ ma ɓɔ̀u gɛ̃̀ĩgbã̀ sɛ́gɔ̀nù ɓɛ làluo. Mɛnù n ká wo dɔ líéɛ wà kǝ yuɔkǝ̀ n ɓà mɛnù ká.

⁴⁵ Sɛ́gbɛ gɥ́mɛ̀nù lò nu n píé zùùsɥ̀ ká, é wà n tàà mà nǝ̀ǝɛ, wò n ɓlɛ̀kpɔ, wó n wò kǝ̀.

⁴⁶ Wo zòɔ yà dàzrɥɵ, é wo bũ lɵ́ zùùlà wo ɓà waà gòa wo bĩ̀lɛ̀nù ɓà.

⁴⁷ Yàwɛ è ɓéì, yè é ma guǝ káɛ, lúàkpɔ́sɥ̀ mɥ̀à ɓà. Gó Aaɓi é ma làsɥ̀ ká, é mà guǝ káɛ, à tɔ è ló luo.

⁴⁸ Mɛ é n gbɔ̀ɓoɛ, yè tɔɔ Aaɓi, ye ê kǝ n dǝgbɵnù wó lo n xlɵ̀ɵ̀.

⁴⁹ Yàkǝɛ è n gɔ̀ là n dǝgbɵzǝ̀ wó ma grúnù káɛ wo gɔ̀. Óó Yàwɛ, ɓi ɥ́ kɔ̀ziesɥ̀ nu n lǝ̀ n dǝgbɵnù là, ɥ́ n bĩ̀lɛ̀ɓo pǝgbéè kǝ gɔ̃̀ɔ̃̀nù gɔ̀.

⁵⁰ Lɛ̀ é pɵ́ɛ a ɥ tɔ́ɓɔ̀ sɛ́gɔ̀nù ɓɛ soń, á tã́ ɓo ɥ tɔ́ píé ɥ tɔ́ɓɔsɥ̀ ká.

⁵¹ Aaɓi è kɔ̀zíé sɥ̀ và nù mà àɓà kíŋ káɛ n lǝ̀, yà tòapɵ́ lɔkǝà zɔ̃̀ mɛ é nyɔ̃́wro yi tuo, yí mɥ̀ ma Dèɓé, nyià ma nɔ́ɔ̀nù káɛ yi lǝ̀ tòapɵ́ká.