1 Sámìɔ̀ 22 - Aaɓi Kwì

Wò sraɓomɛ̀nù tɛ̃́ɛ̃́ wròn

¹ Dèɓé è gò má é dùà é lo Àdúlàn gùǝ̀dù gɥ́, lɛ̀ à legrú gɔ̃ɔ̃̀zǝ̀nù wãã̀ à dǝ píékee mɛ̀nù wô maɛ wó lo goú à píé má.

² É mɛ do do sáálɵ é kǝ̀ wɔ̃́gbéè gɥ́, é kpàà kǝ̀à ɓà, é à zòɔ yà dàzrɥɵɛ, wó pà wokóà à píé, é kǝ̀ waa líésɥ́mɛ̀ ká. Gɔ̃ɔ̃̀nù kǝ̃̀ǝ̃ yììsiɛ (400) wó kǝ̀ à píé.

³ Dèɓé è gomɥ́ é lo Mízípɛ̀ pɵɵ, Móà sɛ̀ gɥ́, ê pɵ Móà kíŋ lǝ̀, “À ɓɛ̀à ɥ lǝ̀ gó n dǝ wãã̀ n le wò yà ɥ píé nyɛ̀ɛ̀ toápɵ́ wɔ̃́ Aaɓi loà kǝ n lǝ̀ɛ̀ ã́ã̀ ye.”

⁴ Éye kpɔ́mɛ̀nù to Móà kíŋ píé, é wó toà píé yi kpɔ̀n é Dèɓé è kǝ̀a e bĩ̀lɛ̀ɓàɛ̀ ká.

⁵ Lɛ̀kɔ̀ɔɛ Dɔ̀-Aaɓilílàmɛ̀ Gáà è nù Dèɓé píé ê pɵàlǝ̀, “Kɵ́kǝ̀ ɥ́ to ɥ bĩ̀lɛ̀ɓà, ɓò gó zɵ ɥ́ ló Zúdà sɛ̀ gɥ́.” É Dèɓé è gomɥ́ é lo Hɛ́wrɛ̀ bliílɵ.

⁶ À yi nɛ̀ káɛ Sɔ́ɔ̀ yà ma nɛ̀ɛ̀ wà Dèɓé wãã̀ gɔ̃ɔ̃̀nù wó kǝ̀à píéɛ wo ye. Sɔ́ɔ̀ è kǝ̀ yàlɛ̀àká Gébìɛ̀ pɵɵ, támáre xlɥ̀ ɓɛɛ bĩ́ĩ̀ tɔ̃̀ là nǝn, àɓà dɥ́ è kǝ̀à kwɛ, é àɓà yuɔkǝmɛ̀ sáálɵɛ wó kǝ̀ dɔàká wo gɛ̃̀ã̀ wó nìɛ̀ à zɥ̀.

⁷ Lɛ̀kɔ̀ɔɛ Sɔ́ɔ̀ yà pɵ yaa mɛnù wo nìɛ̀ à zɥ̀ɛ̀ wo lǝ̀, “Bɛ́nzémɛ̀ nɔ́ɔ̀, kàa tótó, Zɛ́sè gbɵ è lò ɓlɥ́ɵ̀ wãã̀ gréè kɔ́ú nu ka dodo sáálɵɛ ka lǝ̀à? È lò ka sáálɵɛ ka kǝ kózǝmɛ̀ vù plǝǝ̀zǝ̀ wãã̀ kózǝmɛ̀ kǝ̃̀ǝ̃ plǝǝ̀zǝ̀ gɔ̀lààmɛ̀nù káa?

⁸ Ka sáálɵɛ ká mǝ́là n klɥ̀ɥ ɓǝà? Ka do yaá lɛ́ɓo wɔ̃́là n lǝ̀ lɛ̀ n gbɵ lɵ́ e wò dɔlà Zɛsé gbɵ lǝ̀ɛ̀ ká, kaa mɛdo wɛ́ázǝ̀ yaá dà n yéngɥ́ ĩ́ĩ́ yaá wɔ̃́ nɛ̀ biɛ̀ n lǝ̀ nɛ̀ɛ̀ n gbɵ yà n píémɛ̀ zòɔ xlã̀ n bũã̀, nyɛ̀ɛ̀ yà n gɔ̀ gbáɥ́ nɛ̀ɛ̀ zɛ̃ã ê ká gbɛ̃́ã̀ɛ̃̀ lɵ́.”

⁹ Lɛ̀kɔ̀ɔɛ Ídɔ̀nmi Dúɛ̀ é kǝ̀ dɔàká Sɔ́ɔ̀a yuɔkǝmɛ̀nù sɔ́ɛ ê pɵ, “A Zɛ́sè gbɵ ɓɛ yè é nu Nɔ́ɔ̀ pɵɵ, Àhítù gbɵ Àbímɛ́lɛ̀ píé,

¹⁰ é Yàwɛ lɛ̀ɛ̀kpɔ́ kǝ̀ Dèɓé mɔ́ɔ̀wɔ̃̀ká, é ɓɵ̀pǝ̀ nuàlǝ̀, é Félésã́ã̀mi Gòláyàa làà ɓɛ nuàlǝ̀.”

¹¹ Lɛ̀kɔ̀ɔɛ kíŋ è mɛ bɔ sraɓomɛ̀ Àhímɛ́lɛ̀ wãã̀ e dǝ píékee mɛ̀ sáálɵɛ, ĩ́ĩ́ sraɓomɛ̀ sáálɵ wó kǝ̀ Nɔ́ɔ̀ pɵɵɛ, wo plɛ́n wó nu kíŋ ɓɛ wòà.

