Yohaannisa 15 - ጌሻ ማጻፋ

ዎይንያ ግያ ቱራዉ ቱሙ አኑ የሱሳ

¹ “ታን ዎይንያ ጌተትያ ቱራዉ ቱሙ አኖ፤ ጎሻንቻይ ታ አባ።

² ታ ግዶን ደእያ አይፍያ አይፈና ቱራ ማራ ኡባ እ ካሬ፤ አይፍያ ቱራ ማራ ኡባይ ካሰዋፐ ሎይ አይፋናዳን፥ ሄ ማራ ጼራ እ ጭጊደ ጌሻና።

³ ታን ህንተንቶ ሀእ ኦዴዳ ቃላ ጋሱዋን፥ ህንተንቱ ጌሻ።

⁴ ታ ግዶን ደእተ፤ ታንካ ህንተንቱ ግዶን ደአና። ዎይንያ ቱራ ማራይ አኑዋና እትፐ ደኤናን ዮፐ፥ ሄ ማራይ ባረካ አይፍያ አይፋናዉ ዳንዳየናዋዳን፥ ህንተንቱካ ታ ግዶን ደኤናን ዮፐ፥ አይፍያ አይፋናዉ ዳንዳይክታ።

⁵ “ታን ዎይንያ ቱራዉ አኖ፤ ህንተንቱ ሄ ቱራ ማራቱዋ። ታ ግዶን ደእያ ኡራይ፥ ታንካ አ ግዶን ደእያ ኡራይ፥ ዳሮ አይፍያ አይፋና፤ አያዉ ጎፐ፥ ታን ባይናን ህንተረካ አይነ ኦናዉ ዳንዳይክታ።

⁶ ታ ግዶን ደኤና ኡራይ ቱራ ማራዳን፥ ካረን የግና መሌዳዋ ሺሺደ ታማን ዎና፥ እ ኤጻናዋ።

⁷ ህንተንቱ ታ ግዶን ደኦፐ፥ ቃይ ታ ቃላይካ ህንተንቱ ግዶን ደኦፐ፥ ህንተንቱ ኮዬዳዋ አያ ግድናካ ዎስተ፤ ህንተንቱ አካንታ።

⁸ ህንተንቱ ዳሮ አይፍያ አይፎፐነ ቃይ ታና ካልያዋንታ ግዶፐ፥ ሄዋን ታ አቡ ቦንቼታናዋ።

⁹ አዉ ታና ሲቄዳዋዳን፥ ታንካ ህንተንታ ሲቃድ፤ ታ ሲቁዋን ደእተ።

¹⁰ ታን ታ አቡ አዛዙዋ ናጋደ አ ሲቁዋን ደኤዳዋዳን፥ ህንተንቱካ ታ አዛዙዋ ናጎፐ፥ ታ ሲቁዋን ደአንታ።

¹¹ “ታ ናሸቻይ ህንተናና ደአና ማላነ፥ ህንተንቱ ናሸቻይ ኩመን ግዳና ማላ፥ ታን ሀዋ ህንተንቶ ኦዳድ።

¹² ታ አዛዙ ሀዋ፤ ታን ህንተንታ ሲቅያዋዳን፥ ህንተንቱካ እቱ እቱዋና ሲቀትተ።

¹³ ባረ ሸምፑዋ ባረ ላገዉ አደ እምያዋፐ አያ ሲቁ ኦስነካ ባዋ።

¹⁴ ታን ህንተንታ አዛዜዳዋ ኡባ ኦፐ፥ ህንተንቱ ታ ላገቱዋ።

¹⁵ “አይሊ ባረ ጎዳይ ኦያዋ ኤረና ድራዉ፥ ታን ህንተንታ ሀዋፐ ስንዉ አይላቱዋ ጊከ፤ ሽን ታን ህንተንታ ታ ላገቱዋ ጋድ። አያዉ ጎፐ፥ ታ አዉዋፐ ስሴዳ ኡባባ ታን ህንተንቶ ኦዳድ።

¹⁶ ታን ህንተንታ ዶሬዳዋፐ አትን፥ ህንተንቱ ታና ዶርበይክታ። ህንተንቱ ቢደ አይፍያ አይፋና ማላነ ደአና ማላ፥ ታን ህንተንታ ሱንድ። ቃይ አዉካ ህንተንቱ ታ ሱንን ዎሴዳዋ ኡባ እማና።

¹⁷ ታን ህንተንታ አዛዝያዌ ሀዋ፤ እቱ እቱዋና ሲቀትተ።

የሱስ ሀ አላሚ እጽያዋ ኦዴዳ

¹⁸ “አላሚ ህንተንታ እጾፐ፥ ካሰቲደ ታና እጼዳዋ አኬክተ።

¹⁹ ህንተንቱ አላምያሳ ግዴደንቶ፥ አላሚ ባረዋዳን ህንተንታ ሲቃና፤ ሽን ታን ህንተንታ አላምያፐ ዶሬዳዋፐ አትን፥ ህንተንቱ አላምያሳ ግድክታ፤ አላሚ ህንተንታ እጽያዌ ሀዋሳ።

²⁰ ‘አይሊ ባረ ጎዳፐ ዳረና’ ጋደ ታን ህንተንቶ ኦዴዳዋ ሀሳይተ። ኡንቱንቱ ታና የደርሴዳዋ ግዶፐ፥ ህንተናካ የደርሳና። ኡንቱንቱ ታ ቃላ ናጌዳዋ ግዶፐ፥ ህንተንቱ ቃላካ ናጋናዋንታ።

²¹ ሽን ኡንቱንቱ ታና ኪቴዳዋ ኤረና ድራዉ፥ ሀ ኡባ ታ ጋሱዋን ኡንቱንቱ ህንተንቱ ቦላ ኦናዋንታ።

²² ታን ያደ ኡንቱንቶ ኦደናዋ ግድንቶ፥ ኡንቱንቶ ናጋራ ግደና፤ ሽን ሀእ ኡንቱንቱ ኦያ ናጋራ ጋሶይያዌ ባዋ።

^23-24 ታና እጽያዌ ታ አዉዋካ እጼዳ። ኦንነ ኦቤና ኦሱዋ ኡንቱንቱ ግዶን ታን ኦቤናባ ግድንቶ፥ ኡንቱንቶ ናጋራ ግደናን አታናዋ፤ ሽን ሀእ ኡንቱንቱ ታን ኦዳ ኦሱዋ በኢደ፥ ታናካ ታ አዉዋካ እጼድኖ።

²⁵ ሽን ኡንቱንቱ ህግያን፥ ‘ታና ጮ እጼድኖ’ ጌተቲደ ጻፈቴዳዌ ፖለታና ማላ፥ ሀዌ ሀኔዳ።

²⁶ “ሽን አዉዋፐ ይያ ቱማተ አያናይ መንያዌ ያናዋ። ታን አዉዋፐ ህንተንቶ አ የዳና፤ ቃይ እ ታባ ማርካታናዋ።

²⁷ ህንተካ ቃይ ካሰፐ ዶሚደ፥ ታናና ደእያ ድራዉ፥ ታባ ማርካታና።