Kessaa 6 - ጌሻ ማጻፋ

¹ ሄዋፐ ጉይያን መና ጎዳይ ሙሳ፥ “ታን ግብጼ ካትያ ኦናባ ኔን ሀእ በአና፤ ታ ዎልቃማ ኩሽያ ጋሱዋን እ ኡንቱንታ የዳናዋ፤ ታ ዎልቃማ ኩሽያ ጋሱዋን እ ኡንቱንታ ባረ ጋድያፐ ላጊደ ከሳና” ያጌዳ።

ሙሴ ጼሳ

² ጾሳይ ቃይካ ሙሳ፥ “ታን መና ጎዳ፤

³ ታን አብራሃመዉ፥ ይሳቃዉነ ያቆባዉ ኡባ ዳንዳይያ ጾሳ ግዳደ ቆንጫድ፤ ሽን ታን፥ መና ጎዳ ግያ ታ ሱንን፥ ታናተ ኡንቱንታ ኤርሳበይከ።

⁴ ቃይ ታን ኡንቱንቶ ኡንቱንቱ በተ ግዲደ ደኤዳ ካናነ ጋድያ እማናዉ ታ ቃላ ጫቁዋ ኡንቱንቱና ጫቀታድ።

⁵ ቃይካ ግብጼ አሳቱ አይለይያ እስራኤለቱዋ ኦልያ ታን ስሳደ፥ ታ ቃላ ጫቁዋ ሀሳያድ።

⁶ “ሄዋ ድራዉ፥ ኔን እስራኤላቱዋ፥ ‘ታን መና ጎዳ፤ ታን ህንተንታ ግብጼቱዋ ናቁዋፐ ከሳና፤ ታን ህንተንታ ኡንቱንቱ አይለተፐካ ላአ ከሳና፤ ቃይ ታን ታ ዎልቃማ ዎልቃን ግብጼቱዋ ቦላ ኢታ ፕርዳ አሃደ ህንተንታ ዎዛና።

⁷ ታን ህንተንታ ታ ሁጰ አሳዳን አካናነ ታን ህንተንቱ ጾሳ ግዳና። ሄ ዎደ ህንተንቱ ታን መና ጎዳ ህንተንቱ ጾሳ ህንተንታ ግብጼቱዋ አይለተፐ ከሴዳዋ ግድያዋ ኤራና።

⁸ ቃይ ታን አብራሃመዉ፥ ይሳቃዉነ ያቆባዉ እማናዉ ጫቄዳ ቢታዉ አሀና፤ ሄ ጋድያ ታን ህንተንቶ ጋደ ኦደ እማና፤ ታን መና ጎዳ ያጋ’ ” ያጌዳ።

⁹ ሙሴ ሀዋ እስራኤለቶ ኦዴዳ፤ ሽን ኡንቱንቱ አያናይ መኤዳ ጋሱዋንነ መቀ ባይና አይለተ ጋሱዋን አ ቃላ ስስበይክኖ።

¹⁰ ሄዋፐ ጉይያን መና ጎዳይ ሙሳ፥

¹¹ “ባደ ግብጼ ካትያ፥ ‘እስራኤለቱዋ ነ ጋድያፐ ከሳደ የዳ’ ያጋደ ኦዳ” ያጌዳ።

¹² ሽን ሙሴ መና ጎዳ፥ “ሀራይ አቶ እስራኤለቱ ታባ ስሰናን እጼድኖ ሽን ታን ዴዶትያ እንጻርሳን ሃሳይያዋ ካቲ ዎት ስሳኔ?” ያጌዳ።

¹³ መና ጎዳይ ሙሳነ አሮና፥ “ቢደ፥ ህንተንቱ እስራኤልያ አሳ ግብጼፐ ከሳና ማላ፥ ታን ህንተንታ የዴዳዋ እስራኤልያ አሳዉነ ግብጼ ካትያዉ ኦድተ” ያጊደ አዛዜዳ።