¹² É Sɔ́ɔ̀à pɵ, “Àhítù gbɵ, ɓò ɥ tótó.” Àhímɛ́lɛ̀à pɵ, “Ma gàa nɛ̀, n dɛn.”

¹³ Sɔ́ɔ̀à pɵà lǝ̀, “Mǝ̀kǝ̀ ká mǝ n klɥ̀ɥi, ɓi kãã̀ Zɛ́sè gbɵ káɛ, ɥ́ blɛɛ̀ wãã̀ làà nuàlǝ̀, é ɓá Yàwɛ lɛ̀ɛ̀kpɔ́ kǝ àmɔ́ɔ̀wɔ̃̀ ká, yà wruù n gɔ̀ nyɛ̀ɛ̀ yà n gɔ̀ gbáɥ́ nɛ̀ zɛ̃ã ê ká gbɛ̃́ã̀ɛ̃̀ lɵ́e?”

¹⁴ Lɛ̀kɔ̀ɔɛ Àhímɛ́lɛ̀ yà pɵ kíŋ lǝ̀, “Dɵ é zòdɔ̀àmɛ̀ ká ɓa yuɔkǝmɛ̀nù sáálɵɛ son nɛ̀ɛ̀ Dèɓé lɵ́e, dɵ é kíŋ lú gɔ̃̀ ká, é nyákǝ̀ ɥ ɓà mɛ̀nù waa líésɥ́mɛ̀ ká, é ɓlɛ̀kpɔ́le lɵ́à ɓà ɥ píékeeè?

¹⁵ Gbɛ̃́ã̀ sróó nɛ̀ é má Yàwɛ lɛ̀ɛ̀kpɔ́ kǝ à mɔ́ɔ̀wɔ̃̀ ɓàà? Kpɛ́í! Kɵ́kǝ̀ kíŋ ɓɛɛ é pǝ gbɛɛ kǝ̀ yaa yuɔkǝmɛ̀a ĩ́ĩ́ n dǝ píékee mɛ̀nù ká. Ƃií ɓa yuɔkǝmɛ̀ yaá wɔ̃́ gbɛ dɔ nyɛ̀ɛ̀ gbã̀ wɔ̃́ nɛ̀ ɓà.”

¹⁶ Lɛ̀kɔ̀ɔɛ kíŋ ɓɛɛ ê pɵ, “Ч lò ga wɔ̃́dèká, Àhímɛ́lɛ̀, ɓi kãã̀ ɥ píékee mɛ̀nù sáálɵɛ ká.”

¹⁷ É kíŋ yà pɵ zòkǝ̀à píé mɛ̀nù wó kǝ̀ dɔàká wo gɛ̃̀ã̀ à zɥ̀tópíéɛ lǝ̀, “Kà liɛ̀ ká Yàwɛa sraɓo mɛ̀nù ɓɛ wo zǝ. Ƃií wodèe wo kɔ̀ è Dèɓé píé, é wó à dùàsɥ̀ gɥ́dɔ, é waá à biɛ̀ n lǝ̀.” Kǝǝ kíŋa yuɔkǝmɛ̀nù waá wo kɔ̀ pó wɔ̃̀ɔ̃̀ wrò Yàwɛa sraɓo mɛ̀nù là.

¹⁸ Lɛ̀kɔ̀ɔɛ kiŋ ɓɛɛ ê pɵ Dúɛ̀ lǝ̀, “Ƃò ló ɥ́ sraɓo mɛ̀nù ɓɛɛ wo zǝ.” Lɵɛ Ídɔ̀nmi Dúɛ̀ è wrò sraɓo mɛ̀nù ɓɛɛ wo là, é mɛ gɔ́ɔ̀ srɛ́àka ga sɔ́ɔ́lú (85) wó ífɔ̀ wô kǝ̀ lénéì sɔ káɛ dàɛ̀ zǝ yi ɓɛɛ ká.

¹⁹ É Sɔ́ɔ̀ yà kǝ̀ wó gɔ̃ɔ̃̀nù, lonnù, nɔ́ɔ̀sɛ̃́ɛ̃́nù, nǝ́bǝ́ǝ́nù, dùnù, sònù, ĩ́ĩ́ ɓlánù sáálɵ wó kǝ̀ Nɔ́ɔ̀ɛ̀ wo zǝ.

²⁰ Kǝǝ Àhítù gbɵ Àhímɛ́lɛ̀ gbɵ do wô lɛ̀ Ábìátàɛ̀ è dùà é lo Dèɓé píé.

²¹ Ábìátà yà bìɛ̀ Dèɓé lǝ̀ nɛ̀ɛ̀ Sɔ́ɔ̀ yà Yàwɛa sraɓo mɛ̀nù ɓɛɛ wo zǝ.

²² É Dèɓéà pɵ Ábìátà lǝ̀, “Lɛ̀ á Ídɔ̀nmi Dúɛ̀ ye má yi ɓɛ káɛ, aà gɥ́dɔ̀ nɛ̀ɛ̀ è lòà biɛ̀ Sɔ́ɔ̀ lǝ̀ gbɔ̀gbɔ̀lɵ. Ч dǝ píékee mɛ̀nù gawɔ̃̀ tósɥ̀mɥ̀ n ɓà.

²³ Ƃò tó n píé, kɵ́kǝ̀ ɥ́ sùò, ɓií mɛ é n nii mɛɛ̀làɛ̀ yeé ɥ nii mɛɛ̀là ɓǝ. Àyé ɓá tó n píéɛ ɥ gɔ̀ lò la.”