Philemon 1 - ጌሻ ማጻፋ

¹ ታን ጳዉሎስ፥ የሱስ ክርስቶሳ ድራዉ ቃሹዋን ደእያዌነ ኑ እሻ ጽሞቶስ፥ ኑናና ኦያ ኑን ሲቅያ ፕልሞናዉ፥

² ነ ጎለን ሺቅያ አማንያዋንቶ፥ ኑ ምቻት አፍብስነ ኑናና እትፐ ደእያ ክርስቶሳ ዎታዳራ አርክፖሳዉ ሀ ዳብዳቢያ ጻፌቶ።

³ ጾሳ ኑ አዉዋፐነ ኑ ጎዳ የሱስ ክርስቶሳፐ አ ኬካተይነ ሳሮተይ ህንተንቶ ግዶ።

ፕልሞና ሲቁዋነ አማኑዋ

^4-5 ኔን ጾሳ አሳቱዋ ሲቅያዋነ ጎዳ የሱሳ አማንያዋ ታን ስስያ ድራዉ፥ ጾሳ ዎሳደ ኔና ሀሳይያ ዎደ ኡባን፥ ታ ጾሳ ጋላታይ።

⁶ ኔን ነ አማኑዋ ሀራቱዋና ሻክያዌ ኑዉ ክርስቶስ የሱሳ ባጋና ይያ ሎኦባ ኡባ ኤርሳና ማላ፥ ታን ጾሳ ዎሳይ።

⁷ አያዉ ጎፐ፥ ጾሳ አሳቱዋ ዎዛናይ ነ ኪታን ምኔዳ ድራዉ፥ ታ እሻዉ፥ ታን ነ ሲቁዋን ዳሮ ናሸቻነ መንዋ ደማድ።

አናስሞስ ፕልሞናኮ ስሜዳ ስሙዋ

⁸ ሄዋ ድራዉ፥ ኔን ኦናዉ በስያዋ ኦና ማላ፥ ታን ኔና አዛዛናዉ ክርስቶሳ ባጋና ጻሎፐካ፥

⁹ ታን ጳዉሎስ ጭሜዳዌ፥ ክርስቶስ የሱሳዉ ሀእካ ቃሹዋን ደእያዌ፥ ሲቁዋ ድራዉ፥ ኔና ዎሳይ።

¹⁰ ታን ቃሹዋን ደኣደ አዉ አዉዋ ግዴዳ ታ ናኣ አናስሞሳ ድራዉ፥ ኔና ዎሳይ።

¹¹ እ ካሰ ኔና ጎኤና፤ ሽን ሀእ ኔናካ ታናካ ቱሙ ጎኤ።

^12-13 ታን ዎዛናፐ ዶስያ አናስሞሳ ኔኮ የዶዌ ታ ዎዛና የዶዋ። ታን ዎንጋላ ድራዉ ቃሸታ ኡታ ደእሽን፥ ኔና ኮቺደ፥ ታና ማዳና ማላ፥ ታ ማታን አ አሻናዉ ኮያይ።

¹⁴ ሽን ኔን ነ ሸንያዳን ኦናዋ ኮያይፐ አትን፥ ኔናና ዞረተናን ዎልቃን አይነ ኦናዉ ኮይከ።

¹⁵ አናስሞስ ጉ ዎድያ ኔፐ ሻከቴዳዌ፥ ኦን ኤር ስሚደ፥ ኡባ ዎደካ ኔናና ደአናሰንቶነ።

¹⁶ ስም ሀዋፐ ስንዉ አናስሞስ አይልያ ግደና፤ ሽን አይልያፐ እ ሎይ አ፤ እ ታዉ አይ ኬና ሲቆ እሼ! ቃይ እ ነዉ አሳ ባጋናካ ጎዳ ባጋናካ አይ ኬና አዳ እሻ ግዳንዴሻ!

¹⁷ ስም ኔን ታና ነ ላገ ግያዋ ግዶፐ፥ ታና ሞክያዋዳን፥ አ ሞካ።

¹⁸ እ ነዉ ባይዜዳባይ ዎይ አ ቦላ ነዉ አጩ ደኦፐ፥ ታፐ ጭጋ አካ።

¹⁹ ሄ አጩዋ ታን ጭጋና ጋደ፥ ታን ጳዉሎስ ታ ኩሽያን ጻፋይ። ኔን ታዉ ነ ሸምፑዋ አጮታ ኡቴዳዋ ታን ኔና ሀሳይሳናዉ ኮሸና።

²⁰ ኤ፥ ታ እሻዉ፥ ጎዳ ባጋና ኔፐ ማዱዋ ደማናዉ ኮያይ። ክርስቶሳ ባጋና ታና መን።

²¹ ታን ጌዳዋፐ ዳሩዋ ኔን ኦናዋ ኤራደ፥ ቃይ ነ ታዉ አዛዘታናዋካ አማናደ፥ ሀዋ ነዉ ጻፋይ።

²² ቃይ ህንተንቱ ኤለካ ታዉ እማይ ሸምፕያ ጎልያ ጊግስተ። አያዉ ጎፐ፥ ጾሳይ ህንተንቱ ዎሳን ታና ህንተንቶ ጉየ ዛሪደ እማና ጋደ ቆፓይ።

ዉርሰ ሳሮታ

²³ ክርስቶስ የሱሳ ድራዉ፥ ታናና ቃሹዋን ደእያ ኤፓፍር ኔና ሳሮ ሳሮ ጌ።

²⁴ ቃይ ታናና እትፐ ኦያ ማርቆስ፥ አርስጽሮኮስ፥ ዴማስነ ሉቃስ ኔና ሳሮ ሳሮ ጊኖ።

²⁵ ጎዳ የሱስ ክርስቶሳ አ ኬካተይ ህንተንቱ አያናና ግዶ።