Mazimuriyaa 41 - ጌሻ ማጻፋ

ሀርጋንቻ አሳ ዎሳ

ዛማረቱዋ ካፖ የጸቴዳ፥ ዳዊታ ማዝሙርያ

¹ ህዬሳዉ ቆፕያ አሳይ አንጀቴዳዋ፤ መቱዋ ጋላስ መና ጎዳይ አ አሼ።

² መና ጎዳይ አ ናጊደ፥ ፓጻ ዎ። እነ ቢታ ቦላን አንጀቴዳዋ ግዴ፤ ጾሳይ አ አ ሞርከቱዋ አሞ አደ እመና።

³ መና ጎዳይ አ ሀርግያ ሂን ደእሺናካ ማዴ፤ እ ሳከትናካ፥ አ ፓ።

⁴ ታና ግዶፐ፥ ታን፥ “አቤት መና ጎዳዉ፥ ታን ኔና ናቄዳ ድራዉ፥ ታና ማራ፤ ሀርግያፐካ ታና ፓ” ያጋድ።

⁵ ታ ሞርከቱ ኢታባን ታና ሃሳዪደ፥ “እ አዉደ ሀይቃንዴሻ? ቃይ አ ሱንይካ አዉደ ያንዴሻ?” ያጊኖ።

⁶ ታና በአናዉ ይያ ኦንነ ታዉ ዎርዶባ ኦዴ፤ ባረ ዎዛናን ታና ዝግርያዋ ብዴ። ሄዋፐ ጉይያን፥ ካረ ከሲደ፥ ያነ ሃነ ኦዱዋ ላሌ።

⁷ ታና እጽያ ኡባቱ እትፐ ታ ቦላን ሳሱኪኖ፤ “ኢታባይ አ ቦላ ጋኬ” ጊደ ቆፒኖ።

⁸ ኡንቱንቱ “አ ኢታ ሀርጊ ኦይቄዳ፤ እ ሄ ግሴዳሳፐ ኡባካ ደንደና” ያጊኖ።

⁹ ሀራይ አትና፥ ታን አማነትያ ታ ሲቆ ላጊ፥ ታን ባርሴዳዌ ታ ኩሽያ ሳኤዳ።

¹⁰ ሽን አቤት መና ጎዳዉ፥ ኔን ታና ማራ፤ ታን ኡንቱንቱ ኩሽያ ከሳናዳን፥ ታና ሀርግያ ሂፐ ደን።

¹¹ ኔን ታናን ናሸታናዋ ታን ኤራይ፤ አያዉ ጎፐ፥ ታ ሞርኪ ታና፥ ጾኒደ ጋይረና።

¹² ኔን ታና ታ ሱረተ ድራዉ ዘምፕሳዳ፤ ነ ስንን ታና መናዉ ዎዳ።

¹³ መና ጎዳይ፥ እስራኤልያ ጾሳይ፥ መናፐ መና ጋካናዉ ጋላተቶ። አመንእ። አመንእ።