Payduwaa 25 - ጌሻ ማጻፋ

እስራኤላቱ ፓኦራ ግያ ሳን ናጋራ ኦድኖ

¹ እስራኤላቱ ሺጽማ ግያ ሳን ዱንካኔዳ ዎደ፥ አሳይ ሞኣባ ቢታ ማቼቱዋና ሻርሙጹዋ ዶሜዳ።

² ሄ ማጫ አሳቱ ባረንቱ ጾሳቱዋ ያርሹዋ ማናዉ ኡንቱንታ ሾቤድኖ፤ ኡንቱንቱ ሚደ፥ ኡንቱንቱ ጾሳቶ ጎይኔድኖ።

³ እስራኤላቱ ፓኦራ ባኣላ ግያ ኤቃ ካሌዳ ድራዉ፥ መና ጎዳ ሀንቁ ኡንቱንቱ ቦላን ኤጽ ከሴዳ።

⁴ ያትና መና ጎዳይ ሙሳ፥ “መና ጎዳ ሀንቁ እስራኤልያፐ ዎራ ስማና ማላ፥ ሀ አሳ ካለያዋንታ ኡባ አፋደ፥ ሴታ ጋላስ መና ጎዳ ስንን ካቃ” ያጌዳ።

⁵ ሙሴ እስራኤልያ ዳናቱዋ፥ “ፓኦራ ባኣላ ግያ ኤቃዉ ጎይኔዳ ህንተ አሳ ኡባ ህንተ ሁጲያን ሁጲያን ዎተ” ያጌዳ።

⁶ ሙሴነ እስራኤልያ ማባራይ ኡባይ ጋከትያ ዱንካንያ ፐንግያን ዬክሽን፥ እስራኤላቱዋፐ እቱ ምድያማ ቢታ ምሽራቶ ኡንቱንቱ ስንና አደ፥ ባረ ጎልያ አሳኮ አሄዳ።

⁷ ቄስያ አሮና ናኣ ኤልኣዛራ ናአይ ፒንሃስ ሄዋ በኤዳ ዎደ፥ ማባራ ግዶፐ ደንዲደ፥ ቶራ ባረ ኩሽያን ኦይቂደ፥

⁸ ሄ እስራኤልያ ብታንያ ካሊደ፥ ዱንካንያ ግዶ ገሌዳ። እስራኤልያ ብታንያነ ምሽራቶነ ላኡዋካ ቶራን ጫዲደ፥ ካን ከሴዳ። ሄዋዳን ሀንና፥ ቦሻይ እስራኤላቱዋፐ ቃረቴዳ፤

⁹ ሽን ሄ ቦሻን ሀይቄዳ አሳይ ላታማነ ኦይዱ ሻአ።

¹⁰ ሄዋፐ ጉይያን፥ መና ጎዳይ ሙሳ ሀዋዳን ያጌዳ፤

¹¹ “ቄስያ አሮና ናኣ ኤልኣዛራ ናአይ ፒንሃስ እስራኤልያ አሳ ግዶን ታን ታ ቦንቾ ምሸትያዋዳን ምሸቴዳ ድራዉ፥ ኡንቱንቱ ቦላ ታን ሀንቀቴዳ ሀንቁ ዶቼዳ፤ ታንካ ኡንቱንታ ታ ሀንቁዋን ይሳበይከ።

¹² ሄዋ ድራዉ፥ ታን ታ ሳሮተ ጫቁዋ አናና ጫቀትያዋ ፒንሃሳዉ ኔን ኦዳ።

¹³ እ ባረ ጾሳ ቦንቾ ምሸቴዳ ግሻዉነ እስራኤልያ አሳዉ አቶ ጊሴዳ ድራዉ፥ እነ አ ዘረቱ መናዉ ቄሰ ግዳናዋ” ያጌዳ።

¹⁴ ምድያማ ቢታ ምሽራትና ዎዳ እስራኤልያ ብታንያ ሱንይ ሳሉ ናኣ ዝምራ፤ ሳሉ ስሞና ዛራቱዋን እት ያራ ካፑዋ።

¹⁵ ሀይቄዳ ምድያማ ቢታ ምሽራት ሱንይ ኮዝቦ፤ እ አዉ ጹር ምድያማቱ ያራ ካፑዋ።

¹⁶ መና ጎዳይ ሙሳ ሀዋዳን ያጌዳ፤

¹⁷ “ምድያማ ቢታ አሳቱዋ ሞርክተ፤ ኡንቱንታ ዎተ።

¹⁸ አያዉ ጎፐ፥ ኡንቱንቱ ህንተና ፓኦራን ጭሚደ፥ ህንተዉ ሞርከ ግዴድኖ፤ ቃይ ቦሻ ጋላስ ፓኦራን ዎዳ ምሽራት፥ ምድያማቱ ያራ ካፑዋ ናት ኮዝብ ጋሱዋን ኡንቱንቱ ህንተና ሞርኬድኖ” ያጌዳ።