Mazimuriyaa 36 - ጌሻ ማጻፋ

ናጋራንቻ ኢታተነ ጾሳ ሎኦተ

ዛማረቱዋ ካፖ የጸቴዳ፥ መና ጎዳ ቆማ ዳዊታ ማዝሙርያ

¹ ኢታ አሳይ ባረ ዎዛናን ደእያ ኢታተ ኮሻ ሀይዜ። ጾሳዉ ያይያዌ አ ቆፋን ባዋ።

² አያዉ ጎፐ፥ እ ባረና ሎይ ናሼ፤ ሄዎ እ ባረ ናጋራ ደማናዉነ እጻናዉ ዳንዳየና።

³ አ ዶናፐ ከስያ ሃሳያይ ገንያነ ዎርዱዋ። አዳ ኤራባነ ሎኦባ ኦያዋ እ አጌዳ።

⁴ እ ባረ ሂጻን ደኢደካ ገንያባ ኦናዉ ሀልቼ። እ ሎኦ ግደና ኦግያን ኤቄዳ፤ እ ኢታባ እጸና።

⁵ አቤት መና ጎዳዉ፥ አገና ነ ሲቁ ሳሎቱዋ ጋኬ፤ ነ ቱማተይካ ቦላ ሻርያዳን ቄ።

⁶ ነ ጽሎተይ ኡባፐ ቃ ደረቱዋ ማላ፤ ነ ፕርዳይካ ኡባፐ ዝቃ ጪማ ማላ። አቤት መና ጎዳዉ፥ ኔን አሳካ ዶኣካ ናጋሳ።

⁷ አቤት ጾሳዉ፥ አገና ነ ሲቁ አይባ አልኦቤ! አሳይ ነ ቀፍያ ግዶ ባቃት አቴ።

⁸ ኡንቱንቱ ነ ሶ ግዶን ፓላሆ ማዳፐ ሚደ ካሊኖ፤ ነ ኬካተ ሻፋፐ ኔን ኡንቱንታ ኡሻሳ።

⁹ አያዉ ጎፐ፥ ደኡዋ ፑልቱ ነ ማታን ደኤ፤ ነ ፖኡዋን ኑን ፖኡዋ በኤቶ።

¹⁰ ኔና ኤርያዋንታ ኔን ሲቅያ ሲቁዋነ ሱረቶ ኬክያ ኬካ አጎፓ።

¹¹ ኦቶራንቻ ገዲ ታና የፖ፤ ናጋራንቻቱዋ ኩሺ ታና የደርሶፖ።

¹² ኢታ አሳቱ ኩንዴዳዋንታ በእተ፤ ኡንቱንቱ ኩንዴድኖ፤ ደንዳናዉካ ዳንዳይክኖ።