ሲቁዋ ሳባ 1 - ጌሻ ማጻፋ

ሲቁ ዎይንያ ኤሳፐ አ

¹ ማዛሙርያ ኡባፐ አያ ሶሎሞና ማዛሙሪ ሀዋ።

ወዶራታ:

² “ነ ሲቁ ዎይንያ ኤሳፐ አ ናሸችያ ድራዉ፥ ነ መተርሻን ዛራ ዛራደካ ታና የራ።

³ ነ ኦከትያ ሽቱ ዎት ሳዊ! ነ ሱንይ ጼሰትያ ዎደካ አያ ናሸቺ! ጌላዮቱ ኔና ሲቅያዌ ሄዋሳ።

⁴ ታና ኔናና አካደ ባ። ሃያ፥ አነ ላኡ እትፐ ዎጾይተ! ታ ካትያዉ፥ ታና ነ ሲርጻ ገልሳ” ያጋዱ። አባን ኑን አይ ኬሻ ናሸቴዶ! ኑን አ ሲቁዋ ዎይንያ ኤሳፐካ አደ ናሸቶ። ቱሙካ ማጫ አሳይ ኡባይ ኔና ሲቃናዉ በሴ ያጌድኖ።

የሩሳላመ ማጫ አሳቱ: ወዶራታ:

⁵ ህንተኖ፥ የሩሳላመ ማጫ አሳቶ፥ ስስተ፥ ታን ካረ፤ ግዶፐነ፥ ማላንቻ። ታ ካረተይ ቄዳረ ዱንካንያ ማላ፤ ሽን ታ ማላይ ሶሎሞና ካትያ ጎልያ ጋርዳቱዋ ማላ።

⁶ ታ ማላ ካረጽሴዳዌ ጹግያ አዋ፤ ታን ካረ ግዴዳ ድራዉ፥ ታና ካፓ። ታ እሻቱ፥ ታ አት ናናቱ ታናና ዋላቀቲደ፥ ታና ዎይንያ ቱራ ናጋንቻ ኦድኖ፤ ያትና፥ ታን ታና ናጋበይከ።

⁷ ታ ሲቆዉ፥ አነ ታዉ ኦዳ፤ ነ ዶርሳ ዉድያ ኔን ሄምያዌ ሀቃኔ? ጋላስ አዋፐ ነ ኡንቱንታ ሸምፕስያዌ ሀቃኔ? ኔና ደማናዉ ነ ላገቱዋ ዉድያ ካላደ፥ አያዉ ዩሻንቻ ማጫ አሳ ግዶ? ያጋዱ።

የሩሳላመ ማጫ አሳቱ:

⁸ ሀነ፥ ማጫ አሳ ኡባፐ አ ሎእያ ማላንቻቴ! ሳኣ ኤራና ዮፐ፥ ዶርሳይ ቤዳ ሳ ካላደ ባ፤ ነ ዴሻ ማራቱዋካ ሄንንቻቱዋ ዱንካንያ ማታን ሄማ።

ዎዳላይ

⁹ ታ ሲቃቴ! ግብጼ ካትያ ፓራ ጋርያ ጎችያ ፓራቱዋ ግዶን ደእያ ማጋያቲዳን ሎኣሳ።

¹⁰ አቤት፥ ነ ሀይን ጎላካትያ አሌቁዋና ሺቂደ፥ ነ ጋጩ አያ ሎኢ! ነ ዚዚካ እንቁዋን አሌቀቴዳዋ።

¹¹ ኑን ነዉ ብራን አሌቀቴዳ፥ ዎርቃ አሌቁዋ ኦስሳና ያጌድኖ።

ወዶራታ:

¹² ካቲ ማዳን ኡት ደእሽን፥ ታ ሽቱዋ ሳዉ ጎልያ ግዶ ኡባን ቶሹኩ ጌዳ።

¹³ ታ ሲቁ ታ ንቱዋፐ ግዱዋን ሸምፕያ ዎደ፥ አ ፔኑ ቃርጪትያና ደእያ ካዋራዳን ሳዌ።

¹⁴ ታ ሲቁ ኤንጋደ ጌተትያ ዎይንያ ሳኣን ዶሌዳ፥ ባዙዋ ጪሻ ማላ ያጋዱ።

ዎዳላይ:

¹⁵ ታ ሲቃቴ፥ ኔን ዋታ ሎአይ! ኔን ዋታ ሎአይ! ነ አይፈቱ ሀራጵያ አይፍያዳን ሎኢኖ ያጌዳ።

ወዶራታ:

¹⁶ ታ ሲቆዉ፥ ኔን አያ ሎአይ! አያ ናሸቻይ፤ ኑ አርሳይካ አጬዳ ማታዳን ናሸችያዋ።

¹⁷ ኑ ጎልያ ዛሩ ዝጋ፤ ካራይካ ጺዳን ዳደቴዳዋ ያጋዱ።