ሳፃ ማፃፋ 2 - ጌሻ ማጻፋ

(1) የሱስ ኤፈሶነን ደእያ ዎሳ ጎለዉ ጎዋ

¹ ኤፈሶነን ደእያ ዎሳ ጎለ ኪታንቻዉ ሀዋዳን ያጋደ ጻፋ: “ባረ ኡሸቻ ኩሽያን ላፑ ጾልንትያ ኦይቄዳዌ፥ ጾምፓቱዋ ዎያ ላፑ ዎርቃ ባላቱዋ ግዱዋና ሀመትያዌ ሀዋዳን ያጌ።

² ታን ነ ኪታ፥ ነ ዳቡራነ ነ ገንጩዋ ኤራይ። ቃይ ኔን ኢታ አሳቱዋ ገንጫናዉ ዳንዳያቤናዋካ ታን ኤራይ፤ የሱስ ኪቴዳዋንታ ግደናን ደኢደ ባረንታ፥ ‘ኑን የሱስ ኪቴዳዋንታ’ ግያዋንታ ኔን ጾሞሳደ፥ ኡንቱንቱ ዎርዶ ግድያዋ ደሜዳዋካ ኤራይ።

³ ኔን ገንጫዳ፤ ቃይ ታ ሱን ድራዉካ መቱዋ ዳንዳያዳ፤ ዳቡራበይካ።

⁴ ሽን ታን ኔና ካያባይ ደኤ፤ አያዉ ጎፐ፥ ኔን ካሰ ነ ሲቁዋ አጋዳ።

⁵ ስም ኔን ሀቃፐ ኩንዳድንቶ አኬካ። ነ ናጋራፐ ስማ፤ ኔን ካሰ ኦያ ኦሱዋ ኦ። ሄዌ ዮፐ፥ ታን ኔኮ ያና፤ ያደ ኔን ነ ናጋራፐ ስማና ዮፐ፥ ኔን ጾምፕያ ዎያ ነ ባላ አ ሳኣፐ አካ ድጋና።

⁶ ሽን እትባ ሎይዳ፤ ኒቆላዋቱዋ ኦሱዋ፥ ታን እጽያዋ ኔንካ እጻዳ።

⁷ “ስሳናዉ ሀይይ ደእያ ኡራይ ጌሻ አያናይ ዎሳ ጎለቶ ግያዋ ስሶ፤ ታን ጾንያ ኡራዉ ጾሳ ገነትያን ሞክያ ደኡዋ ም አይፍያ ማናዉ እማና ያጌ” ያጋደ ጻፋ።

(2) የሱስ ሳምርኔሳን ደእያ ዎሳ ጎለዉ ጎዋ

⁸ ሳምርኔሳን ደእያ ዎሳ ጎለ ኪታንቻዉ ሀዋዳን ያጋደ ጻፋ: “ሀይቄዳዌ፥ ሀይቁዋፐካ ደንዴዳዌ፥ ኮይሩነ ዉርሰይ ሀዋዳን ያጌ።

⁹ ታን ነ ዋይያነ ነ ህዬሳተ ኤራይ፤ ሽን ኔን ዱረ። አይሁዳ ግደናን ደኢደ ባረንታ፥ ኑን አይሁዳ ግያዋንቱ ቦርያዋ ታን ኤራይ፤ ሽን ኡንቱንቱ ሴጻና ማባራን ደኢኖ።

¹⁰ ኔን ዋየታና ዋየዉ ያዮፓ። በአ፥ ጻላህያ ካፑ ህንተፐ አማሬዳዋንታ ጾሞሳናዉ ቃሾ ጎለን የጋና፤ ታሙ ጋላሳ ጋካናዉ ህንተንቱ ዋየታና። ሀይቃና ጋካናስካ አማነቴዳዋ ግዳ፤ ታን ነዉ ደኡዋ ካላቻ እማና።

¹¹ “ሀይይ ደእያ ኡራይ ጌሻ አያናይ ዎሳ ጎለቶ ግያዋ ስሶ! “ጾንያ ኡራይ ላኤንዋ ሀይቁዋን ቆሄተና ያጌ” ያጋደ ጻፋ።

(3) የሱስ ጰርጋሞናን ደእያ ዎሳ ጎለዉ ጎዋ

¹² ጰርጋሞናን ደእያ ዎሳ ጎለ ኪታንቻዉ ሀዋዳን ያጋደ ጻፋ: “ላኡ ባጋና ሌፈቴዳ ማሻይ ደእያዌ ሀዋዳን ያጌ።

¹³ ‘ታን ኔን ደእያ ሳኣ ኤራይ። ኔን ሴጻና ካዉተ ኦይዲ ደእያ ሳኣን ደኣሳ፤ ታ ሱን ምንሳ ናጋሳ። ሀራይ አቶ፥ ሴጻናይ ደእያ ሳኣን ህንተንቱ ማታን አሳይ ዎዳ ታን አማንያ ማርካይ አንትጳስ ደእያ ዎደካ ታና አማንያዋ አጋ በይካ።

