Luuqaasa 14 - ጌሻ ማጻፋ

የሱስ ሀርጋንቻ ሳምባታን ፓዳ

¹ ሳምባታ ጋላስ ፓርሳዋቱዋ ሱንቱዋፐ እቱዋ ጎለ የሱስ ቁማ ማናዉ ገሌዳ ዎደ፥ አያ ኪተትንቶ በአናዉ አሳቱ ናግ ደኢኖ።

² ቦላይ ጋፍና መቶትያ እት ብታኒ የሱሳፐ ስንና ደኤ።

³ የሱስ ህግያ ታማርስያዋንታነ ፓርሳዋቱዋ፥ “ሳምባታን ፓናዉ ዳንዳየት ዳንዳየተኔ?” ጊደ ኦቼዳ።

⁴ ኡንቱንቱካ ጮኡ ጌድኖ። እ ሄ ብታንያ ቦላ ቦች ፓደ አ ሞይዜዳ።

⁵ የሱስ ኡንቱንታ፥ “ህንተንቱፐ ሀሪ ዎይ ቦራይ ኦላን ኩንድንቶ፥ ሳምባታ ጊደ ኤሌል ከሰናዌ ኦኔ?” ጌዳ።

⁶ ኡንቱንቱካ ሀ የዎ እት ዛሩዋነ እማናዉ ዳንዳይበይክኖ።

አሽከተባ

⁷ የሱስ ሾበቶዋንቱ ቦንቾሳ ዶርያ ዎደ ጼሊደ፥

⁸ “ኦንነ ቡላቻ ጼሶፐ፥ ቦንቼቴዳሳን ኡቶፓ፤ ኦን ኤር ኔፐ አደ ቦንቼቶዌ ጼሰቴዳዋ ግዳናዋ።

⁹ ኔናነ አነ ጼሳዌ ዪደ፥ ‘ሀዎ፥ ኡቱዋ አዉ ዬዳ’ ያግና፤ ሄ ዎድያን ዬላታደ ጻደና ደእያ ሳን ኡቱዋ ዶማሳ፤

¹⁰ የዉዋን ቃይ ኔን ጼሴቶ ዎደ ኔና ጼሶዌ ዪደ፥ ‘ታ ላገዉ፥ ክል ቃሳን ኡታ’ ጋና ማላ፥ ባደ ኡባፐ ሆካሳን ኡታ፤ ሄ ዎደ ኔናና እትፐ ኡቴዳዋንቱ ኡባቱዋ ስንን ነዉ ቦንቹ እመታናዋ፤

¹¹ ባረ ሁጲያ ቁ ኦያ ኡባይ ቶሸታናዋ፤ ባረ ሁጲያ ቶችያዋንቱ ቁ ጊኖ” ያግ ሌምሱዋ ኡንቱንቶ ኦዴዳ።

¹² የሱስ ባረና ጼሴዳዋ ዛሪደ፥ “ኔን ላጻ ዎይ ካዉዋ ጊግሴዳ ዎደ፥ ነ ላገቱዋ ዎይ ነ እሻቱዋ ዎይ ዱረ ነ ሾራቱዋ ጼሶፓ፤ አያዉ ጎፐ፥ ኡንቱንቱ ኔና ባረንቱ ታራን ጼሲደ ኩሽያ ጭጋና ዳንዳዪኖ።

¹³ ሽን አታልያባ ጊግሴዳ ዎደ፥ ህዬሳቱዋ፥ ጉንዳቱዋ፥ ዶማቱዋነ ቆቃቱዋ ጼሳ።

¹⁴ ኡንቱንቱ ነዉ ኩሽያ ዛራናዉ ዳንዳየናዋንታ ግድያ ድራዉ፥ ኔን አንጀታናሳ። ጽላቱ ሀይቁዋፐ ደንድያ ዎደ ጾሳይ ነዉ ኩሽያ ዛራናዋ” ያጌዳ።

ዎልቃማ ባላ ሌምሱዋ

¹⁵ የሱስ ሃሳያ ዉርስያ ዎደ፥ ቁማ ማናዉ ኡቶ አሳፐ እቱ ሀዋ ስሲደ፥ “ጾሳ ካዉተ ጋይታን ኡትያዌ አንጀቴዳዋ” ጌዳ።

¹⁶ የሱስካ ሀዋዳን ጌዳ፤ “እት ብታኒ ዳሮ ሎኦ ካዉዋ ጊግሲደ፥ ጮራ አሳቱዋ ጼሴዳ።

¹⁷ ካዉዋ ዎዲ ጋክና፥ ካሰ ጼሰቶዋንታ፥ ‘ሀእ ካዉ ጊጌዳ፥ ሃይተ’ ጊደ ጼሳና ማላ ባረ ጎለን ኪተትያ ቆማ ኡንቱንቱኮ ኪቴዳ።

¹⁸ ሽን ኡባቱካ እትፐ፥ ቤናዳን አጋና ማላ ዎሴድኖ፤ ኮይሮ ብታኒ ቆማዉ ኦዲደ፥ ‘ታን ቢታ ሻሜዳ ድራዉ ባደ በአናዉ ኮሼ፤ ሄዋ ድራዉ ሀያ ጎዶ ታዉ ሀንቀቶፓርክ’ ጌዳ።

