Kessaa 34 - ጌሻ ማጻፋ

ላኤንዋ መቴዳ ማሰቴዳ ሹቻቱዋ

¹ መና ጎዳይ ሙሳ ሀዋዳን ያጌዳ፤ “ኮይሮዋንታ ማላትያ ላኡ ሹቻቱዋ ማሳደ ጊግሳ፤ ያቶፐ ታን ሄ ማሰቴዳ ሹቻቱዋ ቦላ ካሰ ኔን መንዳ ሹቻቱዋ ቦላን ደእያ ቃላቱዋ ጻፋና።

² ዎንታ ዎንታ ፑደ ሲና ደርያ ከሳናዉ ጊጋ፤ ያታደ ታና ያን ደርያ ሁጲያን ኤቃ ናጋ።

³ ኔናና ኦንነ ከሶፖ፤ ዎይ ደርያ ቦላ ሀቃንካ ቤቶፖ፤ ሀራይ አቶ ዶርሳ ዉዲ ዎይ መህያ ዉዲካ ደርያ ስንን ሄመቶፖ” ያጌዳ።

⁴ ሄዋ ድራዉ፥ ሙሴ ኮይሮ ሹቻቱዋ ማላትያ ላኡ ሹቻቱዋ ማሲደ መና ጎዳይ አዛዜዳዋዳን፥ ሹቻቱዋ ባረ ኩሽያን ኦይቂደ፥ ዎንታ ጉራና ፑደ ሲና ደርያ ከሴዳ።

⁵ መና ጎዳይ ሻርያን ዱገ ዎደ፥ አናና ያን ኤቄዳ፤ “ታን መና ጎዳ” ያጊደ ባረ ሱን አዋዬዳ።

⁶ መና ጎዳይ ሙሴ ስንና ሀዋዳን ያጊደ አዋዪደ አዳ፤ “ታን መና ጎዳ፤ ታን መና ጎዳ፤ ቃረታይነ ማሮተይ ኩሜዳ ጾሳ፥ ዳንዳያንቻ፥ አገና ሲቁ ዳሬዳዋነ ዳሪ አማነትያዋ።

⁷ ታን ታ አገና ሲቁዋ ሻአቶ ናግያዋ፤ ኢታተ፥ ማካላነ ናጋራ አቶ ያግያዋ። ግዶፐካ፥ ባይዞዋ ሙረናን አገናዋ፤ አዎቱዋ ናጋራ ድራዉ ናናነ ናናቱዋ ናና፥ ሄዘን የለታነ ኦይደን የለታ ጋካናዉ ሙርያዋ” ያጊደ አዋዬዳ።

⁸ ሄዋፐ ጉየ ሙሴ ኤለካ ቢታን ጉፋኒደ ጎይኔዳ፤

⁹ “አቤት ጎዳዉ፥ ኔን ታናን ናሸቴዳዋ ግዶፐ፥ ኑናና እትፐ ደንዳ። ሀዌ አሳይ ሞርጊ ሌፋቴዳዋ ግዶፐነ፥ ኑ ኢታተነ ኑ ናጋራ አቶ ያጋደ፥ ኑና ነ አሳ ኦ” ያጌዳ።

ቃላ ጫቁ ኦራጼዳ

¹⁰ ያትና መና ጎዳይ ሀዋዳን ያጌዳ፤ “ታን ህንተናና ቃላ ጫቁዋ ገላድ፤ ሀዋፐ ካሰ ሳኣ ኡባን ደእያ ካዉተ ኡባን ሀን ኤረና ማላልስያባ ነ አሳ ኡባ ስንን ኦና፤ ታን መና ጎዳይ፥ ህንተንቶ ኦያ ኪታይ አይ ኬሻ ማላልስያበንቶ ኔን ኡንቱንቱ ግዶን ደእያ አሳይ ኡባይ በአና።

¹¹ ሀቼ ታን ህንተንታ አዛዝያ አዛዙዋ ናግተ፤ ህንተንቱ ስንፐ አሞረቱዋ፥ ካናነቱዋ፥ ሂተቱዋ፥ ፓርዘቱዋ፥ ሂዌቱዋነ ያቡሳቱዋ ታን የደርሳና።

