1 Sámìɔ̀ 18 - Aaɓi Kwì

¹ Lɛ̀ Dèɓé yà nyiɛ wɔ̃́biɛ̀sɥ̀à Sɔ́ɔ̀ píéɛ, Zɔ̀nátã̀ yà lɔ̀kǝ̀ Dèɓé ká dùò nɛ̀ɛ̀ zɛ̃ã ê lɔ̀kǝ̀a e dè káɛ lɵ́.

² É Sɔ́ɔ̀ yà sɥ yi ɓɛɛ ká, é yaá wéàɓà Dèɓé nyɛ̀ɛ̀ yíɛ́ e zɥ́ nyɛ̀ɛ̀ ló e dǝ píékee.

³ Lɛ̀kɔ̀ɔɛ Zɔ̀nátã̀ wãã̀ Dèɓé wóo wòdɔ wo kólǝ̀, ɓií yà lɔ̀kǝ̀a nɛ̀ɛ̀ e dè lɵ́.

⁴ É Zɔ̀nátã̀ è yaa gbàwíì ɓo e ɓà ê nu Dèɓé lǝ̀, wãã̀ yaa kózǝ sɔ̀, làà, saó, wãã̀ àɓà dɔ̀sɔlà ɓɥ̀ǝnù ká.

⁵ Yi sáálɵ é Sɔ́ɔ̀ è Dèɓé bɔá lɛ̀ɓàɛ̀, à kǝwɔ̃̀ è yèyíà kplàɓo, amɔ́ɔ̀wɔ̃̀ɓàɛ̀ Sɔ́ɔ̀ è Dèɓé kǝ̀ mɛvà ká kózǝmɛ̀nù làluo. Wɔ̃́ nɛ̀ è lì mɛsáálɵɛ lǝ̀ é lì Sɔ́ɔ̀a yuɔkǝmɛ̀nù lǝ̀ pɵ́.

Sɔ́ɔ̀ è dà dìɛ̀gɥ́ Dèɓé bũã̀

⁶ Lɛ̀ wó kǝ̀ nulɛ̀à wo plɵ̀ɵ̀, kǝ Dèɓé yà gó Félésã́ã̀ mi ɓɛ zǝlɛ̀àɛ̀, lonnù wò gò Ézrɛ̀ pɵ̀ vàvà sáálɵɛ gɥ́ tã́ɓosɥ̀ wãã̀ tã́kǝsɥ̀ ká, wó nu Sɔ́ɔ̀ gɔ̀ zɛ̃ã kpɛ̀kǝsɥ̀ ká, waà xlɥ́nù tã́ɓòapǝ̀ ɓáá nù zǝ̀.

⁷ Lonnù ɓɛɛ wó tã́ kpòle zùò wo kónù lǝ̀ wòa nɛ̀ɛ̀, “Sɔ́ɔ̀ yà mɛ vù plǝǝ̀zǝ̀ zǝ, kǝǝ Dèɓé yà mɛ vù gɔ́ɔ̀ plǝǝ̀zǝ̀ zǝ.”

⁸ Wɔ̃̂ nà Sɔ́ɔ̀ zòà dèèdè, wɔ̃́biɛ̀ wò ɓɛ yaá à zòkṹ. Ê pɵ, “Wà pɵ̀ Dèɓé yà mɛ vù gɔ́ɔ̀ plǝǝ̀zǝ̀ zǝ, kǝǝ mazǝ̀ má mɛ vù plǝǝ̀zǝ̀ wɛ́á zǝ. Yàkɔɔ́ɛ kǝ mǝ̀ wɛ́á é to gbɔ Dèɓé nyàà ye é yaâ kiŋsɛ̀ káɛ káɛ?”

⁹ Àmɔ́ɔ̀wɔ̃̀gɥ́ɛ Sɔ́ɔ̀ è dìɛ̀kǝ̀ Dèɓé ɓà, é mǝnkũ àɓà gó yi ɓɛ ɓà ɥ́ ló líéɛ ká.

¹⁰ À lɛ̀kpààɛ̀ zùù yaa è gò Aaɓi píé zálɵ é nu Sɔ́ɔ̀ là, yaà wè gáàgálɵ e píékee, lɛ̀ Dèɓéè kǝ̀ zìnò zǝ lɛ̀à nɛ̀zɛ̃ã ê kǝlàà ká yi sáálɵɛ káɛ lɵ́ɛ, Sɔ́ɔ̀a dɥ́ è kǝ̀à kwɛ.

