Mazimuriyaa 57 - Geeshsha Mas'aafaa

Maaduwaa Demanaw Shiik'eedda Woosaa

Zammaaretuwaa Kaappoo, Gonggolo giddoppe Saa'oolappe bak'atiide bi simmina Daawita Woosaa. «D'ayssoppa» Geetettiyaa Woosaan Yes'etteedda Woosaa.

¹ Taana maara; abeet S'oossaw, taana maara; taani neekko bak'atay. Bashshay aad'd'ana gakkanaw, ne k'efiyaa giddon bak'ataade attay.

² Taani Ubbaappe D'ok'k'iyaa S'oossaw, taw ubbabaa ootsiyaa S'oossaw waassay.

³ S'oossay saluwaappe maaduwaa kiittiide, taana ashshana; taana naak'k'iyaawantta kawushshana; S'oossay aggena bare siik'uwaanne bare tumatetsaa taw kiittana.

⁴ Taani ta morkkatuwaa giddon, asaa bonk'k'iide miyaa gaammuwaa malatuwaa giddon de'ay. Unttunttu achchay tooraanne wonddaafiyaa mala; unttunttu ins's'arssay kuussa mashshaa mala.

⁵ Abeet S'oossaw, neeni salotuwaappe bollaanna d'ok'k'u d'ok'k'u ga; ne bonchchuu sa'aa ubbaa bolla de'o.

⁶ Unttunttu ta gediyaw p'iriyaa wotseeddino; taani metootaade hokkaad. Unttunttu ta ogiyaan ollaa bookkeeddino; shin he ollaan barenttoo kunddeeddino.

⁷ Ta wozanay minniide de'ee; Abeet S'oossaw, ta wozanay minniide de'ee. Taani new yes's'ananne neena sabbana.

⁸ Ta shemppattee, beegotta! Diitsawunne maasink'k'oo, beegottite! Taanikka wontta guuraanna beegottana.

⁹ Abeet S'oossaw, taani neena asaa giddon galatana; k'ay kawutetsaa giddon neena sabbana.

¹⁰ Ayaw gooppe, aggena ne siik'uu wolk'k'aama; salotuwaa gakkeedda. Ne tumatetsaykka bolla shaariyaadan d'ok'k'ee.

¹¹ Abeet S'oossaw, salotuwaappe bollaanna d'ok'k'u d'ok'k'u ga! Ne bonchchuu sa'aa ubbaa bolla gido.