Leemisuwaa 31 - ጌሻ ማጻፋ

ልሙኤላ ዳያ ባረ ናኣ ታማርሴዳ ትምትትያ

¹ ሀዋፐ ካሊደ ጻፈቴዳ ሃሳያይ፥ ካትያ ልሙኤላ አታ ካትያ ልሙኤላ ታማርሴዳዋ።

² “ላ ታ ናአዉ፥ ታ ኡሉዋፐ ዎዳዎ፥ ታን ሺቀታደ የሌዳዎ፥

³ ማጫ አሳን ነ ዎልቃ ዉርሶፓ፤ ሄ ካተቱዋ ባይዝያ ማጫ አሳቱዋን ነ አካታ ይሶፓ።

⁴ “ልሙኤላ፥ ሀዌ ካተቶ በሰና፤ ዎይንያ ኤሳ ኡሽያዌ ካተቶ በሰና፤ ማይያ ኡሻ ኡሽያዌ አሳ ቦላ ሱንቴዳዋንቶ በሰና።

⁵ ኡንቱንቱ ኡሽያ ዎደ ህግያ ባሊኖ፤ ናቀቴዳ አሳ ማታ ሸነኮ ጊኖ።

⁶ ማይያ ኡሻ ሀይቃና ሀንያ ኡራዉነ ሳአይ ኢቴዳ ኡራዉ እምተ።

⁷ ኡንቱንቱ ባረንቱ ማንቆተነ ባረንቱ ቱጋ ደኡዋ ዶጋና ማላ ኡሽኖ።

⁸ “ባረንቱ መቱዋ ኦዳናዉ ዳንዳየናዋንቱ ድራዉ ኔን ኦዳ፤ ማድያዌ ባይናዋንቱ ማታ ድራዉ ኔን ደንዳ።

⁹ ኡንቱንቶ ሱረ ፕርዳ ፕርዳ፤ ህዬሳቱዋነ መቶታንቻቱዋ ማታ ናጋ” ያጋደ ታማርሳዱ።

ዎዛናማ ማቻቶ

¹⁰ ዎዛናማ ማቻቶ ኦን ደማናዉ ዳንዳዪ? እንቁዋ ግያ አልኦ ሹቻፐካ እዛ አልአዉ።

¹¹ እ አስናይ እዞ ኡባባንካ አማኔ፤ አዉ ደአናዉ በስያዋፐ አያይነ ፓጨና።

¹² አ ባረ ደኡዋ ላይ ኡባን አዉ ሎኦባፐ አትና፥ ኢታባ ኦኩ።

¹³ ሱፍያነ ላይኑዋ አ ኮያደ፥ ናሸታደ ባረ ኩሽያን ኦዉ።

¹⁴ አ ዛልአንቻቱዋ ማርካባቱዋ ማላ፤ ባረ ቁማ ሃኮ ቢታፐ አያዉ።

¹⁵ አ ባረ ሶ አሳዉ ቁማ ካናዉነ ባረ ማጫ ቆማቶ ኦሱዋ ግሻናዉ፥ ሳአይ ብሮ ቃማ ደእሺና ደንዳዉ።

¹⁶ ጋድያ አ ኮያደ ሻማዉ፤ ባረ ኩሽያን ኦደ ደሜዳ ሻሉዋን ዎይንያ ቱራ ቶካዉ።

¹⁷ አ ጎባ ኦሳንቻ ግድያዋ ጻላላ ግደናን፥ ምኖነ ጭንጫ አሳ።

¹⁸ አ ባረ ዎያ ደማናዉ ምናደ ዛልአዉ፤ አ ኦደ ቃምስያ ድራዉ፥ ባረ ጾምፕያ ኤለ ቶይሱኩ።

¹⁹ አ ባረ ስንድሪታን ሱቃደ፥ ባረ አፍላ ዳዳዉ።

²⁰ አ ህዬሳቶነ መቶታንቻቶ ባረዋፐ ጮ እማዉ።

²¹ እ ሶ አሳይ ኡባይ ሆእያ ማዩዋ ማዬዳ ድራዉ፥ ሻቻይ ቡክንቶ፥ አ ህርጉኩ።

²² አርሳ ቦላን ሂጽያ ማዩዋ ስካዉ፤ ሊኑዋፐ ዳደቴዳ ኦቻ ቴራ ማላትያ ማዩዋካ ባረዉ ማያዉ።

²³ ጋድያ ጭማቱ ሺቅያ ዱቡሻን እ አስናይ ቦንቼቴዳ አሳ።

²⁴ ሊኑዋፐ ማዩዋነ ሳቂያ ኦ ኦደ፥ ዛልአንቻቶ ዛልአዉ።

²⁵ እዛ ምኖነ ቦንቾ አሳ፤ ይያ ላይቶ እዛ ኡባካ ህርጉኩ።

²⁶ አዳ ኤራን አ ሃሳያዉ፤ አማንያ ዞሪ እ እንጻርሳፐ ከሴ።

²⁷ አ ባረ ሶ አሳ ደኡዋ እንጀያናዉ ኡባ ገደ ኦሱዋ ኦደ ደአዉ፤ አዛላ ሀኑ እ ቦላን ቤት ኤረና።

²⁸ እዝ ናናቱ ደንድ ኤቂደ፥ እዞ ናሺኖ፤ እዝ አስናይካ እዞ ጋላቲደ፥

²⁹ “ሎኦባ ኦዳ ዳሮ ማጫ አሳቱ ደኢኖ፤ ሽን ኔን ኡንቱንቱ ኡባፐ አሳ” ያጌ።

³⁰ ማላ ሎኦተይ አላለ ከሰና፤ ፑልካ ያና፤ ሽን መና ጎዳዉ ያይያ ምሽራታ፥ እዛ ጋላተታናዉ በሳዉ።

³¹ አ ኦዳባዉ ኡባዉ እዉ እዝ ኩሽያ ዛርተ፤ እዛ ኦዳ ኦሱ ኡባይ ዳባባን እዞ ጋላትሶ።