Wogaa 26 - ጌሻ ማጻፋ

አዛዘትና ቤትያ አንጁዋ

¹ መና ጎዳይ ሀዋዳን ያጌ፤ “ህንተ ኡንቱንቶ ጎይናናዉ ኤቃቱዋ መፕተ፤ ቃይ ሀዉልትያ፥ ማሰቴዳ ምስልያ ዎይ ማሰቴዳ ሹቻ ኤሶፕተ። ታን፥ መና ጎዳይ፥ ህንተ ጾሳ።

² ታ ሳምባታቱዋ ናግተ፤ ታ ዱንካንያ ቦንችተ፤ ታን መና ጎዳ።

³ “ህንተ ታ ህግያን ቦፐ፥ ታ አዛዞቱዋካ ናጎፐነ ኦፐ፥

⁴ ታን ህንተንቶ እራ ዎድያን ቡክሳና፤ ቢታይካ ካ ዳርሲደ ሞካና፤ ደምባ ምቱካ አይፍያ አይፋና።

⁵ ህንተ ካ ቡክያ ዎድያፐ ቢደ ዎይንያ አይፍያ ማጽያ ዎዲ ጋካናዉ ካ ቆጻና፤ ቃይ ዎይንያ አይፍያ ማጹካ ቢደ ካ ዘርያ ዎዲ ጋካናዉ ዉረና። ህንተ ካላና ጋካናዉ ቁማ ማና፤ ቃይ ህንተ ህንተ ቢታንካ ሳሩዋን ደአና።

⁶ “ታን ቢታዉ ሳሮተ እማና፤ ኦንነ ያሽሰናን ህንተ ግሳና። ኢታ ዶአቱዋ ታን ጋድያፐ ይሳና፤ ህንተ ጋድያን ላኤን ኦላይ ደንደና።

⁷ ህንተ ሞርከቱዋ ህንተ የደርሳና፤ ህንተ ስንን ኡንቱንቱ ማሻን ሀይቃና።

⁸ ህንተፐ እቼሹ ጼቱዋ የደርሳና፤ ቃይ ጼቱ ታሙ ሻኣ የደርሳና። ህንተ ሞርከቱ ህንተ ስንን ማሻን ሀይቃና።

⁹ “ታን ታ ዴሙዋ ህንተኮ ዛራና፤ ህንተና አይፍሳና፤ ህንተና ዳርሳና። ቃይ ታን ታ ጫቁዋ ህንተናና ምንሳና።

¹⁰ ህንተ ሻቻ ካ ማና፤ ቃይ ሀ ላይ ካ ዎናዉ፥ ሻቻ ካ ድጊደ ሳኣ ከሳና።

¹¹ ታን ታ ደእያ ሳኣ ህንተ ግዶን ኦና፤ ታን ህንተና ሻትከ።

¹² ታን ህንተ ግዱዋን ሀመታና፤ ቃይ ህንተ ጾሳ ግዳና፤ ህንተካ ታ አሳ ግዳንታ።

¹³ ህንተ ግብጼቶ አይልያ ግደናዳን፥ ግብጼ ጋድያፐ ህንተና ከሴዳዌ ታን መና ጎዳይ ህንተ ጾሳ። ታን ህንተ አይለተ ሞርገ ም መንድ፤ ቃይ ህንተካ ቁ ጊደ ሄመታናዳን ኦድ።

አዛዘተናን እጽና ጋክያ ሙራ

¹⁴ “ሽን ህንተ ታን ግያዋ ስሰናን እጾፐነ፥ ሀ አዛዞቱዋ ኡባካ ኦናን እጾፐ፥

¹⁵ ታ ዎጋ ህንተ ካኦፐ፥ ቃይ ታ አዛዞቱዋ ኡባ ኦናን እጺደ ታ ጫቁዋ መንናዉ ህንተ ታ ህግያ ሻቶፐ፥

¹⁶ ሄ ዎደ ታን ህንተ ቦላ ሀዋ ኦና: ህንተ አኬከናን ደእሽን ያሻ፥ ግልቃተ፥ ህንተ አይፍያ ጆልስያነ ህንተና ሎይ ሀርግስያ ምሹዋ ህንተ ቦላ አሀና። ህንተ ዘረ ዘራና፤ ሽን እ ሀዳ፤ አያዉ ጎፐ፥ ሄዋ ህንተ ሞርከቱ ማና።

¹⁷ ታን ታ ሶምኡዋ ህንተ ቦላ ቱካና፤ ህንተ ሞርከቱዋ ስንን ህንተ ኩንዳና፤ ህንተና እጺያዋንቱ ህንተና ሞዳና፤ ቃይ ኦንነ የደርሰናን ህንተ ባቃታና።