¹¹ É Sɔ́ɔ̀ è yaa dɥ́ ɓɛ zùò Dèɓé píé, ɓií yà pɵ̀ e zòɔgɥ́ nɛ̀ɛ̀, “A lòà ta kɔ́bũã̀.” Kǝǝ Dèɓé èye lɛkã̀ à gɔ̀ kpolà pèètɛ.

¹² Sɔ́ɔ̀ è sùò Dèɓé lǝ̀ ɓií Yàwɛ é yà kɔ̀ Sɔ́ɔ̀ wɔ̃̀ãɛ è kǝ̀ Dèɓé píé.

¹³ Àmɔ́ɔ̀wɔ̃̀ Sɔ́ɔ̀ è Dèɓé bɔ̀ nyɛ̀ɛ̀ gó à pɛá, ê kǝ̀ líésɥ́mɛ̀ ká kózǝmɛ̀ vù do (1,000) làluo wãã̀nù waà lò grùpíé waà nù pɵɵ.

¹⁴ Kǝǝ yuɔ sáálɵ Dèɓé yàkǝ̀ɛ̀ è yèyíà, ɓií Yàwɛ ɓɛɛ è kǝ̀à píé.

¹⁵ Lɛ̀ Sɔ́ɔ̀ yà yeá nɛ̀ɛ̀ Dèɓé kǝwɔ̃̀ è kǝ̀ yelɛ̀à yíà teelɵɛ è sùò à lǝ̀ gbɔɔ dèèdè.

¹⁶ Kǝǝ Ézrɛ̀mɛ̀ sáálɵɛ wãã̀ Zúdà sɛ̀ wà lɔ̀kǝ̀ Dèɓé ká ɓií à kɔ̀ è zìè kplàɓo.

Dèɓé è Sɔ́ɔ̀ lú sɥ̀ e bɔú ká

¹⁷ À yi ɓɛ káɛ Sɔ́ɔ̀à pɵ Dèɓé lǝ̀, “N lú bìɛ̀zǝ̀ wô lɛ̀ Míràɛ̀ gà é nɛ̀, a lò à nu nyɛ̀ɛ̀ kǝ ɥ bɔú ká. Pǝ do â mɛ̀aɛ é tɔɔ ɥ zò è kǝ gbéè ɥ́n Yàwɛ ɓɛɛ àɓà kónù zǝ.” Ƃií Sɔ́ɔ̀ èye zòtà ê pɵ, “Kɵ́kǝ̀ n kɔ̀ è pàa, kǝǝ gó è ga Félésã́ã̀mɛ̀nù kɔ̀a.”

¹⁸ Lɛ̀kɔ̀ɔɛ Dèɓéà pɵ Sɔ́ɔ̀ lǝ̀, “Dɵmɥ̀ n káɛ, ĩ́ĩ́ mǝ̀ kǝ̀ nyià n dǝ píékee mɛ̀nù yî ɓo kpã̀ã̀zǝ̀ Ézrɛ̀ sɛ̀ gɥ́, á lóà kǝ kíŋ lú gɔ̃ ká ɓǝɛ̀?”

¹⁹ Kǝǝ lɛ̀ yi è wò kǝ wɔ̃̀ɔ̃̀ Mírà nu Dèɓé lǝ̀ɛ̀, wà nù Édrìà é go Mìhólà pɵ̀gɥ́ɛ lǝ̀.

²⁰ Sɔ́ɔ̀ lú Mákà ya lɔ̀kǝ̀ Dèɓé ká pɵ́, é wô bìɛ̀ Sɔ́ɔ̀ lǝ̀, wɔ̃́ ɓɛɛ é Sɔ́ɔ̀ grúlì dùò.

²¹ Sɔ́ɔ̀ èye zòtà ê pɵ, “Gó â nu à lǝ̀ nyɛ̀ɛ̀ kǝ vá ká àmɔ́ɔ̀wɔ̃̀ã̀, kǝ Félésã́ã̀mɛ̀nù kɔ̀ nyɛ̀ɛ̀ mɔ̀àɓà.” Ê mɔ́ɔ̀ à pɵɓo Dèɓé lǝ̀ zɥ́ kpolà pèètɛzǝ̀ ká nɛ̀ɛ̀, “Yi é nɛ̀ káɛ ɥ lò kǝ n lú gɔ̃ ká.”

