Milkkiyaasa 3 - ጌሻ ማጻፋ1 ኡባፐ ዎልቃማ መና ጎዳይ፥ “በእተ፥ ታ ብያ ኦግያ ጊግሳናዳን፥ ታን ኪትያ አሳ ካሰታደ የዳና፤ ቃይ ህንተ ኮይያ ጎዳይካ ህንተ ቆፐናን ደእሽን፥ ባረ ጌሻ ጎልያ ፑቱ ጋና። ህንተ ናሸትያ፥ ቃላ ጫቁዋ ኪታንቻይ ያና” ያጌ። 2 ሽን እ ብራነ ዎርቃ ሲልሲደ ጌሽያ ታማ ማላነ ማዩዋ ሜጭያ ሳሞና ማላ ግድያ ድራዉ፥ እ ይያ ጋላስ ዳንዳያናዌ ኦኔ? ቃይ እ ቆንጭያ ዎደ አ ስንን ኤቃናዉ ዳንዳይያዌ ኦኔ? 3 እ ብራነ ዎርቃ ጌሽያዋዳንነ ትግያዋዳን ኡቲደ፥ ሌዊያ ዛራቱዋ ጌሻና፤ ኡንቱንቱ መና ጎዳዉ ልከ ያርሹዋ ያርሻና ጋካናዉ፥ እ ኡንቱንታ ጌሻና። 4 ያቶፐ በን ዎደቱዋዳንነ አዳ ላይቱዋዳን፥ ይሁዳ አሳይነ የሩሳላመ አሳይ ያርሽያ ያርሹ መና ጎዳ ናሸችያዋ ግዳናዋ። 5 ኡባፐ ዎልቃማ መና ጎዳይ፥ “ሄዋፐ ጉይያን፥ ታን ፕርዳ ፕርዳናዉ ህንተኮ ያደ፥ ሙሩንያዋንቱ ቦላ፥ ዎሹምያዋንቱ ቦላ፥ ዎርዱዋን ጫቂያዋንቱ ቦላ፥ ኦሳንቻቶ በስያ ድርጉዋ እመናን ድግያዋንቱ ቦላ፥ አስናይ ሀይቄዳ አምአቶነ አታ አዉ ሀይቄዳ ናናቱዋ ቱጋይያዋንቱ ቦላ፥ በትያ ፕርዳ ጌላይያዋንቱ ቦላነ ታዉ ያየናዋንቱ ቦላ ኤለካ ማርካታና” ያጌ። አስራታ እሞታ 6 ቃይካ ኡባፐ ዎልቃማ መና ጎዳይ፥ “ታን መና ጎዳይ ላመትከ፤ ሄዋ ድራዉ፥ ህንተኖ ያቆባ ዛረቶ፥ ህንተ ይክታ። 7 ህንተ ማይዛ አዎቱዋ ዎድያፐ ዶሚደ፥ ህንተ ታ ዎጋፐ ዎራ ስሜድታ፤ አካ ናግበይክታ። ሀእ ታኮ ስምተ፤ ታንካ ህንተኮ ስማና” ያጌ። ሽን ህንተ፥ “ኑን ዋን ስማነ?” ያጊደ ኦቺታ። 8 መና ጎዳይ፥ “አሳይ መና ጎዳ ዉኢ? ሽን ህንተ ታና ዉኢታ” ያጌ። ቃይካ ህንተ፥ “ኑን ኔና ዎት ዉኤቶ? ያጊታ” ያጌ። ኡባፐ ዎልቃማ ጾሳይ፥ “ህንተ አስራታንነ እሞታን ታና ዉኢታ። 9 ህንተ እስራኤልያ አሳይ ኡባይ ታና ዉእያ ድራዉ፥ ህንተ ሸቀቴዳዋንታ። 10 ታ ጌሻ ጎልያን ቁማይ ደአናዳን፥ አስራታ ኡባ ዬስያን የግተ። ያቲደ ታን ሳሉዋ ማስኮትያ ዶያደ አንጁዋ ህንተንቶ ፓላህሳደ ጉሳና ዮፐ፥ ታና ሄዋን ፓጭተ። 11 ህንተ ቢታይ ሞክያ ካ ባይዘናዳን፥ ታን ህንተ ድራዉ ካ ባይዝያባ ኡባ ሴራና፤ ጋደን ደእያ ዎይንያ ቱራይካ አይፍያ ድገና። ታን ኡባፐ ዎልቃማ መና ጎዳይ ሀዋ ኦዳይ። 12 ህንተ ቢታይ ደአናዉ ናሸችያ ቢታ ግድያ ድራዉ፥ ካዉተቱ ኡባይ ህንተና፥ ‘አንጀቴዳዋንታ’ ያጋና” ያጌ። መና ጎዳይ ባረ አሳ ማራናዉ ኦዴዳ ቃላ 13 መና ጎዳይ ሀዋዳን ያጌ፤ “ህንተ ታ ቦላ ጻላ ቃላ ሃሳዬድታ። “ያቲደ ቃይ፥ ‘ኑን ነ ቦላ ዋግ ሃሳዬዶ?’ ያጊደ ኦቺታ። 14 “ቃይካ ህንተ፥ ‘ጾሳዉ ኦያዌ ሀዳ። አ አዛዙዋ ናግያዋንነ ኡባፐ ዎልቃማ መና ጎዳ ስንን ካዮቲደ ሀመትያዋን ኑን አያ ጎኤቴቶ? 15 ኑን ኦቶረትያዋንቱ አንጀቲና በኤቶ፤ ኢታ ኦያዋንቱካ እሻሊደ ደእያዋ ጻላላ ግደናን፥ ጾሳ ፓጪደካ ከስ አኪኖ’ ያጊታ” ያጌ። 16 ሄ ዎደ መና ጎዳዉ ያይያዋንቱ እቱ እቱዋና ሃሳዬድኖ፤ መና ጎዳይካ ሀይዚደ ስሴዳ። መና ጎዳዉ ያዬዳዋንቱነ አ ሱንካ ቦንቼዳዋንታ ሀሳይስያ ማጻፋይ አ ስንን ጻፈቴዳ። 17 ኡባፐ ዎልቃማ መና ጎዳይ፥ “ኡንቱንቱ ታዋ ግዳናዋንታ፤ ታን ኦያ ጋላስ ኡንቱንቱ ታዉ ዱማቴዳ አሳ ግዳናዋንታ፤ አዉ ባረዉ ኦያ ባረ ናኣ ማርያዋዳን፥ ታን ኡንቱንታ ማራና። 18 ሄ ዎደ ህንተ ዛረደካ ጽሉዋፐነ ናጋራንቻፐ ግዱዋን ደእያ ዛዋነ ጾሳዉ አዛዘትያዋንቱፐነ አዛዘተናዋንቱፐ ግዱዋን ደእያ ዛዋ በአና” ያጌ። |
The Word for the World Ethiopia