¹⁹ “ላኤንያዌ ቃይ፥ ‘ታን እቼሹ ዋ ቦራቱዋ ሻሜዳዋንታ ዋጻ በአናዉ ብያ ድራዉ፥ ሀያ ጎዶ ታዉ ሀንቀቶፓርክ’ ጌዳ።

²⁰ “ሀራይ ቃይ፥ ‘ታን ማቻቶ አኬዳ ድራዉ፥ ያናዉ ዳንዳያበይከ’ ጌዳ።

²¹ “ቆማይካ ዪደ ባረ ጎዳዉ፥ ሀኖዋ ኡባ ኦዴዳ። ሄ ዎደ ጎዳይ ዳሮ ሀንቀቲደ፥ ባረ ጎልያን ኪተትያ ቆማ፥ ‘ህን ካታማ ኦግያነ ሎሶ ኦግያ ኤሌላደ ከሳ፤ ማንቃቱዋነ ጉንዳቱዋ፥ ዶማቱዋነ ቆቃቱዋ ሃ አካደ ያ’ ጌዳ።

²² “አ ቆማይካ፥ ‘ጎዳዉ፥ ኔን ታና አዛዞዋዳን ኦድ፤ ሽን ሀእካ ሀራ አሳ አክያ ሳአይ ደኤ’ ጌዳ።

²³ ጎዳይካ ባረ ቆማ፥ ‘ታ ጎሊ ኩማናዳን ህን ኦግያፐ ካረ ባጋነ ድርሳ ጋጻ ኡባ ከሳደ፥ አሳ ታ ጎለ አካደ ያ።

²⁴ አያዉ ጎፐ፥ ኮይሮ ታ ጎለ ሾበቴዳዋንቱፐ እት አሳይነ ታ ቁማ ሜና’ ጌዳ” ያጌዳ።

የሱሳ ካላናዉ ባረና ያርሹሳ ኮሼ

²⁵ ጮራ አሳይ የሱሳና እትፐ ብደእያ ዎደ፥ እካ አሳኮ ጉየ ስሚደ፥

²⁶ “ኦንነ ታኮ ይያዌ ደኦፐ ባረ አባነ አቶ፥ ባረ ማቻቶነ ባረ ናና፥ ባረ እሻቱዋነ ምቻቱዋ፥ ባረ ደኡዋ አሸናን ታፐ አ ዶሶፐ፥ ታና ካልያዋ ጌተታናዉ ዳንዳየና።

²⁷ ኦንነ ባረ ማስቃልያ ቶኪደ፥ ታ ጌዱዋ ካለናን ዮፐ፥ ታና ካልያዋ ግዳናዉ ዳንዳየና።

²⁸ “ህንተንቱፐ እቱ ሹቻ ጎልያ ኬጻናዉ ኮዮፐ፥ ኪታ ዉርሳናዉ ግድያ ሻሉዋ ካሰቲደ ኡት ሄተናዌ ኦኔ?

²⁹ ሄዌ ዮፐ፥ ጎልያ ዶሚደ፥ ኪታ ዉርሳናዉ ዎልቃይ እጾፐ፥

³⁰ በኤዳዋንቱ ኡባይ፥ ‘ሀ ብታኒ ኬጻናዉ ዶሜዳ፤ ሽን ኪታ ዉርሳናዉ ዳንዳይቤና’ ጊደ ቅሊጪኖ።

³¹ “ዎይ ታሙ ሻአ ኦላንቻቱዋ ኦይቄዳ እት ካቲ፥ ሀራ ላታሙ ሻአ ኦላንቻቱዋ ኦይቄዳዋንቱና ኦለታናዉ ዳንዳዮፐነ ኮይሮና፥ ታን ጾናኔ ጾንክታሻ ጊደ ኡት ቆፐኔ?

³² ባረዉ ዳንዳየተናን ዮፐ፥ ኦላዉ ይያ የኮ ካቲ ሃኩዋን ደእሽን ኪቲደ ስገታናዉ ዎሴ።

³³ ስም ሀዋዳንካ ህንተንቱፐ ኦንነ ባረዉ ደእያዋ ኡባ አገናዌ፥ ታና ካልያዋ ግዳናዉ ዳንዳየና።

ጎኤና ማጽንያባ

³⁴ “ማጽኒ ሎአ፤ ሽን ሎቅሎቀናን ዮፐ፥ ላኤን አ ዎት ሎቅሎቅሳናዉ ዳንዳየቲ?

³⁵ ቢታዉካ ሎኤና፤ ቱኤያናዉካ ማደናዋ ግዶ ድራዉ፥ አሳይ አ ኦል አጌ። ስስያ ሀይይ ደእያዌ ሀዋ ስሶ” ያጌዳ።