²² É Sɔ́ɔ̀à pɵ yaa yuɔkǝmɛ̀nù lǝ̀, “Kà wɔ̃́biɛ̀ Dèɓé píé sróóká kâ pɵ, ‘Lɛ̀gà, kíŋ zòɔ grúliìmɥ̀ ɥ mɔ́ɔ̀wɔ̃̀gɥ́, é àɓà yuɔkǝmɛ̀ sáálɵɛ wô lɔ̀kǝ̀ ɥ ká pɵ́. Lɛ̀ é pɵ́ɛ ɓò wéàɓà ɥ́n kǝ kíŋ lú gɔ̃̀ ká.’”

²³ Zɛ̃ã ɓɛɛ wô bìɛ̀a Dèɓé lǝ̀, é Dèɓéà pɵ, “È ɓlɛ̀kpɔ́le và ká kǝ ã́ã̀ kǝ kíŋ lú gɔ̃̀ ká, è vàdùò mɛ yénzǝ̀ gɥ́gaɥ̀zǝ̀ é kǝ̀ nɛ̀ɛ̀ n lɵ́ɛ mɔ́ɔ̀wɔ̃̀ɓà.”

²⁴ Lɛ̀kɔ̀ɔɛ Sɔ́ɔ̀a yuɔkǝmɛ̀nù wó pǝ Dèɓé yà pɵɛ bìɛ̀ Sɔ́ɔ̀ lǝ̀.

²⁵ É Sɔ́ɔ̀à pɵ, “Kàà pɵ Dèɓé lǝ̀, ‘Kíŋ yaá mɛɛ̀ yɔ̀ nàò ká, kǝǝ Félésã́ã̀ gɔ̃ɔ̃̀nù kǝ̃̀ǝ̃ do líékwìɛ̀ kǝye, kǝ nyɛ̀ɛ̀ à gbɔ̀ɓo à dǝgbɵnù ɓà.’” Kǝǝ Sɔ́ɔ̀ yà srǝ́kã̀ pɵ́ kǝ Dèɓé nyɛ̀ɛ̀ ga Félésã́ã̀mɛ̀nù kɔ̀a.

²⁶ Kǝǝ lɛ̀ àɓà yuɔkǝmɛ̀nù wà wɔ̃́nù nɛ̀ biɛ̀ Dèɓé lǝ̀ɛ̀, yà zòkũ̀ dèèdè kǝ nyɛ̀ɛ̀ kǝ kíŋ lú gɔ̃̀ ká. Kǝ yi wô kpɔɛ nyɛ̀ɛ̀ kɔ̀ wòsɥ̀àɛ̀,

²⁷ Dèɓé wãã̀ yaa mɛnù wò wrùù lɛ̀àlíé lɛ̀tii gɥ́ wó lo wó Félésã́ã̀ gɔ̃ɔ̃̀nù kǝ̃̀ǝ̃ pèètɛ zǝ, é Dèɓé è nu wo líékwìnù ká ê lòno ê dɔ kiŋ kwɛ, kǝ nyɛ̀ɛ̀ kǝ kíŋ lú gɔ̃̀ ká. Lɛ̀kɔ̀ɔɛ Sɔ́ɔ̀ èye lú Mákà nuàlǝ̀ nyɛ̀ɛ̀ kǝ à bɔú ká.

²⁸ Kǝǝ lɛ̀ Sɔ́ɔ̀ yà gɥ́dɔ̀ gbɔɔ fɛ́fɛ́lɵ nɛ̀ɛ̀ Yàwɛ ɓɛɛ è kǝ̀ Dèɓé píé, ĩ́ĩ́ à lú Mákà yà lɔ̀kǝ̀aɛ,

²⁹ Sɔ́ɔ̀ è kǝ̀ súólɛ̀à Dèɓé lǝ̀ dèèdè, é Dèɓéè kǝ̀à dǝgbɵ ká kplàɓo.

³⁰ Kǝɓoɛ Félésã́ã̀ krúázǝ̀ wò nù kó ká kplàɓo, kǝǝ yi sáálɵ wó nuá kó káɛ Dèɓé kɔ̀ è zìè é zìèa Sɔ́ɔ̀a kózǝmɛ̀ yé wótoɛ làluo. Àmɔ́ɔ̀wɔ̃̀gɥ́ɛ à tɔ́ è ɓɔ̀ dèèdè.