2 Sámìɔ̀ 10 - Aaɓi Kwì

Dèɓé kɔ̀ è zìè Ámɔ̀nmɛ̀nù wãã̀ Sírìàmɛ̀nù là

¹ Lɛ̀ Ámɔ̀nmɛ̀nùa kíŋ Néhàà yà gaɛ, à gbɵ Hánùn è ɓɔ̀ukǝ̀ à pĩgɥ́.

² Lɛ̀kɔ̀ɔɛ Dèɓé yà pɵ, “A lò grúsǝ̀ kǝ Nàhásì gbɵ Hánùn ká, nɛ̀zɛ̃ã à dǝ̀ è grúsǝ̀ kǝ̀a n ká kpáɛ lɵ́.” Àmɔ́ɔ̀wɔ̃̀ Dèɓé è yiɛmɛ̀nù bɔ kǝ wɔ̃̀ɔ̃̀ à lɛ̀àga pɵ à dǝ wɔ̃̀ gɥ́. Lɛ̀ wà wò Ámɔ̀n sɛ̀ gɥ́ɛ,

³ Ámɔ̀nmɛ̀nùa líésɥ́mɛ̀nù wô pɵ wo dɛn Hánùn lǝ̀, “Yè ɥ zòà lɛ̀ Dèɓé yè ɥ lɛ̀àgapɵmɛ̀nù bɔɛ kǝ ɥ dǝ ɓlɛ̀ ê kpɔ́là ɓǝà? Ƃaâ gɥ́dɔ nɛ̀ɛ̀ ya yaa mɛnù bɔ kǝ wɔ̃̀ɔ̃̀ nana kǝ pɵɵ zɵ wɔ̃̀ɔ̃̀ pɵnɛ̀ kṹ kwa gɔ̀à?”

⁴ Àmɔ́ɔ̀wɔ̃̀gɥ́ɛ Hánùn yè mɛnù é Dèɓé è wo bɔɛ kũ é wo ɓúà kɔ̀pɛ̃́ã́ do ɓo, é waa gbààwíìnù kã̀ e zin lɵ, wo vɛɛ́píé, é wo bɔ wó lo weé pɵɵ.

⁵ Lɛ̀ wàà biɛ̀ Dèɓé lǝ̀ɛ̀, é mɛ bɔ wo lǝ̀ kǝ nyɛ̀ɛ̀ wo ye, ɓií gɔ̃ɔ̃̀nù ɓɛ xlǝ è wo kǝ̀ dèɓo. Lɛ̀kɔ̀ɔɛ kíŋ yà pɵ, “Kà tó Zɛ́ríkò nyɛ̀ɛ̀ toápɵ́ ka ɓúà è ɓɔ kã́ã̀ kɔ̀ yìɛ̀zɥ́ sɥ̀à.”

⁶ Lɛ̀ Ámɔ̀nmɛ̀nù wà wo dè kǝ Dèɓé dǝgbɵnù káɛ, wó mɛ bɔ Sírìà krúánù wo go Bɛ̀tréhɔ̀ wãã̀ Zóbà sɛ̀nù gɥ́ɛ lǝ̀ wóo kɔ̀ɔ̀ nu. Wò kǝ̀ kózǝ̀ sɛa mɛ vù gɔ́ɔ̀ pèètɛ (20,000) ká, é Máákà sɛ̀gɥ́ kíŋ yè nu gɔ̃ɔ̃̀nù vù do (1,000) ká, é gɔ̃ɔ̃̀nù wó go Tɔ́ɔ̀ sɛ̀gɥ́ɛ wó kǝ mɛ vù gɔ́ɔ̀do ga pèètɛ (12,000) ká.

⁷ Lɛ̀ Dèɓé yà maɛ é mɛ bɔ Zóà wãã̀ yaa krúánù gbéè gbéè sáálɵɛ lǝ̀.

⁸ Lɛ̀kɔ̀ɔɛ Ámɔ̀nmɛ̀nù wóo ɓɥ̀ǝ̀dɔ wó nu wóo dɔ̀lɛ̀ kũ waa pɵ và wô lɛ̀ Wrábàɛ̀, à glàlí ɓà. Kǝǝ Sírìàmɛ̀nù wó go Zóbà wãã̀ Wréhɔ̀, ĩ́ĩ gɔ̃ɔ̃̀nù wó go Tɔ́ɔ̀ wãã̀ Máákàɛ̀ wò dɔ̀ wo dè lǝ̀ sɛ́ ɓɛ à lɛ̀gbɛ́álɛ̀ wɛ́á ɓà.

