Matthew 11 - ጌሻ ማጻፋ

ጻማቅያ ዮሃንሳፐ የሱሳኮ ኪተቴዳ አሳቱዋ

¹ የሱስ ባረ ታማነ ላኡ ካልያዋንታ አዛዝያዋ ፖሌዳ ዎደ፥ ሄዋፐ ደንዲደ፥ ካታማቱዋን ታማርሳናዉነ ኦዳናዉ ቤዳ።

² ጻማቅያ ዮሃንስ ቃሾ ጎለን ደኢደ፥ የሱስ ኦዳዋ ስሲደ፥ ባረና ካልያዋንታ አኮ ኪቲደ፥

³ “ያናዌ ኔኔየ? ዎይ ሀራ ናጋኔ?” ያግ ኦቻናዳን ኦዳ።

⁴ የሱስ ዛሪደ፥ ኡንቱንቶ ሀዋዳን ያጌዳ፤ “ቢደ ህንተንቱ በእያዋነ ስስያዋ ዮሃንሳዉ ኦድተ፤

⁵ ቆቃቱ ጼሊኖ፤ ዎባቱ ሀመቲኖ፤ ኦሉ ኦይቄዳዋንቱ ፓጺደ ጌዪኖ፤ ቱላቱ ስሲኖ፤ ሀይቄዳዋንቱ ደንዲኖ፤ ህዬሳቱ ዎንጋላ ምሽራቹዋ ስሲኖ።

⁶ ታባ ስና ኡራይ አንጀቴዳዋ” ያጌዳ።

⁷ ዮሃንሳ ካልያዋንቱ ስም ቤዳ ዎደ፥ የሱስ ዮሃንሳባ ሺቄዳ አሳዉ ሀዋዳን ያግ ሃሳዬዳ፤ “አያ በአናዉ አሳይ ደኤና መላ ቢታ ከሴድቴ? ጫርኩ ቃያ ማቃ በአናዉ ከሴድቴ?

⁸ ያትና፥ አያ በአናዉ ከሴድቴ? ሎእያ ማዩዋ ማዬዳ ብታንያ በአናዉ ከሴድቴ? ሎእያ ማዩዋ ማዬዳዋንቱ ካታቱዋ ጎለን ደኢኖ።

⁹ ያትና፥ አያ በአናዉ ከሴድቴ? ናብያ በአናዉ ከሴድቴ? ኤ፥ ታን ህንተዉ ኦዳይ፤ ናብያፐካ አያዋ በኤድታ።

¹⁰ አያዉ ጎፐ፥ ጾሳ ማጻፋን፥ “ ‘ጾሳይ፥ “በአ፥ ታን ኪትያዋ ኔፐ ስንዉ የዳና።” እ ነዉ ኦግያ ጊግሳናዋ’ ያጌዳ ጌተቲደ ዮሃንሳባይ ጻፈቴዳ።”

¹¹ ታን ህንተንቶ ቱሙዋ ኦዳይ፤ አት ኡሉዋፐ የለቴዳ አሳ ኡባን ጻማቅያ ዮሃንሳፐ አያዌ ኦንነ ደንድቤና፤ ሽን ሳሉዋ ካዉተን ኡባፐ ላፍያዌ አፐ አና።

¹² ጻማቅያ ዮሃንሳ ዎድያፐ ዶሚደ፥ ሀቼ ጋካናዉ፥ ሳሉዋ ካዉተታ ዳሮ ናቀታዉ፤ ምን ባጸትያዋንቱ እዞ ደሚኖ።

¹³ አያዉ ጎፐ፥ ናባቱ ኡባቱነ ሙሴ ህጊ ዮሃንሳ ዎዲ ጋካናዉ፥ ትምቢትያ ሃሳዬድኖ፤

¹⁴ ስም ህንተንቱ ኡንቱንቱ ሃሳዮዋ አማናናዋ ግዶፐ፥ ያናዋ ጌተቴዳ ኤላስ ሀ ዮሃንሳ።

¹⁵ ስስያ ሀይይ ደእያዌ ስሶ!

