Wogaa 8 - ጌሻ ማጻፋ

አሮነነ አ ናናቱ ቄስያ ግድያ ዎጋነ ኡንቱንቱ ኦሱዋ

¹ መና ጎዳይ ሙሴዉ ሀዋዳን ያጊደ ኦዴዳ፤

² “አሮናነ አ አቱማ ናናቱዋ ቃይ ኡንቱንቱና እትፐ፥ ቄሳተ ማዩዋ፥ ኦክያ ዛይትያ፥ ናጋራ ያርሾ ሹክያ ኮሩማ፥ ላኡ ዶርሳ ኦርገቱዋነ፥ እርሹዋ የገናን ኡኬዳ ኡክ ዎዳ ማሶፍያ አካደ ያ።

³ ቃይ እስራኤልያ አሳ ኡባካ ጼሳደ፥ ዱንካንያ ካረ ሺሻ” ያጌዳ።

⁴ ሙሴ መና ጎዳይ አዛዜዳዋዳን ኦዳ፤ አሳይካ ኡባይ ዱንካንያ ካረን ሺቄዳ።

⁵ ሙሴ አሳዉ፥ “ኦና ማላ መና ጎዳይ አዛዜዳዌ ሀዋ” ያጌዳ።

⁶ ሙሴ አሮናነ አ አቱማ ናናቱዋ አሂደ፥ ሃን ሜጬዳ።

⁷ አሮና ቃምሽያ ማይዜዳ፤ ዳንጩዋካ ዳንጭሴዳ። ቃይ አዱሳ ቃምሽያ ማይዚደ፥ አ ቦላን ኤፉድያ ማይዜዳ። ኤፉድያ ሂላቲደ ዳዴዳ ሳቂያን አሮናና ጋደ ቃቼዳ።

⁸ ቃይ ትራን ዎያዋ አሮና ቦላን አደ፥ አ ግዶን ኡሪምያነ ቱሚምያ ዎዳ።

⁹ ቃይካ አሮና ሁጲያን ሻሽያ ኤንጩርሳ ዎዳ። መና ጎዳይ ሙሳ አዛዜዳዋዳን ሄ ኤንጩርሳ ቦላን ስን ባጋና ዎርቃ ማዳልያ፥ ዎርቃፐ መዳ ካላቻ ምስልያ ዎዳ።

¹⁰ ያቶዋፐ ጉይያን ሙሴ ኦክያ ዛይትያ አኪደ፥ ዱንካንያነ ዱንካንያ ግዶን ደእያ ሚሻ ኡባ ኦኬዳ፤ ኡንቱንታ ጌሼዳ።

¹¹ ቃይ ሄ ዛይትያፐ አኪደ፥ ያርሽያ ሳኣ ቦላ ላፑ ገደ ጫጫፌዳ፤ ያርሽያ ሳኣ፥ አ ሚሻቱዋ፥ ሜቻ ከርያነ አ ዎያዋ፥ ጌሻናዉ ሄ ዛይትያን ኦኬዳ።

¹² ቃይ ሄ ኦክያ ዛይትያፐ አማራ አሮና ሁጲያን ትጊደ፥ አ ጌሼዳ።

¹³ መና ጎዳይ ሙሳ አዛዜዳዋዳን፥ ሙሴ አሮና አቱማ ናናቱዋ ስንዉ አደ፥ ቃምሽያ ማይዜዳ፤ ዳንጩዋን ዳንጭሴዳ። ኡንቱንቱ ሻሽያ ኤንጩርሳ ዎዳ።

¹⁴ ሄዋፐ ጉይያን፥ ናጋራ ያርሾ ኮሩማ ሙሴ አዳ፤ አሮንነ አ አቱማ ናናይ ሄ ኮሩማ ሁጲያን ባረንቱ ኩሽያ ዎድኖ።

¹⁵ ሙሴ ሄ ኮሩማ ሹኬዳ፤ አ ሱፐ ባረ ብራያን አኪደ፥ ያርሽያ ሳኣ ካጨቱዋ ኦኪደ፥ ያርሽያ ሳኣ ጌሼዳ፤ ቃይ ያርሽያ ሳኣ ናጋራ አቶ ጊሳናዉ አቴዳ ሱ አፐ ጋርሳና ጉሲደ፥ ጾሳዉ ጌሼዳ።

