Mazimuriyaa 46 - ጌሻ ማጻፋ

ጾሳይ ኑናና ደኤ

ዛማረቱዋ ካፖ ቆረ ናናቱ እምና የጸቴዳ፥ ዎዶሮ ናና የ ሂላን ጻፈቴዳ የ.

¹ ጾሳይ ኑን ናገት አትያ ሳነ ኑዉ ዎልቃ። ኑና መቱ ጋክያ ዎደ፥ ማዳናዉ እ ኡባ ገደ ማታን ደኤ።

² ሄዋ ድራዉ፥ ቢታይ ቃጽንቶካ፥ ዎይ ደረቱ አባን ኩንድንቶካ፥ ኑን ያዮኮ።

³ አባ ቤታይ ጉሚደ፥ ሆሙዋ ማይንንቶካ፥ አ ዎልቃማ ሆቢያን ደረቱ ዪቂዪቂንቶካ፥ ኑን ያዮኮ።

⁴ እት ሻፋይ ደኤ። ሄ ሻፋይ ጎጊደ፥ ጾሳ ካታማ፥ ኡባፐ ቂያ ጾሳይ ደእያ ጌሻ ሳኣ ናሸቼ።

⁵ ጾሳይ አ ግዶን ደእያ ድራዉ፥ ሄ ካታማይ ቃጸና። ዎንታ ጉራን ጾሳይ አ ማዳና።

⁶ ጋድያ አሳይ ሻባረቴ፤ ካዉተቱ ቃጺኖ። ጾሳይ ባረ ቃላ ስሴዳ ዎደ፥ ሳአይ ሴሬ።

⁷ መተ ኡባ ጎዳይ ኑናና ደኤ፤ ያቆባ ጾሳይ ኑን ቆሰት አትያ ሳኣ።

⁸ ሃ ዪተ፤ መና ጎዳይ ኦሱዋ ጼልተ፤ እ ሳኣን አሄዳ ባሻ በእተ።

⁹ እ ሳኣ ጋጻ ጋካናዉ ደእያ ኦላ ተኤ፤ ዎንዳፍያ መን፤ ቶራ መን፤ ጎንዳልያካ ታማን ጹጌ።

¹⁰ ዎፑ ጊተ፤ ታን ጾሳ ግድያዋ ኤርተ። ታን ካዉተቱዋ ግዶን ቃይ። ቃይ ቢታ ቦላንካ ቃይ።

¹¹ ኡባፐ ዎልቃማ መና ጎዳይ ኑናና ደኤ፤ ያቆባ ጾሳይ ኑን ቆሰት አትያ ሳኣ።