¹⁸ “ሀዋ ኡባ ኦናካ ህንተ ታና ስሰናን እጾፐ፥ ታን ህንተ ናጋራ ድራዉ ህንተ ሙራ ላፑን ዳኩዋ ጉጃና።

¹⁹ ህንተ ዎልቃ ኦቶሩዋ ታን መንና፤ ሳሉዋ ብራታ ማላ ኦና፤ ህንተ ቢታካ ናሃስያ ግያ ብራታ ማላ ኦና።

²⁰ ህንተ ዎልቃይ ሀዳሳን ዉራና፤ አያዉ ጎፐ፥ ህንተ ቢታይ ካ ሞከና፤ ጋድያን ደእያ ምቱካ አይፍያ አይፍክኖ።

²¹ “ህንተ ታዉ እጼዶ ጎፐነ ታን ግያዋካ ስሰናን እጾፐ፥ ህንተ ናጋራ ኬሻ ላፑን ዳኩዋ ቦሻ ታን ህንተ ቦላን አሀና።

²² ታን ህንተ ቦላ ባዙዋ ዶአቱዋ የዳና፤ ኡንቱንቱ ህንተ ናናቱዋ ቦንቃና፤ ህንተ መሄቱዋ ይሳና፤ ህንተ ፓይዱዋካ ጉና፤ ሄዋ ጋሱዋን ህንተ ሀመትያ ኦጊ ባዙዋ ግዳናዋ።

²³ “ሀ ኡባ ሙራንካ ህንተ ታኮ ስመናን እጻድ ጊደ ቦፐ፥

²⁴ ሄ ዎደ ታንካ ህንተንቶ እጻድ ጋና፤ ቃይ ህንተ ናጋራ ድራዉ ታን ታ ሁጲያዉ ህንተና ላፑን ዳኩዋ ሙራና።

²⁵ ታ ጫቁዋ መንዳ ሀሉዋ ከስያ ማሻ ታን ህንተ ቦላ አሀና፤ ህንተ ህንተ ካታማቱዋን ሺቆፐካ፥ ታን ህንተ ቦላን ኢታ ሀርግያ የዳና። ቃይ ህንተካ ህንተ ሞርከቱዋ ኩሽያን አደ እመታና።

²⁶ ህንተ ካ ታን ይስያ ዎደ፥ ታሙ ማጫ አሳቱ እት ባሽያን ኡክ ኡካና፤ ሄዋካ ሚዛናን ልኪደ ሻካና፤ ህንተ ሄዋ ማና፥ ሽን ካልክታ።

²⁷ “ሀ ኡባንካ ህንተ ታን ግያዋ ስሰናን እጻድ ጊደ ቦፐ፥

²⁸ ሄ ዎደ ታንካ ህንተ ቦላ ሀንቁዋን ደንዳና፤ ህንተ ናጋራ ድራዉ ታን ታ ሁጲያዉ ህንተና ላፑን ዳኩዋ ሙራን።

²⁹ ህንተ ህንተ አቱማ ናናቱዋነ ህንተ ማጫ ናናቱዋ አሹዋ ማና።

³⁰ ህንተ ጎይንያ ቃ ሳኣ ታን ኮላና፤ ህንተ እጻና ያርሽያ ሳኣካ ይሳና። ታን ህንተ አሃ ህንተ ኤቃቱዋ አሃ ቦላን ኦላና፤ ታን ህንተና ሙለ ሻታና።

³¹ ታን ህንተ ካታማቱዋ መላ ኦና፤ ህንተ ጎይንያ ሳአቱዋካ ኮለሬና፤ ህንተ ሳዊያ ያርሹዋካ ስንግከ።

³² “ታን ህንተ ቢታ ይሳና፤ ያቶፐ ሄ ህንተ ጋድያን ዪደ ኡትያ ሞርከቱካ ሄዋን ማላለታና።

³³ ታን ህንተና ካዉተቱዋ ግዶን ላላና፤ ህንተ ቦላንካ ታ ማሻ ሾዳና። ህንተ ቢታይ ባያና፤ ህንተ ካታማቱካ መላ ግዳና።

³⁴ ሄ ህንተ ህንተ ሞርከቱዋ ጋድያን ደእያ ዎደ፥ ባዪደ ጮ ደእያ ህንተ ቢታይ ባረ ሳምባታቱዋ ቦንቺደ ናሸታና። ሄ ዎደ ህንተ ቢታይ ሸምፓናነ ባረ ሳምባታቱዋ ቦንቺደ ናሸታና።

