Mazimuriyaa 63 - ጌሻ ማጻፋ

ጾሳ ኮዩሳ

ይሁዳ ባዙዋን ደእያ ዎደ ዳዊታ ማዛሙርያ

¹ አቤት ጾሳዉ፥ ኔን ታ ጾሳ፤ ታ ዎዛናይ ኔና ላሞቴ፤ ታ አሹካ ኔና አሞቴ። መል ዛኤዳ፥ ሃ ባይና ቢታዳን ታ ኩመን አሳተይ ኔና ሳመቴ።

² ታን ኔና ጌሻ ሳኣን በኣድ፤ ነ ዎልቃካ ነ ቦንቹዋካ ታን በኣድ።

³ አገና ነ ሲቁ ደኡዋፐ ሎእያ ድራዉ፥ ታ እንጻርሳይ ኔና ቦንቻና።

⁴ ታ ደኡዋ ላይን ታን ኔና ጋላታና፤ ነ ሱንን ታ ኩሽያ ፑደ ምጫና።

⁵ አሳይ ሎኦ ቁማ ካልያዋዳን፥ ታ ሸምፓታ ኔናን ካላና። ታን ታ እንጻርሳን ናሸቻ የን ኔና ጋላታና።

⁶ ታን ታ ግሱዋን ኔና ሀሳያይ፤ ቃማ ኡባን ነባ ቆፓይ፤

⁷ አያዉ ጎፐ፥ ኔን ታና ማዴዳዋ። ታን ነ ቀፍያ ኩዋን ኡታደ፥ ናሸቻዉ የጻይ።

⁸ ታን ነ ማታ ሺቃ ኡታይ፤ ነ ኡሸቻ ኩሺ ታና ኦይቂደ ናጌ።

⁹ ሽን ታና ዎና ኮይያዋንቱ፥ ቢታ ጋርሳ ጪሞ ሳኣን ሞገታና።

¹⁰ ኡንቱንቱ ማሻዉ አደ እመታና፤ ኡንቱንቱ ባባርቂያ ካተ ግዳና።

¹¹ ሽን ካቲ ጾሳን ናሸታና። ጾሳ ሱንን ጫቂያ ኡባይ አ ጋላታና፤ ሽን ዎርዱዋ ሃሳይያዋንቱ ዶናይ ጎርደታና።