⁹ Lɛ̀ Zóà yà ye nɛ̀ɛ̀ à dǝgbɵnù wòdɔ̀ kǝ́ngɥ́ à líézɛ̃̀ã wãã̀ à tààzɛ̃̀ãɛ̃, é krúázǝ̀ gaga wó Ézrɛ̀ sɛ̀ gɥ́ɛ sɥ kǝ wɔ̃̀ɔ̃̀ grùgɔ̃ Sírìàmɛ̀nù píé.

¹⁰ Krúázǝ̀ àyé wó toɛ yé wo dɔ e legrú Ábísàì kwɛ kǝ wɔ̃̀ɔ̃̀ grùgɔ̃ Ámɔ̀nmɛ̀nù píé.

¹¹ Ê pɵà lǝ̀, “Àyé Sírìàmɛ̀nù gɥ́ yà kǝ gbéè n ɓàɛ̀, ɓò nu ɥ́ gbũ n ɓà. Kǝǝ àyé Ámɔ̀nmɛ̀nù gɥ́ yà kǝ gbéè ɥ ɓàɛ̀, a lò nu á gbũ̀ ɥ ɓà.

¹² Ka gɥ́ è kǝ gbéè ka zò è kǝ gbàn, kwá gɔ̃ɔ̃̀lɛ̀ kǝ kwaa mɛnù mɔ́ɔ̀wɔ̃̀ã̀ ĩ́ĩ́ Aaɓi a pɵ vàvànù mɔ́ɔ̀wɔ̃̀ã̀. Gó Yàwɛ è pǝ é lì à lǝ̀ɛ̀ kǝ.”

¹³ Lɵɛ Zóà wãã̀ mɛnù wó kǝ̀ à píéɛ wó gã̀ã̀ Sírìàmɛ̀nù ká kɵ̀ɵ wɔ̃̀ɔ̃̀ grùgɔ̃. Kǝǝ Sírìàmɛ̀nù wò dùà wo ɓà.

¹⁴ Lɛ̀ Ámɔ̀nmɛ̀nù wà ye nɛ̀ɛ̀ Sírìàmɛ̀nù wà dùàɛ̀ wo dèe wó dùà pɵ́ Ábísàì ɓà wó lo waa pɵvà gɥ́. Lɛ̀kɔ̀ɔɛ Zóà è yìɛ̀ e zɥ́ é bo grù gɔ̃lɛ̀à Ámɔ̀nmɛ̀nù píé é nu Zɛ̀rúsálɛ̀n.

¹⁵ Kǝǝ lɛ̀ Sírìàmɛ̀nù wà ye nɛ̀ɛ̀ Ézrɛ̀ kɔ̀ yàzie wo làɛ̀, wó pà wo kóà do.

¹⁶ Lɛ̀kɔ̀ɔɛ Hédáízǝ̀ è mɛ bɔ Sírìàmɛ̀nù wó kǝ Yúfrétì Yì zrɵ̀ɵ̀ɛ̀ lǝ̀ wó nu Hílàn pɵɵ, é Hédáízǝ̀ a krúázǝ̀ gɔ̀lààmɛ̀ Sóbà è kǝ̀ wo líé.

¹⁷ Lɛ̀ wàà biɛ̀ Dèɓé lǝ̀ɛ̀, é Ézrɛ̀ krúázǝ̀ sáálɵɛ pàkóà, wó Zɔ́dàn Yì kã̀ wó lo Hílàn. Lɛ̀ ɓɛ Sírìàmɛ̀nù wó dɔ kǝ́ngɥ́ àɓà Dèɓé gɔ̀ wɔ̃̀ɔ̃̀ grùgɔ̃ à píé.

¹⁸ Lɛ̀kɔ̀ɔɛ Sírìàmɛ̀nù wò dùà Ézrɛ̀mɛ̀nù lǝ̀, kǝǝ Dèɓé è waa kálìà tá gɔ̃ɔ̃̀nù kǝ̃̀ǝ̃ lɔ́ɔ́yià (700) wãã̀ sòtààmɛ̀ vù gɔ́ɔ̀ yììsiɛ (40,000) zǝ̀, é wo gɔ̀lààmɛ̀ Sóbà gĩ̀ é dɔgbéè é ga má.

¹⁹ Lɛ̀ kíŋnù sáálɵ wó yuɔkǝ̀ Hédáízǝ̀ xlɵ̀ɵ̀ɛ̀ wô ye nɛ̀ɛ̀ Ézrɛ̀ kɔ̀ yàzie wo làɛ̀ wó tɔ̀zùò Ézrɛ̀ lǝ̀, wa yuɔkǝ̀ gbɔ Ézrɛ̀ ɓà. Àmɔ́ɔ̀wɔ̃̀gɥ́ɛ Sírìàmɛ̀nù wò sùò wɔ̃̀ɔ̃̀ gbũ Ámɔ̀nmɛ̀nù ɓà gbɔɔ.