³⁵ ህንተ ሄ ጋድያን ደኤዳ ዎድያን ኡባን ህንተ ሳምባታቱዋን ደምቤና ሸምፑዋ ሀእ ባዪደ ጮ ደእያ ዎድያን ደማና።

³⁶ “ህንተ ህንተ ሞርከቱዋ ጋድያን ደእያ ዎደ፥ ህንተፐ ሻከቲደ ጉየ አቲደ ደእያዋንቱ ዎዛናን ታን ያሻ የዳና፤ ጫርኩ ቃያ ቦንጭያ ኮሻይ ኡንቱንታ ሻቢራና፤ ኡንቱንቱ ማሻፐ ባቃትያዋዳን ባቃታና፤ ቃይ ኡንቱንቱ ኦንነ የደርሰናን ኩንዳና።

³⁷ ህንተና የደርስያዌ ባይናን ደእሽን፥ ህንተ ኦላፐ ባቃትያዋዳን እቱ እቱዋና በታና፤ ቃይ ህንተ ህንተ ሞርከቱዋ ስንን ኤቃናዉካ ህንተንቶ አያ ዎልቂነ ደኤና።

³⁸ ህንተ ካዉተቱዋ ግዶን ባያና፤ ህንተ ሞርከቱዋ ቢታይካ ህንተና ምታና።

³⁹ ህንተፐ ሻከቲደ ህንተ ሞርከቱዋ ጋድያን አቴዳዋንቱ ባረንቱ ናጋራ ጋሱዋንነ ባረንቱ አዎቱዋ ናጋራ ጋሱዋን ግልቃና።

⁴⁰ “ሽን ኡንቱንቱ ታን ኡንቱንቶ እጼዳ ጋናዳንነ ኡንቱንቱ ሞርከቱዋ ቢታዉ ኡንቱንታ የዳናዳን ኦዳ ባረንቱ ናጋራ፥ ባረንቱ ማይዛ አዎቱዋ ናጋራ፥ ኡንቱንቱ ታና ጭሜዳ ጭሙዋነ ኡንቱንቱ ታዉ እጻድ ጌዳዋ ፓጾፐ፥

⁴¹ ሄዋን ቃይ ኡንቱንቱ አዛዘተና ዎዛናይካ ዝቂ ጎፐነ ኡንቱንቱ ባረንቱ ናጋራ ሙራ አኮፐ፥

⁴² ሄ ዎደ ታን ያቆባና ጫቀቴዳ ታ ጫቁዋ ሀሳያና፤ ቃይ ይሳቃናነ አብራሃመና ጫቀቴዳ ታ ጫቁዋ ሀሳያና፤ ቢታካ ሀሳያና።

⁴³ ኡንቱንቱ ይ ድግና፥ ኡንቱንቱ ቢታይ መላ አታና፤ ሄ ኡንቱንቱ ይና ባይያዋ ግዲደ ጮ ደእያ ዎድያን ቢታይ ባረ ሳምባታቱዋ ቦንቺደ ናሸታና። ኡንቱንቱ ታ አዛዙዋ ካዳ ድራዉነ ኡንቱንቱ ሸምፑካ ታ ዎጋ ሻቴዳ ድራዉ፥ ኡንቱንቱ ባረንቱ ናጋራ ሙራ አካና።

⁴⁴ “ግዶፐነ ኡንቱንቱ ባረንቱ ሞርከቱዋ ጋድያን ደእያ ዎደ፥ ኡንቱንቱ ኡባና ያና ጋካናዉነ ኡንቱንቱና ደእያ ታ ጫቁዋካ መንና ጋካናዉ፥ ታን ኡንቱንታ ኦልከ፤ ቃይ ሻትከ። ታን፥ መና ጎዳይ፥ ኡንቱንቱ ጾሳ።

⁴⁵ ታን ኡንቱንቱ ጾሳ ግዳናዉ፥ ካዉተቱ ጼልሽን፥ ግብጼ ጋድያፐ ከሴዳ ኡንቱንቱ ማይዛ አዎቱዋና ታን ጫቀቴዳ ጫቁዋ ኡንቱንቱ ድራዉ ሀሳያና። ታን መና ጎዳ።

⁴⁶ “መና ጎዳይ ሲና ደርያ ቦላን ሙሴ ባጋና ባረፐነ እስራኤልያ አሳፐ ግዱዋን ዎዳ ዎጋቱ፥ አዛዞቱነ ህገቱ ሀዋንታ” ያጌዳ።