¹⁴ ሽን ታን ኔና ቦርያ ጉባይ ደኤ፤ እስራኤልያ አሳይ ኤቃዉ ያርሼዳ ቁማ ማናዳንነ ዎሹማናዳን ኡንቱንታ ናጋራ ኦስሴዳ ባላቃ ታማርሴዳ ባላማ ትምርትያ ታማርያ አማሬዳ አሳቱ ኔናና ደኢኖ።

¹⁵ ሄዋዳንካ፥ ቃይ ኒቆላዋቱዋ ትምርትያ ታማርያ አሳቱ ኔናና ደኢኖ።

¹⁶ ሄዋ ድራዉ፥ ኔን ነ ናጋራፐ ስማ፤ ሄዌ ዮፐ፥ ታን ኔኮ ኤለካ ያና፤ ሄ አሳቱዋና ታ ዶናፐ ከስያ ማሻን ኦለታና።

¹⁷ “ ‘ሀይይ ደእያ ኡራይ ጌሻ አያናይ ዎሳ ጎለቶ ግያዋ ስሶ። ጾንያ ኡራዉ ታን ጌማን ደእያ ማናፐ አማሬዳዋ እማና። ቃይ ታን ቦ ሹቻካ አዉ እማና፤ አክያ ኡራፐ አትን፥ ኦንነ ኤረና ኦራ ሱንይ ሄ ሹቻ ቦላ ጻፈት ኡቴዳ’ ያጌ” ያጋደ ጻፋ።

(4) የሱስ ትያጽሮነን ደእያ ዎሳ ጎለዉ ጎዋ

¹⁸ ትያጽሮነን ደእያ ዎሳ ጎልያ ኪታንቻዉ ሀዋዳን ያጋደ ጻፋ: “ጾሳ ናአይ፥ ታማ ላጩዋ ማላትያ አይፊ ደእያዌ፥ ቃይ ጮጭያ ታማን ቴሪደ ጶልያ ናሃስያ ጌተትያ ብራታ ማላትያ ገዲ ደእያዌ፥ ሀዋዳን ያጌ።

¹⁹ ታን ነ ኦሱዋ፥ ነ ሲቁዋ፥ ነ አማኑዋ፥ ነ ማዱዋነ ነ ገንጩዋ ኤራይ፤ ኔን ኮይሮ ኦያዋፐ ሀእ ዳርሳደ ኦያዋ ታን ኤራይ።

²⁰ ሽን ታን ኔና ካያባይ ደኤ፤ ባረና፥ ታን ናባቶ ያግያ ምሽራቶ ኤልዛቤሎ ሸነኮ ጋዳ፤ ሄ ምሽራታ ታ ኦሳንቻቱ ዎሹማናዳንነ ኤቃዉ ያርሼዳ ቁማ ማናዳን፥ ታማርሳዉነ ባለዉ።

²¹ እዛ ባረ ናጋራፐ ስማና ማላ፥ ታን እዝዉ ዎድያ እማድ፤ ሽን ዎሹማናዉ ካጄልያዋፐ እዛ ስማናዉ ኮያበይኩ።

²² በእተ፥ ታን እዞ ግሱዋን ኩንድስና፤ ሳኩዋን እዛ ዋየታና። እዝና ዎሹምያዋንቱ ሄ እዝና ኦያ ናጋራፐ ስማና ዮፐ፥ ኡንቱንታካ ዎልቃማ ዋይያን የጋና።

²³ ታን እዝ ናናካ ዎና፤ ቃይ ዎሳ ጎልያ ኡባይካ ታን አሳ ቆፋነ አሙዋ ኤርያዋ ግድያዋ ኤራና፤ ታን ህንተንቶ ህንተንቱ ኪታ ማላ እማና።

²⁴ “ትያጽሮነን ደእያ ሀራቶ፥ ሀ ኢታ ትምርትያ ታማርቤናዋንቶ፥ ሀራቱ፥ ሴጻና ጪሞ የዉዋ ግያዋ ህንተንቱ ታማርቤይክታ፤ ታን ህንተንታ ሀራ ዴጹዋ ቶስከ ጋይ።

²⁵ ሽን ታን ያና ጋካናዉ ህንተንቶ ደእያዋ ሎይ ናግተ።

²⁶ “ጾኔዳዎነ ዉርሰይ ጋካናዉ፥ ታ ኪታ ናጌዳዎ፥ አሳ ዛርያ ኡባ ሞዳና ማላ፥ ታን ታ አዉዋፐ አኬዳ ማታ ማላ አዉ እማና፤

²⁷ “እ አሳ ዛርያ ኡባ ብራታ ጻምኣን ሞዳናነ፥ ኡርቃፐ መታ ሚሻ መንያዋዳን መንና።

²⁸ ቃይ ታን አዉ ባካልያ ጾልንትያ እማና።

²⁹ ስሳናዉ ሀይይ ደእያ ኡራይ ጌሻ አያናይ ዎሳ ጎለቶ ግያዋ ስሶ ያጌ” ያጋደ ጻፋ።