¹⁶ ቃን አሹዋ ካሜዳ ሀንዳ ኡባ፥ ትርያ ጼራ ቦላ ደእያ ሞያ፥ ላኡ ክላሆቱዋነ ኡንቱንታ ካሜዳ ሀንዳ አኪደ፥ ሙሴ ያርሽያ ሳኣ ቦላን ዎደ ጹጌዳ።

¹⁷ ሽን መና ጎዳይ ሙሳ አዛዜዳዋዳን፥ ጋልባ፥ ኮሩማፐ አቴዳዋነ ቶጭያ ዱንካኔዳ ሳኣፐ ጋጻ ከሲደ፥ ታማን ጹጌዳ።

¹⁸ ያት ስሚደ ሙሴ ጹግያ ያርሾ ሀንያ ዶርሳ ኦርግያ አሄዳ፤ አሮንነ አ አቱማ ናናይ ሄ ዶርሳ ኦርግያ ሁጲያን ባረንቱ ኩሽያ ዎድኖ።

¹⁹ ሙሴ ሄ ዶርሳ ኦርግያ ሹኬዳ፤ አ ሱ ያርሽያ ሳኣ ምይያ ኡባን ጉሴዳ።

²⁰ ቃይ ዶርሳ ኦርግያ አሹዋካ አ ቆሙዋን ቆሙዋን ቃንጼዳ፤ ቃንጸ፥ ሁጲያነ ሞያ ያርሽያ ሳኣ ቦላ ዎደ ሙሴ ጹጌዳ።

²¹ ቃን አሹዋነ ገደቱዋ ሃን ሜጮዋፐ ጉይያን፥ ዶርሳ ኡባና መና ጎዳዉ ታማን ጹግያ፥ ሳዉዋ ቶሹኩ ግያ ያርሹዋ ኦደ፥ መና ጎዳይ ሙሳ አዛዜዳዋዳን ያርሽያ ሳኣ ቦላን ዎደ ጹጌዳ።

²² ሄዋፐ ጉይያን፥ ቄሰተዉ ኦከትያ ዎደ ሺሽያ ላኤን ዶርሳ ሙሴ አሄዳ፤ አሮንነ አ አቱማ ናናይ ሄ ዶርሳ ሁጲያን ባረንቱ ኩሽያ ዎድኖ።

²³ ሙሴ ሄ ዶርሳ ሹኬዳ፤ አ ሱፐ አኪደ፥ አሮናዉ ኡሸቻ ሀይ ጼራ፥ ኡሸቻ ኩሽያ ዎጋ ብራያነ፥ ኡሸቻ ገድያ ዎጋ ብራያ ኦኬዳ።

²⁴ ቃይ ሙሴ አሮና አቱማ ናናቱዋካ ስንዉ አሂደ፥ ሄ ሱፐ አኪደ፥ ኡንቱንቱ ኡሸቻ ሀይ ጼራ፥ ኡንቱንቱ ኡሸቻ ኩሽያ ዎጋ ብራያነ ኡንቱንቱ ኡሸቻ ገድያ ዎጋ ብራያ ኦኬዳ። ሄዋፐ ጉይያን፥ ሙሴ አቴዳ ሱ ያርሽያ ሳኣ ምይያ ኡባን ጉሴዳ።

²⁵ ያቲደ ሞዋ፥ ናስያ፥ ቃን አሹዋ ማዬዳ ሞያ፥ ትርያ ጼራ ቦላ ደእያ ሞያ፥ ላኡ ክላሆቱዋነ ኡንቱንታ ማዬዳ ሀንዳነ ኡሸቻ ገድያ አኬዳ።

