ሲቁዋ ሳባ 8 - ጌሻ ማጻፋ

¹ ነ ታዉ አላጋ ግደናን ታ ዳይ ን ሜዳ ታ እሻ ግዳርኪሻ! ያትንቶ ታን ኔና ኦግያን ደማደ ሺሻ አካ የርና፥ ታና ኦንነ ቦረናሽን።

² ታና ታማርሴዳ ታ ዳይ ጎለ ታን ኔና ካለደ፥ ታ ዳይ ቆልኦ ገልሳ አግና፥ ሄዋን ታና ነ ሲቁዋባ ታማርሴዳዋ ግዳርኪ፤ ሮማንያ ጉምኤዳ ማልእያዋ፥ ሎእያ ዎይንያ ኤሳ ታን ኔና ሄዋን ኡሻርክታ።

³ ታና ሄዋን ነ ሀድርሳ ቄስያ ቦርኮትሳደ፥ ነ ኡሸቻ ኩሽያን ታና ቆሜዳዋ ግዳርኪ።

⁴ ህንተኖ የሩሳላመ ዎዶራቶ፥ ሲቁ ባረ ዎድያን ደንዳናዉ፥ ቃሰ ደንናዳን፥ ታ ህንተዉ ሀዳራ ጋይ ያጋዱ።

ሲቁዋ ሳባ የሩሳላመ ዎዶሮቱ:

⁵ ባረ ሲቁዋ ሀሽያን ዘምፓደ፥ ባዙዋፐ ይያና ሀና ኦኔ? ያጌድኖ። በን ነ አታ ኔና ባንካ የሌዳ፥ አፕልያ ላንቂያን ነ ግሳ ደእሽን፥ ኔና ታ ቃሰረደ ደንድ።

ወዶራታ:

⁶ መና ሲቁዋን ታና ነ ዎዛና ቦላ አታማ፤ ነ ቀስያንካ ማታፋዳን፥ ታ ጻላላ ኦይቃ። አያዉ ጎፐ፥ ሲቁ ሀይቁዋ ማላ ምና፤ ምሹካ ዱፉዋ ማላ መቀ ኢታ፤ አ ላጩካ ጾሳ ታማ ላጩዋ ማላ።

⁷ ሃ ዳሩ ሲቁዋ ታማ ቶይሳናዉ ዳንዳየና፤ ድኡካ ሜጪደ አፋናዉ ዳንዳየና። አሳይ ሲቁዋ ሻማናዉ ባረዉ ደእያ አቁዋ ኡባ እሞፐካ፥ ሲቁ ሻሉዋን ሻመተና ድራዉ፥ አሳይ ሄዋ ካ ያጋዱ።

ዎዶራት እሻቱ:

⁸ ኑዉ ትራን ንይ ኡትቤና ምቻታ ደአዉ፤ አስናይ እዞ ኦቾፐ፥ ኑን እዉ ኦናዌ አዬ?

⁹ እዛ ግምቢያ ድርሳ ግድንቶ፥ ኑን እ ቦላ ዎችያ አዱሳ፥ ብራ ግምቢያ ግምባና፤ አ ድርሳ ፐንገ ግድንቶ፥ ዝጋ ሳንቃን እዞ ዶድሳና ያጌድኖ።

ወዶራታ:

¹⁰ ሄኮ ታን ድርሳ ግምቢያ፤ ታ ንይካ ግምቢያ ቦላ ግምበቴዳ ዎችያ ሳ፤ ሄዋ ድራዉ፥ ታን ታ ሲቁዋና ደእያ ዎደ፥ እ ታናን ናሸቴ።

¹¹ ሶሎሞነዉ ባኣል-ሀሞናን ዎይኒ ቶከቴዳ ሾይቃይ ደኤ፤ ሄ ዎይንያ ግዱዋ ኦያዋንቶ ከራ እሜዳ። ከራ አኬዳዋንቱ ቴራን ጎኤቴዳዋ ድራዉ፥ ሁጲያን ሁጲያን ሻኡ ብራ አዉ አሂኖ።

¹² ሽን ታዉ ታ ቡዞ ዎይኒ ቶከቴዳ ሾይቃይ ደኤ፤ ሶሎሞና፥ ኔን ሻኡ ብራ አካ፤ አታክልትያ ኦያዋንቱ ላኡ ጼቱ ብራ አክኖ ያጋዱ።

ዎዳላይ:

¹³ ኔኖ፥ አታክልትያ ግዶን ደእያ ታ ሲቃቴ፥ ነ ኮሻ ላገቱዋ ስሳናዉ ኮዪኖ፤ ነ ኮሻ ታና ስሳ ያጌዳ።

ወዶራታ:

¹⁴ ታ ሲቆዉ፥ ታኮ ኤለካ ሃያ! ሳዊያ ማታይ ሞክያ ደረቱዋ ቦላና፥ ጉፕያ ገንእያ ዎይ ዶግያ ማራቱዋ ማላታደ ያጋዱ።