Mazimuriyaa 111 - ጌሻ ማጻፋ

ጾሳዉ ሺቅያ ጋላታ

¹ መና ጎዳ ጋላትተ! ሱረቱ ሺቅያ ሺቁዋን፥ ታን ታ ፖሎ ዎዛናፐ መና ጎዳ ጋላታና።

² መና ጎዳ ኦሶቱ አይ ኬሻ ግቴ! ኡንቱንቱን ናሸትያዋንቱ ኡባይ ኡንቱንታ ቆፓናዉ በሴ።

³ አ ኦሶቱ ቦንቹዋንነ አንጋን ኩሜዳዋንታ። አ ጽሎተይካ መናዉ ደኤ።

⁴ እ ባረ ማላልስያ ኦሶቱ፥ ሀሳየታናዳን ኦዳ። መና ጎዳይ ቃረትያዋነ ማርያዋ።

⁵ ባረዉ ያይያዋንቶ ቁማ እ እሜ፤ እ ባረ ጫቁዋ መናዉካ ቆፔ።

⁶ አላጋቱዋ ቢታ እምያዋን እ ባረ ኦሱዋ ዎልቃ ባረ አሳ በሴዳ።

⁷ አ ኩሽያ ኦሶቱ ቱማነ ልከ፤ አ ዎጋቱካ ኡባይ አማነትያዋንታ።

⁸ ኡንቱንቱነ መ መናዉ ኤቂደ ደእያዋንታ፤ ቱማተንነ ሱረተን እመቴዳዋንታ።

⁹ እ ባረ አሳ ዎዚደ ከሴዳ፤ እ ባረ ጫቁዋ ኡንቱንቱና መናዉ ዎዳ። አ ሱንይ ጌሻነ፥ “ሆላ!” ጊስያዋ።

¹⁰ ኤራተዉ ኮይሩ መና ጎዳዉ ያይያዋ፤ አ ዎጋ ኦያዋንቶ ሎኦ አኬካይ ደኤ። ጾሳይ መናዉ ጋላተቶ!