ሳፃ ማፃፋ 3 - ጌሻ ማጻፋ

(5) የሱስ ሳርዴሳን ደእያ ዎሳ ጎለዉ ጎዋ

¹ ሳርዴሳን ደእያ ዎሳ ጎልያ ኪታንቻዉ ሀዋዳን ያጋደ ጻፋ: “ጾሳ አያና ላፑናቱነ ላፑ ጾልንታቱ ደእያዌ ሀዋዳን ያጌ። ታን ነ ኪታ ኤራይ፤ አሳይ ኔና ሸምፑዋና ደኣሳ ግንቶካ፥ ኔን ሀይቃዳ።

² ቤጎታ! አቴዳዋነ ሀይቃናዉ ማቴዳዋ መን። አያዉ ጎፐ፥ ነ ኪታይ ታ ጾሳ ስንን ፖሎ ግደናዋ ታን ደማድ።

³ ስም ኔን አኬዳዋነ ስሴዳዋ አኬካ፤ ናጋ፤ ነ ናጋራፐካ ስማ። ኔን ቤጎተናዋ ግዶፐ፥ ታን ኔኮ ካይሱዋዳን ያና፤ ታን ዎይሳደ ያነንቶ ኔን ኤራካ።

⁴ ሽን ባረንቱ ማዩዋ ቅትስቤና አማሬዳ አሳቱ ሳርዴሳን ኔናና ደኢኖ። ኡንቱንቱ ቦ ማዩዋ ማዪደ ታናና ሀመታና፤ አያዉ ጎፐ፥ ኡንቱንቱ ቦ ማዩዋ ማያናዉ በስያዋንታ።

⁵ ጾንያዌ ሄዋዳንካ ቦ ማዩዋ ማያና። ታን አ ሱን ደኡዋ ማጻፋፐ ቁጭከ፤ ታን ታ አቡ ስንንነ አ ኪታንቻቱዋ ስንን እ ታዋ ግድያዋ ማርካታና።

⁶ “ስሳናዉ ሀይይ ደእያ ኡራይ ጌሻ አያናይ ዎሳ ጎለቶ ግያዋ ስሶ ያጌ” ያጋደ ጻፋ።

(6) የሱስ ፕላደልፍያን ደእያ ዎሳ ጎለዉ ጎዋ

⁷ ፕላደልፍያን ደእያ ዎሳ ጎልያ ኪታንቻዉ ሀዋዳን ያጋደ ጻፋ: “ዳዊተ ቁልፕያ ኦይቄዳዌ፥ ኦንነ ጎርዳናዉ ዳንዳየናዳን ዶይያዌ፥ ቃይ ኦንነ ዶያናዉ ዳንዳየናዳን ጎርድያዌ ጌሻይነ፥ ቱማንቻይ ሀዋዳን ያጌ።

⁸ ታን ነ ኪታ ኤራይ። በአ፥ ታን ነ ስንን ኦንነ ጎርዳናዉ ዳንዳየና ፐንግያ ዎድ፤ አያዉ ጎፐ፥ ነ ዎልቃይ ጉ ግዶፐነ፥ ታ ቃላ ናጋዳነ ታ ሱንካ ኤርከ ጋበይካ።

⁹ በአ፥ አይሁዳ ግድክኖ ሽን ባረና፥ ‘ኑን አይሁዳ’ ጊደ ዎርዶትያ ሴጻና አይሁዳ ዎሳ ጎልያ ታን አሃደ፥ ነ ስንን ጎይንሳናነ ኔና ሲቅያዋካ ኡንቱንታ ኤርሳና።

¹⁰ ኔን ገንጩዋን ታ አዛዙዋ ናጌዳ ድራዉ፥ ሳኣን ደእያ አሳ ፓጫናዉ ኩመን ሳኣ ቦላ ይያ ዋይያ ዎድያፐ ታንካ ኔና ናጋና።

¹¹ ታን ኤለካ ያና፤ ኦንነ ነ ካላቻ አከና ማላ፥ ነዉ ደእያዋ ምንሳ ኦይቃ።

¹² ታን ጾንያ ኡራ ታ አዉዋ ጌሻ ጎልያን ቱሳ ኦና፤ እ ሄዋፐ ኡባካ ከሰና። ታን ታ ጾሳ ሱን፥ ታ ጾሳ ካታማ ሱንነ ታ ጾሳ ማታፐ ዎና ኦራ የሩሳላመ ሱን አ ቦላ ጻፋና። ቃይ ታን ታ ኦራ ሱንካ አ ቦላ ጻፋና።

¹³ ስሳናዉ ሀይይ ደእያ ኡራይ ጌሻ አያናይ ዎሳ ጎለቶ ግያዋ ስሶ ያጌ” ያጋደ ጻፋ።

(7) የሱስ ሎዶቅያን ደእያ ዎሳ ጎለዉ ጎዋ

¹⁴ ሎዶቅያን ደእያ ዎሳ ጎልያ ኪታንቻዉ ሀዋዳን ያጋደ ጻፋ: “አማነቴዳ ቱማንቻ ማርካይ፥ ጾሳይ መዳዋ ኮይሩ፥ አመንእ ግያዌ ሀዋዳን ያጌ።

¹⁵ ታን ነ ኪታ ኤራይ። ኔን እርጻ ግዳካ፤ ዎይ ሴልያዋ ግዳካ፤ እርጻ ዎይ ሴልያዋ ግዳርኪ።

¹⁶ ኔን እርጻ ዎይ ሴልያዋ ግደናን፥ ዶምቦሎላ ግድያ ድራዉ፥ ታን ኔና ታ ዶናፐ ጩቻና ሀናይ።

¹⁷ አያዉ ጎፐ ኔን፥ ‘ታን ዱረ፤ ሚሻና ደአይ፤ ታና አይነ ኮሸና’ ያጋሳ። ሽን ኔን መቶትያ አሳ፥ ቃረያ አሳ፥ ህዬሳ፥ ቆቃነ ካሎቴዳ አሳ ግድያዋ ኤራካ።

¹⁸ ሄዋ ድራዉ፥ ኔን ዱረታና ማላ፥ ታማን ጌዬዳ ዎርቃ፥ ኔና ዬላይያ ነ ካሉዋ ካማናዉ ቦ ማዩዋነ ቃይ ሎይ ጼላናዉ ነ አይፍያ ኦክያ ልያ ታፐ ሻማናዳን፥ ታን ኔና ዞራይ።

¹⁹ ታን ሲቅያ ኡባ ሴራይነ ሙራይ፤ ስም ሎይ ሴለታ፤ ነ ናጋራፐካ ስማ።

²⁰ በአ፥ ታን ካረን ኤቃደ ጼሳይ። ኦንነ ታን ጼስያዋ ስሲደ፥ ካርያ ዶዮፐ፥ ታን አኮ ገላደ አናና እትፐ ካዉዋ ማና፤ እካ ታናና እትፐ ማና።

²¹ ቃይ ታን ጾናደ ታ አዉዋና አ ካዉተ ኦይድያን ኡቴዳዋዳን፥ ጾንያ ኡራዉ ታናና ታ ካዉተ ኦይድያን ኡትያ ማታ እማና።

²² “ስስያ ሀይይ ደእያ ኡራይ ጌሻ አያናይ ዎሳ ጎለቶ ግያዋ ስሶ ያጌ ያጋደ ጻፋ” ያጌዳ።