Sofonaasa 3 - ጌሻ ማጻፋ

ይሁዳይነ ሀራ አሳቱ ጎዳኮ ስሙሳ

¹ ማካላንቻትዉ፥ ቱኔዳንዉነ ባረ አሳ ቱጋዬዳ የሩሳላመ ካታማትዉ አየ አና!

² እዛ ኦናነ ስሱኩ፤ ሴርና ስሙኩ፤ መና ጎዳን አማነቱኩ፤ ባረ ጾሳኮካ ሺቁኩ።

³ እዝ ግዶን ደእያ ካፓቱ ጉድያ ጋሞቱዋ ማላ፤ ዳናቱካ ዎንትዉ አሸናን ደሜዳዋ ኡባ ዉርስ ም ድግያ ኦማርሳ ዋንግሬሎቱዋ ማላ።

⁴ እዝን ናባቱ ኦቶራንቻነ ገናንቻ። እዝ ቄሳቱ ካ ጌሻባ ቱንስያዋንታ፤ ቃይ ኡንቱንቱ ጾሳ ህግያ ባረንቶ እንጀትያዋዳን፥ ምርቂደ ብሊኖ።

⁵ ሽን እዝ ግዶን ደእያ መና ጎዳይ ጽሉዋ፤ እ ባላባ ኦና፤ ዎንትና ዎንትናካ እ ባረ ጽሎ ፕርዳ ፕርዴ፤ አይ ዎንታንካ አግ ኤረና። ግዶፐነ፥ እዝን ደእያ ማካላንቻይ አይነ ዬላ ኤረና።

⁶ ጾሳይ ሀዋዳን ያጌ፤ “ታን ካዉተቱዋ ይሳድ፤ ኡንቱንቱ ግምበቴዳ ሳአቱካ ኮለት ክቼድኖ። ኡንቱንቱ ካታማቱዋ እት አሳይነ ደኤና ኦና ቢታ ኦድ፤ ኦገቱካ ኦንነ ሄዋና አናዋ ግዴድኖ።

⁷ ታን ሀዋ ኡባ የሩሳላመዉ ኦደ፥ ‘ስም ታ አሳይ ታና ቦንቻና፤ ታን ሴርያ ሴራካ አካና፤ ታን አዛዜዳዋካ ዶገና’ ያጋድ። ሽን ኡንቱንቱ ካሰዋፐካ ያ ያ ባረንቱ ኦሱዋን ቱኒደ ቤድኖ” ያጌ።

⁸ መና ጎዳይ ሀዋዳን ያጌ፥ “አነ ታን ፕርድያ ጋላሳይ ጋካናዉ፥ ታክ ጊተ። አያዉ ጎፐ፥ ታን አሳቱዋነ ካዉተቱዋ ሺሻናዉ ቃቻድ፤ ሺሻደ ታ ሀንቁዋ ሱሉዋ ኡንቱንቱ ቦላ ጉሳና። ሳአይ ሙለናካ ታ ሀንቁዋ ታማን ጹገታና።

⁹ “ሄ ዎደ ታን አሳ ኡባይ ጌሻ ሃሳያ ሃሳያና ማላ ኦና፤ ያትና፥ ኡንቱንቱ ኡባይካ መና ጎዳ ሱን ጼጋናነ እትፐ አዉ ኦና።

¹⁰ ላለቴዳ ታ አሳቱ፥ ታዉ ቱሙ ጎይንያዋንቱ ቶጵያ ሻፋቱዋፐ ሄፍን ባጋፐ ታዉ እሞታ አሀና።

¹¹ ሄ ዎደ ህንተ ታ ቦላ ማካሊደ ኦዳ ኦሶቱዋ ጋሱዋን ዬላትክታ፤ አያዉ ጎፐ፥ ኦቶረትያነ አይያዋንታ ታን ህንተ ግዶፐ ድጋ ድጋና። ቃይ ህንተካ ሀዋፐ ስንን ታ ጌሻ ደርያን ኦቶረትክታ።

¹² ታን ህንተ ግዶፐ ባረንቱ ሁጲያ ካዉሽያዋንታነ ዝቂ ኦያ አሳቱዋ አሻና፤ ኡንቱንቱካ መና ጎዳ ሱንን አማነትያዋንታነ ታፐ ማዱዋ ኮይያዋንታ ግዳና።

¹³ እስራኤልያ አሳፐ አቴዳዋንቱ ኦ ቦላነ ኢታባ ኦክኖ፤ ዎርዱዋ ሃሳይክኖ፤ ኡንቱንቱ እንጻርሳንካ ጭሙ ቤተና። ሄዋ ግሻዉ፥ ኡንቱንቱ ሄመታናነ አላጻና፤ ኡንቱንታ ያሽስያባይካ ደኤና” ያጌ።

ናሸቻ የ

¹⁴ ጽዮነ ናቴ፥ ማዛሙርያ የጻ! እስራኤልያ አሳዉ፥ እልልተ! የሩሳላመ ናቴ፥ ነ ፖሎ ዎዛናፐ ናሸታ፤ ሀሹካ ጋ!

¹⁵ መና ጎዳይ ህንተ ቦላ ፕርዴዳ ፕርዳ አጌዳ፤ ህንተ ሞርከቱዋካ ድጌዳ። መና ጎዳይ፥ እስራኤልያ ካቲ፥ ህንተ ግዶን ደኤ፤ ሀዋፐ ስንናዉ ህንተና ያሽስያዌ ባዋ።

¹⁶ ሄ ጋላስ የሩሳላመባይ ሀዋዳን ያገታና፤ “ጽዮኔ፥ ያዮፓ! ነ ኩሸቱካ አርጋጮፕኖ።

¹⁷ መና ጎዳይ ነ ጾሳይ ነ ግዶን ደኤ፤ እ ነዉ ጾኑዋ እምያ ኦላንቻ። እ ኔናን ናሸታና፤ እ ባረ ሲቁዋን ኔና ኦራጽሳና፤ አሳይ ባላ ጋላስ የጽያዋዳን፥ እ ኔናን ናሸቴዳዋ ማዛሙርያ የጺደ በሳና” ያጋና።

¹⁸ ጾሳይ ሀዋዳን ያጌ፤ “ሀዋፐ ስንናዉ ነ ቦላ ባሻይ ጋከናዳን ታን ኦና፤ ነ ዬላካ ቁጫና።

¹⁹ በአ፥ ሄ ዎደ ታን ኔና ኡቁኔዳዋንታ ኡባ ሙራና። ታን ዎባቱዋ አሻና፤ ላለቴዳዋንታካ ሺሻና። ታን ኡንቱንቱ ካዉሻ ቦንቾ ላማና፤ ያቶፐ ሳኣን ደእያ አሳ ኡባ ማታን ኡንቱንቱ ሱንይ ኤረቴዳዋ ግዳናዋ።

²⁰ ሄ ዎደ ታን ህንተና ሺሻና፤ ታን ህንተና እትፐ ሺሻደ ዛራና፤ ያታደ ታን ህንተ አይፊ በእሽን ህንተና እሻልስያ ዎደ፥ ህንተ ሀ ሳኣን ደእያ አሳ ኡባ ማታን ቦንቼቴዳዋንታነ ኤረቴዳዋንታ ግዳንታ” ያጌ መና ጎዳይ።