Mazimuriyaa 91 - ጌሻ ማጻፋ

ጾሳይ ኑና ናግያዋ

¹ ኡባፐ ቂያ ጾሳን ናገቲደ ደእያዌ፥ ኡባፐ ዎልቃማ ጾሳ ኩዋ ግዶን አቄ፤

² መና ጎዳዉ፥ “ኔን ታዉ ጌሱዋነ ባቃታ አትያ ሳኣ፤ ኔን ታን አማንያ ታ ጾሳ” ያጋና።

³ እ ኔና ሻንካንቻቱዋ ግትያፐካ፥ ዎ ዉርስያ ኢታ ሀርግያፐካ አሻና።

⁴ እ ባረ ባለቱዋን ኔና ካማና፤ አ ቀፈቱዋ ጋርሳ ኔን ባቃታደ ቆሰታ አታና። አ አማነቱሳይ ነዉ ጎንዳለ።

⁵ ኔን ቃማ ዳጋንያባዉ፥ ዎይ ጋላስ ጾንገትያባዉ ያያካ፤

⁶ ዎይ ማን ኦይቂያ ሀርግያዉ፥ ዎይ ጋላሳ ሴታን ዉርስያ ኢታ ሀርግያ ህርጋካ።

⁷ ሻአይ ነ ምይያን፥ ቃይ ታሙ ሻአይ ኔፐ ኡሸቻ ባጋና ኩንዳና፤ ሽን ኔና አያይነ ቦቼና።

⁸ ኔን ነ አይፍያ ጻላላን ጼላና፤ ኢታቱ ሙረትያዋካ በአና።

⁹ መና ጎዳ ኔን ነዉ ባቃታ አትያ ሳኣ ኦዳ ድራዉነ፥ ኡባፐ ቂያ ጾሳ ነዉ፥ ደእያ ሳኣ ኦዳ ድራዉ፥

¹⁰ ኢታባይ ኔና ቦቼና፤ ቦሻይካ ነ ጎልያ ሺቀና።

¹¹ አያዉ ጎፐ፥ ነ ኦግያን ኡባን ኔና ናጋና ማላ፥ ጾሳይ ባረ ኪታንቻቱዋ አዛዛና።

¹² ነ ገዲ ሹቻን በተና ማላ፥ ኪታንቻቱ ባረንቱ ኩሽያን ኔና ደንና።

¹³ ኔን ጋሙዋነ ሾሻ ቦላን ሄመታና፤ ቃይ ዎዳላ ጋሙዋነ ዎያ ሾሻ ኔን የና።

¹⁴ መና ጎዳይ ሀዋዳን ያጌ፤ “እ ታና ሲቄዳ ድራዉ፥ ታን አ አሻና። እ ታ ሱን ኤሬዳ ድራዉ፥ ታን አ ናጋና።

¹⁵ እ ታና ጼግያ ዎደ፥ ታን አዉ ኮያና። መቱዋን ታን አናና እትፐ ግዳና፤ ታን አ አሻናነ ቦንቻና።

¹⁶ ታን አ ላይ አዱሳደ ካልሳና፤ ታ አቶተ አ በሳና” ያጌ።