Mazimuriyaa 110 - Geeshsha Mas'aafaa

S'oossay Dooreedda Kaatiyaa Daawite s'aafeedda mazamuriyaa

¹ Med'inaa Goday ta Godaa, «Taani ne morkkatuwaa neeni gediyaan yed'd'a ek'k'iyaawaa ootsana gakkanaw, hawaan taappe ushechcha baggana utta» yaageedda.

² Med'inaa Goday ne minotetsaa s'am"aa S'iyooneppe kiittana; yaatina, «Ne morkkatuwaa moodda!» yaagana.

³ Neeni ne morkkatuwaanna olettiyaa gallassi, ne Asay eeno gaana. Wontta guura ketterssaadan, ne wodalla Asay neekko geeshsha deretuwaan shiik'ana.

⁴ Med'inaa Goday, «Malkka S'edek'i k'eesiyaa gideeddawaadan, neenikka med'inaw k'eesiyaa gidana» yaagiide c'aak'k'eedda; I bare k'ofaa laammenna.

⁵ Goday ne ushechchan de'ee; bare hank'k'uwaa gallassi I kaatetuwaa kinchchereetsana.

⁶ Kawutetsaa bolla I pirddana; olaa dembbatuwaakka anhaa s'alala ootsana; sa'aan ubbaan de'iyaa kaatetuwaa I mentsereetsana.

⁷ Kaatii ogiyaa matan de'iyaa haatsaa pulttuwaappe ushiide, I bare huup'iyaa d'ok'k'u ootsana.