Mazimuriyaa 81 - ጌሻ ማጻፋ

ባላ ማዝሙርያ

ዛማረቱዋ ካፖ ሱሱላቱዋን የጸቴዳ፥ አሳፍ ጻፌዳዋ

¹ ኑዉ ዎልቃ ግድያ ጾሳዉ፥ ህንተ ቃላ ቁ ኦደ የጽተ፤ ያቆባ ጾሳ ሳቢተ።

² የ ዶምተ፤ ካራቡዋ ባቂተ፤ ዲንነ ማስንቁዋን ሎአ የ ስስተ።

³ አግናይ ጼርያ ዎደነ፥ አግናይ ዶይስያ ዎደ ባላ ጋላሳን ማላካታ ፑንተ።

⁴ ሀዌ እስራኤልያዉ ህግያ፤ ያቆባ ጾሳፐ እመቴዳ ዎጋ።

⁵ ግብጼ ቢታ እ ሾጬዳ ዎደ፥ ዮሴፎ አሳዉ ሀ ዎጋ አዋዬዳ። ታን ኤረና ኮሻ ሀዋዳን ያግያዋ ስሳድ።

⁶ “ህንተ ሀሽያፐ ቶኩዋ ዎድ፤ ህንተ ኩሽያ ጹብያፐ ሸምፕሳድ።

⁷ ህንተ መቱዋ ዎደ ታና ጼሴድታ፤ ህንተና አሻድ፤ ታን ጉምያ ሻርያ ግዶን ጌሜዳሳፐ ህንተና አላድ። ማሪባ ግያ ፑልቱዋ ማታን ታን ህንተና ፓጫድ።

⁸ ታ አሳዉ፥ ታን ህንተና ሴርያዋ ስስተ፤ ሀእ እስራኤላቶ፥ ሀይዜርክተ!

⁹ ህንተ ግዶን አላጋ ጾስ ደኦፖ፤ ሀራ ጾሳዉ ጎይኖፕተ።

¹⁰ ታን፥ መና ጎዳ ህንተ ጾሳ፥ ህንተና ግብጼ ቢታፐ ከሳደ አሄዳዋ። ነ ዶና ሎይ ሀንጋ፤ ታን ኔና ዳርሳደ ባርሳና።

¹¹ “ሽን ታ አሳቱ ታ ቃላ ስስበይክኖ፤ እስራኤላቱ ታዉ አዛዘትበይክኖ።

¹² ሄዋ ድራዉ፥ ታን ኡንቱንቱ ባረንቱ ቆፋ ካላና ማላ፥ ኤኖ ጌና ዎዛናዉ አደ እማድ።

¹³ ታ አሳይ ታና ስሴደንቶ፥ እስራኤላቱ ታ ኦግያ ካሌደንቶ አዬ ደኢ!

¹⁴ ታን ኡንቱንቱ ሞርክያ ኤለ ጾናና ሽን፤ ኡንቱንቱ ባልጋራቱዋ ቦላ ታ ኩሽያ ዎና ሽን።

¹⁵ መና ጎዳ እጽያዋንቱ አ ስንን ሆካና፥ ኡንቱንቱ ሙሩካ መናሳ ግዳናዋ።

¹⁶ ታን ህንተና ሎኦ ዛርጋ ምዛና፤ ቃይ ኤሳ፥ ሹቻ ጎንጎሉዋፐ ካልሳና” ያጌ።