ሲቁዋ ሳባ 2 - ጌሻ ማጻፋ

ወዶራታ:

¹ ታን፥ “ሳሮና ግያ ሳኣን ዶልያ ጪሻነ፥ ዎምባን ዶልያ ሎኦ ጪሻ ማላ” ያጋዱ።

ዎዳላይ:

² ኤ ታ ሲቃታ ማጫ አሳ ግዶን ጼልያ ዎደ፥ አጉን ግዶን ቤትያ ሎኦ ጪሻ ማላታዉ ያጌዳ።

ወዶራታ:

³ ታ ሲቁ ሀራ ዎዳላቱዋ ግዶን ጼልያ ዎደ፥ ዎራን ደእያ አፕልያ ግያ ም ማላቴ፤ ታና ሎይ ናሸችና፥ አ ኩዋ ግዶን ኡታድ፤ አ አይፊ ሚና፥ ታና ሎይ ማልኤ።

⁴ እ ታና ቁማ ምያ አኮ ዉይግያ ገልሴዳ፤ ባረ ሲቁዋ ባንድራዳን ታ ቦላ ቁ ቁ ኦዳ።

⁵ ታን አ ሲቁዋን ኦከታደ ሀርጌዳ ድራዉ፥ ዛቢብያ አይፍያ ታና ምዚደ ምንስተ፤ አፕልያ ታና ምዚደ፥ ታ ዎልቃ ኩንተ።

⁶ ባረ ሀድርሳ ኩሽያ ታና ቦርኮትሴዳ፤ ባረ ኡሸቻ ኩሽያን ታና ቆሜዳ።

⁷ ህንተኖ የሩሳላመ ያላጋ ማጫ አሳዉ፥ ሲቁ ባረዉ ዶሲደ ደንዳና ጋካናዉ፥ አ ህንተ ቤጎና ማላ፥ ታን ህንተና ገንኤቱዋንነ ባዙዋ ዶገቱዋን ጫላይ።

ሲቁ ኡባ የዉዋ ሎይ

⁸ ስስተ፥ ሄዌ ታ ሲቁዋ ኮሻ! በእተ ደርያና ፕሪደ፥ ዞዘቱዋ ቦላና ጾንገቲደ ጋኬዳ!

⁹ ታ ሲቁ ዉሻ ማላ፤ ዎይ ገንእያ ማራ ማላቴ። በእተ፥ እ ኑ ጎልያ ድርሳ ማታን ኤቄዳ፤ ማስኮትያና ጎለ ጼሌ፤ ጋርዱዋ ጋርሳናካ ሉጻይ ጼሌ።

¹⁰ ታ ሲቁ ታና ሀዋዳን ያጌ፤ ታ ሲቃቴ፥ ደንዳ! ታ ማላንቻቴ፥ ሃያ! እትፐ አነ ቦይተ።

¹¹ በአ፥ ባልጉ አዳ፤ እራይካ ኤቄዳ።

¹² ቢታን ጪሻይ ጪሼዳ፤ የ የጽያ አግናይካ ጋኬዳ፤ ሀራጵያ የይ ኑ ቢታን ስሰቴ።

¹³ ባላሲ አይፍያ ዶሜዳ፤ ዎይኒ ጪሼዳ፤ አ ጪሻ ሳዉ ቢታን ቶሹኩ ጌ። ሄዋ ድራዉ፥ ታ ሲቃቴ፥ ደንዳ፤ ታ ማላንቻቴ፥ ሃያ፤ አነ እትፐ ቦይተ ያጌ ያጋዱ።

ዎዳላይ:

¹⁴ ኔን አፉዋ ዶና ዛላ ዛአን ቆሰቴዳ ሀራጳት ማላ፤ አነ እት ገደ ታና ነ ሶምኡዋ በሳ፤ ነ ኮሻካ ስሳ። አያዉ ጎፐ፥ ነ ኮሻይ ታና ቃረ፤ ነ ሶምኡካ ዳሮ ሎኤ ያጌዳ።

የሩሳላመ ዎዶሮቱ:

¹⁵ ኑ ዎይኒ ጪሼዳ፤ ሄዋ ድራዉ፥ ኑ ዎይንያ ግዱዋ ባይዝያ ዎራካናቱዋ፥ ሄ ቄር ዎራካናቱዋ ጲርያ ዎደ ኦይቂተ ያጌድኖ።

ወዶራታ:

¹⁶ ታ ሲቁ ታዋ፤ ታንካ አኖ፤ ጪሻ ግዶን እ ባረ ዉድያ ሄሜ።

¹⁷ ቃማ ማይ ቃረታናዉ፥ ዎንታ ጫርኩ ጫርካናዉ፥ ታ ሲቆዉ፥ ገንእያዳን ዎይ ያላጋ ዶግያዳን፥ አፎትያ ደርያና ዎጻደ ሃ ስማ ያጋዱ።