Mazimuriyaa 51 - ጌሻ ማጻፋ

ማሮተ ደማናዉ ሺቄዳ ዎሳ

ዛማረቱዋ ካፖ የጸቴዳ፥ በርሳብና ሻርሙጼዳ ሀኖታ ትምቢትያ ኦድያ ናታን አዉ ኦዲደ ስምና፥ ዳዊታ ማዛሙርያ

¹ አቤት ጾሳዉ፥ አገና ነ ሲቁዋዳን ታና ማራ፤ ነ ቃረታ ዳሩዋዳን ታ ባይዙዋ ቁጫ።

² ታ ኢታተፐ ታና ሙለ ሜጫ፤ ታ ናጋራፐ ታና ጌሻ።

³ አያዉ ጎፐ፥ ታ ባይዙዋ ታን ኤራይ፤ ታ ናጋራይ ኡባ ገደ ታ ስንና።

⁴ ታን ኔና፥ ነ ጻላላ ናቃድ፤ ነ አይፍያ ስንን ኢታባ ኦድ። ሄዋ ድራዉ፥ ሃሳያደካ ኔን ልከ፤ ፕርዳደካ ኔን ጽሉዋ።

⁵ ታን የለቶደፐካ ቱሙ ናጋራንቻ፤ ታ አት ኡሉዋን ብሮ አትያ ዎደፐ ዶማደካ፥ ታን ናጋራንቻ።

⁶ ሄኮ ኔን ዎዛና ግዶ ቱማተ ኮያሳ፤ ሄዋ ድራዉ፥ ነ አዳ ኤራተ ታ ጋርሳን ታማርሳ።

⁷ ሂሶጵያ ግያ ቦንጭያን ኔን ታና ጌሻ፤ ታን ጌያና። ታና ሜጫ፤ ታን ሻቻፐ አአደ ቦጻና።

⁸ ኔን ታና ናሸቻነ ሀሹ ግያዋ ስሳ፤ ኔን ታና መንሬዳባ ግዶፐካ፥ ዛራደ ናሸቻ።

⁹ ታ ናጋራፐ ነ ስን ዎራ ዛራ፤ ታ ኢታተ ኡባ ቁጫ።

¹⁰ አቤት ጾሳዉ፥ ጌሻ ዎዛና ታ ግዶን መ፤ ምንስያ አያና ታ ግዶን ኦራ።

¹¹ ታና ነ ስንፐ ኦሎፓ፤ ነ ጌሻ አያና ታፐ አኮፓ።

¹² ነ አቶተ ናሸቻ ታዉ ዛራደ እማ፤ ታን ነዉ ኤኖ ጋደ አዛዘታናዳን፥ ታና ዘምፕሳ።

¹³ ሄ ዎደ ታን ባይዛንቻቱዋ ነ ኦግያ ታማርሳና፤ ሄ ናጋራንቻቱነ ኔኮ ስማና።

¹⁴ አቤት ጾሳዉ፥ ታና አሽያ ጾሳዉ፥ ሱ ጉሴዳ ናጋራፐ ታና አሻ፤ ሄ ዎደ ታ እንጻርሳይ ነ ጽሎተባ የጻና።

¹⁵ አቤት ጎዳዉ፥ ታ ዶና ዶያ፤ ያቶፐ፥ ታ እንጻርሳይ ነ ጋላታ አዋያና።

¹⁶ ኔን ያርሹዋን ናሸታንቶ ታ ነዉ ሺሻናሽን፥ ኔን ያርሹዋን ናሸታካ።

¹⁷ ጾሳዉ ያርሽያ ያርሹ አሽከ አያና፤ አቤት ጾሳዉ፥ “ናጋራ ኦናን አጋርክታሻ” ግያ፥ መኤዳ ዎዛና ኔን ካካ።

¹⁸ አቤት ጾሳዉ፥ ነ ዶሱዋን ጽዮንዉ ኬካ፤ የሩሳላመ ግምበቱዋ ግምባ።

¹⁹ ሄ ዎደ ጽሎ ያርሹዋን፥ ጹግያ ያርሹዋንነ፥ መህያ አሹዋ ዉርስ ጹግያ ያርሹዋን ኔን ናሸታና። ቃይ ኮሩማቱ ነ ያርሽያሳን ያርሸታና።