²⁶ ቃይ እርሹዋ የገናን ኡኬዳ ኡክ ዎያ መና ጎዳ ስንን ደእያ ማሶፍያፐ እት ኮምፑዋ፥ ዛይትያና ኡኬዳ እት ኡክነ እት ሌኦ ኡክ አኪደ፥ ሀዋንታ ሞያ ቦላንነ ኡሸቻ ገድያ ቦላን ዎዳ።

²⁷ እ ሀ ቁማ ኡባ አሮና ኩሽያንነ አ አቱማ ናናቱዋ ኩሽያን ዎዳ፤ ኡንቱንቱ መና ጎዳ ስንን ቃያ ያርሹዋ ኦደ ቃድኖ።

²⁸ ሄዋፐ ጉይያን፥ ሙሴ ሄ ቁማ ኡንቱንቱ ኩሽያፐ አክ፥ ጹግያ ያርሹዋና ጋደ፥ ቄሰተዉ ኦከትያ ዎደ መና ጎዳዉ ታማን ጹጊደ ሺሽያ፥ ሳዉዋ ቶሹኩ ግያ ያርሹዋዳን፥ ያርሽያ ሳኣ ቦላን ዎደ ጹጌዳ።

²⁹ ቃይ ሙሴ አንጎሱዋ አኪደ፥ ቃያ ያርሹዋ ኦደ መና ጎዳ ስንን ቃዳ፤ መና ጎዳይ ሙሳ አዛዜዳዋዳን፥ ቄሳተዉ ኦከትያ ዎደ ያርሽያ ዶርሳ ኦርግያ አሹዋፐ ሄዌ ሙሳ ጋክያ አ ግሹዋ።

³⁰ ሙሴ ኦክያ ዛይትያፐነ ያርሽያ ሳኣ ቦላን ደእያ ሱፐ አኪደ፥ አሮና ቦላነ አ ማዩዋ ቦላ፥ ቃይ አ አቱማ ናናቱዋ ቦላነ፥ ኡንቱንቱ ማዩዋ ቦላካ ጫጫፌዳ፤ ያቲደ አሮናነ አ ማዩዋ ቃይ አ ናናቱዋነ አ ናናቱዋ ማዩዋካ ጌሼዳ።

³¹ ሙሴ አሮናነ አ አቱማ ናናቱዋ ሀዋዳን ያጌዳ፤ “አሹዋ ጋከትያ ዱንካንያ ካረን ዶይስተ፤ ‘አሮንነ አ ናናይ ሄዋ ሚኖ’ ያጋደ ታን አዛዜዳዋዳን፥ ቄሳተዉ ኦከትያ ዎደ ሺሽያ ያርሹዋ ዎያ ማሶፍያ ግዶን ደእያ ያርሹዋ ኡክና ሄዋን ሚተ።

³² ሄ አሹዋፐነ ኡክፐ ፓላሄዳዌ ደኦፐ ታማን ጹግተ።

³³ ቄሳተዉ ኦክያ ዎጋይ ላፑን ጋላሳ አክያ ድራዉ፥ ሄ ህንተ ቄሳተዉ ኦከትያ ላፑን ጋላሳይ ዉራናዉ፥ ዱንካንያ ፐንገፐ ካረ ከሶፕተ።

³⁴ ሀ ሀች ኦሰቴዳዌ መና ጎዳይ አዛዝና፥ ህንተ ናጋራ አቶ ጊሳናዉ ኦሰቴዳ።

³⁵ ዱንካንያ ፐንግያን ላፑን ጋላሳ ኩመን ጋላስነ ቃማነ ታክተ፤ መና ጎዳ ዎጋካ ናግተ፤ እጾፐ ህንተ ሀይቃና። ታና መና ጎዳይ አዛዜዳዌ ሀዋ” ያጌዳ።

³⁶ አሮንነ አ ናናይ መና ጎዳይ ሙሴ ባጋና አዛዜዳዋ ኡባ ኦድኖ።