Mazimuriyaa 97 - Geeshsha Mas'aafaa

S'oossay Ubbaappe Bolla

¹ Med'inaa Goday kawuteedda. Sa'aan de'iyaa Asay nashetto; haakko haatsaan dooddetto saan de'iyaa asatuukka nashetino.

² Shaariinne d'ip'p'i go d'umay Aa dooddeedda. S'illotetsaynne tumatetsay Aa kawutetsaa araataw baaso.

³ Tamay aappe sintsanna bee; Aa dooddeedda morkkatuwaa s'uuggee.

⁴ Aa walk'k'antsay sa'aa poo'issee; biittay hewaa be'iide kokkoree.

⁵ Med'inaa Godaa sintsan, sa'aa ubbaa Godaa sintsan wogga deretuu eessaa muk'aaddaadan muushiino.

⁶ Salotuu Aa s'illotetsaa awaayiino; asay ubbay Aa bonchchuwaa be'ee.

⁷ Worddo s'oossatoo goyinniyaawanttunne he go"enna eek'atuwaan c'eek'ettiyaawanttu ubbay yeellatino. S'oossatuu ubbay S'oossaw gulbbatino.

⁸ Abeet Med'inaa Godaw, S'iyoone asay, ne s'illo pirddaa sisiide nashettee; Yihudaa katamatuwaa asaykka hashshu gee.

⁹ Abeet Med'inaa Godaw, neeni sa'aa ubbaappe d'ok'k'aasa; s'oossatuwaa ubbaappe neeni d'ok'k'u gaasa.

¹⁰ Med'inaa Godaa siik'iyaawanttu iitaa is's'ite. I barew amanetiyaa asatuwaa shemppuwaa naagee; k'ay unttuntta iitatuwaa kushiyaappe ashshee.

¹¹ S'illotoo poo'uu poo'ee; wozanaa suuretoo nashechchay de'ee.

¹² Hinttenoo s'illotoo, Med'inaa Godaan nashettite; Aa geeshsha suntsaa galatite.