ሙሴነ አሮነ የለታ

¹⁴ ኡንቱንቱ ሶይ ሶይ ማይዛ አዎቱ ሀዋንታ። እስራኤልያዉ ባይራ ናኣ ሮቤላ አቱማ ናናይ፥ ሄኖካ፥ ፓሉ፥ ሄጽሮናነ ካርማ፤ ሀዋንቱ ሮቤላ ያራቱዋ።

¹⁵ ስሞና አቱማ ናናይ፥ ይሙኤላ፥ ያሚና፥ ኦሃዳ፥ ያኪና፥ ጾሃራነ ካናነ ጋደ ምሽራትፐ የለቴዳ ሻኡላ፤ ሀዋንቱ ስሞና ያራቱዋ።

¹⁶ ሌዊያ አቱማ ናናይ ባረንቱ የለታ ማራዳን ገርሾና፥ ቃሃታነ ማራራ። ሌዊ ጼታነ ሀታማነ ላፑን ላይ ደኤዳ።

¹⁷ ገርሾና አቱማ ናናይ ባረንቱ ያራን ያራን ሊብናነ ሽምአ ጌተቲኖ።

¹⁸ ቃሃተ አቱማ ናናይ አምራማ፥ ይጽሃራ፥ ከብሮናነ ኡዝኤላ። ቃሃተ ጼታነ ሀታማነ ሄዙ ላይ ደኤዳ።

¹⁹ ማራራ አቱማ ናናይ ማህላነ ሙሻ ግያዋንታ። ባረንቱ የለታ ማራን ሀዋፐ ቆሞና ጼገቴዳ ሌዊያ ያራቱ ሀዋንታ።

²⁰ አምራመ ባረ አዉዋ ምቻቶ ዮከቤዶ አኬዳ። እዛ አሮናነ ሙሳ አዉ የላዱ። አምራመ ጼታነ ሀታማነ ላፑን ላይ ደኤዳ።

²¹ ይጽሃራ አቱማ ናናይ፥ ቆራሀ፥ ነፌጋነ ዚክራ።

²² ኡዝኤላ አቱማ ናናይ፥ ምሻኤላ፥ ኤልጻፋናነ ሲትራ።

²³ አሮነ አምናዳባ ናቶ፥ ናኣሶና ምቻቶ ኤልሼቦ አኬዳ። ያትና እዛ አዉ ናዳባ፥ አቢሀ፥ ኤልኣዛራነ እታማራ ጌተትያ አቱማ ናና የላዱ።

²⁴ ቆረ አቱማ ናናይ፥ አሲራ፥ ኤልቃናነ አብያሳፋ፤ ሀዋንቱ ቆረ ያራቱዋ።

²⁵ አሮና ናአይ ኤልኣዛረ ፑትኤላ ናናቱዋፐ እትኖ አኬዳ፤ እዛ አዉ ፒንሃሳ የላዱ። ሀዋንቱ ባረንቱ ያራን ያራን ሌዋቱዋ ጎልያ ማይዛ አሳቱዋ።

²⁶ መና ጎዳይ፥ “ግብጼ ጋድያፐ እስራኤላቱዋ ኦላዉ ጊጎ ጩጉዋዳን ጩጉዋዳን ከስተ” ያጌዳዌ ሀ ሙሳነ አሮና።

²⁷ እስራኤላቱዋ ግብጼ ጋድያፐ ከስያዋ ግብጼ ካትያዉ ሃሳዬዳዋንቱ ኡንቱንታ። ሄዋንቱካ ሙሳነ አሮና።

²⁸ መና ጎዳይ ግብጼን ሙሴዉ ሃሳዬዳ ዎደ አ፥

²⁹ “ታን መና ጎዳ፤ ታን ነዉ ኦድያዋ ኡባ ኔን ግብጼ ካትያዉ ኦዳ” ያጌዳ።

³⁰ ሽን ሙሴ መና ጎዳ፥ “ታን ዴዶትያ እንጻርሳን ሃሳይያዋ ግድሽን፥ ካቲ ታን ኦድያዋ ዎት ስሳኔ?” ያጌዳ።