Leemisuwaa 5 - ጌሻ ማጻፋ

ዎሹማፐ ሃካ

¹ ታ ናአዉ፥ ታ አዳ ኤራተ ሀይዛ፤ ነ ሀይ ታ አኬካኮ የጋ።

² ያቶፐ፥ አዱሳ ቆፋይ ነዉ ደአና፤ ነ ሃሳያይካ ነ ኤራተ ቆንጭሳና።

³ ዎሹምያ ማጫ ምሽራት እንጻርሳፐ ኤሳ እልሉ ጾኬ፤ እ ሃሳያይ ኦይሳፐካ አ ሹጌ።

⁴ ሽን እዛ ዉርሰን ጎዳረ ኡዳን ጫማዉ፤ ላኡ ባጋን ቃንጽያ ማሻዳን ቃንጽያኖ፤

⁵ እ ገደቱ ሀይቁዋኮ ዱገ ቢኖ፤ እ ሀመታይ ስት ኦደ፥ ዱፉዋ አፌ።

⁶ እዛ ደኡዋ ኦግያ ቆፑኩ፤ እ ኦገቱ ጌላ፤ ሽን ጌላ ግድያዋካ አ ኤሩኩ።

⁷ ታ ናቶ፥ ሀእካ ታን ኦድያዋ ስስተ፤ ታን ግያዋፐ ከሶፕተ።

⁸ ዎሹምያ ማጫ ምሽራት ሄራ ቦፕተ፤ እ ጎልያ ፐንግያኮ ሺቆፕተ።

⁹ ሄዌ ዮፐ፥ ህንተ ህንተንቱ ቦንቹዋ ሀራቶ አደ እማና። ህንተንቱ ህንተንቱ ያላጋተን መቀ ባይና አሳቱዋ ኩሽያን ሀይቃና።

¹⁰ ህንተንቱ ማጹዋ አላጋ አሳቱ አካና። ህንተ ዳቡሪደ ሺሼዳዌ ሀራ አሳዉ ግዳናዋ።

¹¹ ዉርሰን ህንተ አሹነ ህንተ አሳተይ ግልቂና፥ ህንተ ኦላና።

¹² ቃይ ሀዋዳን ያጋንታ፤ “ታን ትምርትያ አያዉ እጻድታሻ! ታ ዎዛናይካ ሴራ አያዉ ካዴሻ!

¹³ ታን ታና ታማርስያዋንቱ ኦዴዳዋ አካበይከ፤ ታና ዞርያዋንቱ ዞርያካ ሀይዛበይከ።

¹⁴ ሄዋ ድራዉ፥ ታን አሳይ ሺቄዳ ሺቁዋን፥ አኬከናን ካዉሻናዉ ደአይ” ያጋና።

¹⁵ ነ ማቻትዉ አማነቴዳዋ ግዳ፤ እዝ ጻላላ ሲቃ።

¹⁶ ሀራ ማጫንፐ የለቴዳ ነ ናናቱ፥ ነዉ ሎኦባ ኦክኖ።

¹⁷ ኡንቱንቱ ኔና ማዳናዉ ድጭኖ፤ አላጋ ግዶፕኖ።

¹⁸ ሄዋ ድራዉ ነ ማቻትና ናሸታ፤ ያላጋተን ኔን አኬዳ ነ ማቻትፐ ናሸቻ ኮያ።

¹⁹ ሎእያ ጋራትዳንነ ናሸችያ ገንአቲዳን፥ እ ንይ ኡባ ዎደካ ኔና አሎ፤ ኡባ ዎደ እ ሲቁ ኔና ኦሞዶ።

²⁰ ታ ናአዉ፥ ዎሹምያ ምሽራታ ኔና አያዉ ኦሞዳይ? ሀራ አሳ ማቻቶ አያዉ ቆማይ?

²¹ አያዉ ጎፐ፥ አሳይ ኦያዋ ኡባ መና ጎዳይ በኤ፤ እ ሀመትያ ሎሱዋ ኡባ ጼሌ።

²² ናጋራንቻ እ ኦዳ ናጋራይ ኦይቄ። አ ናጋራ ግቲ አ ቃቼ።

²³ እ ባረ ቦዛተን ሀሌዳ፤ ባረ ሁጲያ ናግቤና ድራዉ ሀይቄዳ።