Leemisuwaa 10 - ጌሻ ማጻፋሶሎሞና ሌምሳቱዋ ( 10:1—29:27 ) 1 ሀዋንቱ ሶሎሞና ሌምሳቱዋ። አዳ ኤራንቻ ናአይ ባረ አዉዋ ናሸቼ፤ ሽን ቦዛ ናአይ ባረ አቶ ካዮዬ። 2 ናጋራን ደሜዳ ሚሻይ ጎኤና፤ ሽን ጽሎተይ ሀይቁዋፐ አሼ። 3 መና ጎዳይ ጽሎቱዋ ኮሻይሰና፤ ሽን ናጋራንቻቱዋ አሙዋ ፖልሰና። 4 አዛላተይ ማንቂሴ፤ ሽን ምኒደ ኦያዌ ዱረዬ። 5 አዳ ኤራንቻ ኡራይ ካ ቦንያን ሺሼ፤ ሽን ካ ጫክያ ዎደ ገምእሽያ ኡራይ ካዉሼ። 6 ጽሎ አሳይ አንጀቴ፤ ሽን ናጋራንቻ ዶና ማካላይ ካሜ። 7 ጽሉዋ ሱንይ አንጁዋን ጼሰቲደ ደኤ፤ ሽን ናጋራንቻቱዋ ሱንይ ዶገቴ። 8 አዳ ኤራንቻቱ አዛዜዳዋ ኦኖ፤ ሽን ቦዛተን ጮ ዶናትያዋንቱ ባሻዉ ቢኖ። 9 ሱረ አሳይ ሳሮ ደኤ፤ ሽን ጌላ ኡራይ ባረ ባይዙዋን ኦይቀቴ። 10 አሳ ቦላ ስምእያ ኡራይ መቱዋ አዬ። ቦዛተን ጮ ዶናትያዋንቱ ባሻዉ ቢኖ። 11 ጽሉዋ ሃሳያይ ደኡዋ ፑልትያ፤ ሽን ናጋራንቻ ሃሳያይ ማካላተ ገን። 12 እጹ ፓሉምያ ደን፤ ሽን ሲቁ ባይዙዋ ኡባ ፓይደና። 13 ዎዛናማ አሳይ አዳ ኤራን ሃሳዬ፤ ሽን ቦዛ ኡራይ ጻምአን ሾጨቴ። 14 አዳ ኤራንቻቱ ኤራ ዳጋዪኖ፤ ሽን ቦዛ ሃሳያ ሃሳይያ ኡራይ ባረና ባይዜ። 15 ዱርያ ሚሻይ ድረቴዳ ካታማ ማላ፥ ባረ ጎዳ ናጌ፤ ሽን ህዬሳተይ ህዬሳ ይሴ። 16 ጽሎ ኡራ አ ሎኦ ኦሱ ደኦ ካለ፤ ሽን ኢታ ኡራ ዉርሰይ ሙሩዋ አሄ። 17 ሴርና ኤኖ ግያ ኡራይ ደኡዋ ኦግያን ሀመቴ፤ ሽን ሴርና እጽያ ኡራይ ባሌ። 18 እጺደ ባረ እጽያዋ ኤርሰና ኡራይ ዎርዳንቻ፤ ዝግርሳ ላልያ ኡራይካ ቦዛ። 19 ዳሮ ሃሳያ ግዶን ናጋራይ የና፤ ሽን ባረ ዶና ሺሽ አክያ ኡራይ አዳ ኤራንቻ። 20 ጽሉዋ እንጻርሳይ ትገቴዳ ጌሻ ብራ ማላ፤ ሽን ኢታ ኡራ ቆፋዉ ጋቲ ጉ። 21 ጽሎ ኡራ ሃሳያይ ዳሮ አሳ ጎኤ፤ ሽን ቦዛቱ ባረንቱ ዎዛና ፓጫን ሀይቂኖ። 22 መና ጎዳ አንጁ ዱረ ከሴ፤ እ ሄ ዱረተን መቱዋ ዋላከና። 23 ቦዛ ኡራዉ ኢታባ ኦያዌ ካሳ ማላ፤ ሽን ዎዛናማ ኡራይ አዳ ኤራተን ናሸቴ። 24 ኢታ ኡራይ ህርጌዳባይ አ ቦላ ጋካናዋ፤ ሽን ጽሉ አሞቴዳዌ እመታናዋ። 25 ጎቱ ደንዲደ አደ፥ ናጋራንቻቱ ፕተት ይኖ፤ ሽን ጽሎቱ መናዉ ምኒደ ደአና። 26 ጫላይ አቻ ዝልእስያዋዳንነ ጩዋይ አይፍያ ፖግያዋዳን፥ አዛላ ኡራ ኪትያዌ ይሎዬ። 27 መና ጎዳዉ ያይያዌ ላይ አዱሴ፤ ሽን ናጋራንቻ ኡራ ላይይ ቃሜ። 28 ጽሎ ኡራይ ስንና ናሸቻይ ያና ጊደ ናጌ፤ ሽን ኢታ ኡራይ ስንና ያና ጊደ ናግያዌ አያይነ ባዋ። 29 መና ጎዳ ኦጊ ጽሎቶ ባቃት አትያ ሳኣ፤ ሽን ኢታ ኦያዋንቶ ባሻ። 30 ጽሎቱ ደኢያሳፐ ሾደትክኖ፤ ሽን ኢታቱ ቢታ ቦላ ደእክኖ። 31 ጽሎ አሳይ አዳ ኤራተ ሃሳዬ፤ ሽን ጌላባ ሃሳይያ እንጻርሳይ ቃንጸታና። 32 ጽሎ አሳይ በስያ ሃሳያ ኤሬ፤ ሽን ኢታ አሳይ ጌላ ሃሳዬ። |
The Word for the World Ethiopia