¹⁶ “ሽን ታን ሀ ዎድያ አሳ አያና ሌምሶ? ኡንቱንቱ ቆጫን ኡትያ ናና ማላቲኖ፤ ኡንቱንቱ ባረንቱ ላገቱዋ ጼሲደ፥

¹⁷ ‘ኑን ህንተንቶ ህጽጽያ ፑኔዶ፤ ሽን ዱርበይክታ፤ ዬኩዋ የካ ከሴዶ፤ ሽን ዬክበይክታ’ ያጊኖ።

¹⁸ አያዉ ጎፐ፥ ዮሃንስ ጾሚደነ ዎይንያ ኤሳ ኡሸናን ዪና ኡንቱንቱ፥ ‘አ ቦላ ኢታ አያናይ ደኤ’ ያጌድኖ።

¹⁹ ታን፥ አሳ ናአይ፥ ማደነ ኡሻደ ዪና፥ ኡንቱንቱ ታና፥ ‘ሀ ናፍሳማነ ዎይንያ ኤሳ ኡሽያዋ በእተ፤ ቃራጻ ቃንጽያዋንቱናነ ናጋራንቻቱዋና ሲቀቴ’ ያጊኖ፤ ሽን ጾሳ አዳ ኤራተይ ባረ ኦሱዋን ቱማ ግዲደ ቤቴ” ያጌዳ።

አማነናን እጼዳ ድራዉ ቶሸቴዳ ካታማቱዋ

²⁰ ሄዋፐ ጉይያን፥ የሱስ ባረ ማላታፐ ዳርያ ባጋ ኦዳ ካታማቱዋን ደእያ አሳይ ባረንቱ ናጋራፐ ስምቤና ድራዉ፥ ኡንቱንታ ሀዋዳን ያጊደ፥ ቶሽያ ዶሜዳ፤

²¹ “ኮራዚነ ካታማዉ፥ ነዉ አየሮ፤ ቤተሳይዳ ካታማዉ፥ ነዉካ አየሮ፤ አያዉ ጎፐ፥ ህንተንቱ ቦላ ጾሳይ ኦዳ ማላታይ ጺሮሳ ካታማንነ ሲዶና ካታማን ኦሰቶዋ ግድንቶ፥ ኡንቱንቱ ማቅያ ማዪደ፥ ብድን ኦከቲደ፥ በን ባረንቱ ናጋራፐ ስማናዋንታሽን።

²² ታን ህንተዉ ኦዳይ፤ ፕርዳ ጋላስ ጾሳይ ህንተፐ ጺሮሳ ካታማዉነ ሲዶና ካታማዉ ፕርዳ ካዉሽሳና።

²³ ቃይ ቅፍርናሆማ ካታማዉ፥ ኔን ሳሉዋ ፑደ ቁ ጋናዉ ኮያድ? ኔን ስኦልያ ዱገ የገታና፤ አያዉ ጎፐ፥ ነ ቦላ ጾሳይ ኦዳ ማላታይ ሶዶማ ካታማን ኦሰቶዋ ግድንቶ፥ ሶዶማ ካታማይ ሀቼ ጋካናስካ ደአናዋሽን።

²⁴ ታን ህንተዉ ኦዳይ፤ ፕርዳ ጋላስ ጾሳይ ኔፐ ሶዶማዉ ፕርዳ ካዉሽሳና” ያጌዳ።

የሱሳን ሸምፑዋ ደምያዋ

²⁵ የሱስ ሄ ዎደ ዛሪደ፥ ሀዋዳን ያጌዳ፤ “ታ አቦ፥ ሳሉዋ ሳኣ ጎዳዉ፥ ኔን ሀዋ አዳ ኤራንቻቱዋፐነ አኬካንቻቱዋፐ ገንደ፥ ኤረና ናናቶ ቆንጭሴዳ ድራዉ፥ ኔና ጋላታይ፤

²⁶ ኤ ታ አቦ፥ አያዉ ጎፐ፥ ሀዌ ነ ሸንያዳን ኦሰቴዳ።

²⁷ “ታ አቡ ታዉ ኡባባ እሜዳ፤ አዉዋፐ ሀራይ ናኣ ኤረና፤ ናኣፐነ ናአይ አዉዋ ቆንጭሳናዉ ኮይያ አሳፐ አትን፥ ሀራይ አዉዋ ኤረና።

²⁸ “ዳቡራንቻቶ፥ ዴጹዋ ቶኮዋንቶ ኡባቶ፥ ታኮ ሃ ዪተ፤ ታን ህንተንታ ሸምፕሳና።

²⁹ ታን ጋራነ ታ ዎዛናን አሽከ ግዶ ድራዉ፥ ታ ሞርገ ምን ዋጸትተ፤ ታፐ ታማርተ፤ ህንተንቱ ሼምፖካ ህንተ ሸምፑዋ ደማና።

³⁰ አያዉ ጎፐ፥ ታ ሞርገ ምይ ጊጋ፤ ቃይ ታን ህንተንታ ቶሴዳዌካ ካዉሻ” ያጌዳ።