¹² ኡንቱንቱ ህንተንቶ ጲረ ግደና ማላ፥ ህንተንቱ ብያ ጋድያን ደእያ አሳና ቃላ ጫቁዋ ገሎፕተ።

¹³ ኡንቱንቱ ያርሽያ ሳኣ ኮልተ፤ ኡንቱንቱ ጎይንያ ሹቻቱዋካ መንሬተ፤ ቃይ አሼሮ ጌተትያ ኡንቱንቱ ማጫ ጾሳት ካሻ ቃንጸሬ ኦልተ።

¹⁴ ታን መና ጎዳይ ቃናትያ ጾሳ ግድያ ድራዉ፥ ታፐ ሀራ ጾሳቶ ጎይኖፕተ።

¹⁵ “ሄ ጋድያን ደእያ አሳቱዋና አያ ቃላ ጫቁዋካ ገሎፕተ፤ አያዉ ጎፐ፥ ኡንቱንቱ ታናን አማነተናን እጺደ ባረንቱ ጾሳቱዋ ካልያ ዎደነ ኡንቱንቶ ያርሽያ ዎደ፥ ኡንቱንቱ ህንተናካ ሾባና፤ ህንተንቱ ኡንቱንቱ ያርሾቱዋ ማና።

¹⁶ ቃይ ህንተንቱ ኡንቱንቱ ማጫ ናናቱዋፐ ዶሪደ፥ ህንተንቱ አቱማ ናናቶ እማና፤ ሄ ዎደ ሄ ማጫ ናናይ ታናን አማነተናን እጺደ፥ ባረንቱ ጾሳቱዋ ካሊደ፥ ህንተንቱ አቱማ ናናካ ባረንቱዋዳን ኦስሳናዋንታ።

¹⁷ “ህንተንቶ ጎይንያ ጾሳቱዋ አያፐካ ሲልሲደ መፕተ።

¹⁸ “ማጋገ ኡክ ባላ ቦንችተ፤ ታን ህንተንታ አዛዜዳዋዳን፥ ላፑን ጋላሳዉ እርሹ ገለናን ኡከቴዳ ኡክ ሚተ፤ ሄዋካ ህንተንቱ ግብጼፐ ከሴዳ አቢባ አግናን ኦተ።

¹⁹ “አት ኡሉዋፐ ባይራ የለትያ አቱማ ናኣ ኡባይ ታዋ፤ ህንተንቱ መህያ ኡባፐ ቦራ ግድና፥ ዎይ ዶርሳ ግድና፥ ባይራይ ታዋ፤

²⁰ ኮይሮ የለቴዳ ሀርያ ማራ ዶርሳ ማራና ላማደ ዎዛ፤ ዎዛና ዮፐ፥ አ ቆያ መንደ ዎ። ነ ናናቱዋፐ ባይራ የለቴዳ አቱማ ናኣ ኡባ ዎዛ። “ኦንነ እምያዋ ኦይቀናን፥ መላ ኩሽያና ታ ስንን ቤቶፖ።

²¹ “ኡሱፑን ጋላሳ ኦተ፤ ሽን ላፑን ጋላሳን ሸምፕተ፤ ጎሽያ ዎድያን ቃይ ካ ጫክያ ዎድያን ላፑን ጋላሳን ሸምፕተ።

²² “ባይራ ዘረቴዳ ዛርጋ ህንተንቱ ጫክያ ዎደ፥ ሳምንታቱዋ ባላ ቦንችተ፤ ላይ ዉርሰ ካ ሺሽያ ዎደካ፥ ሺሹዋ ባላ ቦንችተ።

²³ ላይን ሄዙ ገደ እስራኤልያ አቱማ አሳይ ኡባይ ኡባ ሞድያ ጾሳ፥ እስራኤልያ መና ጎዳ ስንን ቤትኖ።

²⁴ ካዉተቱዋ ታን ህንተንቱ ስንፐ የደርሳደ ከሳና፤ ያታደ ህንተንቱ ዛዋ ታን አሳና። መና ጎዳ ህንተንቱ ጾሳ ስንን ህንተንቱ ላይን ሄዙ ገደ ቤታናዉ ፑደ ከስያ ዎደ፥ ኦንነ ህንተንቱ ጋድያ አሞተና።

²⁵ “ህንተንቱ ታዉ ሱ ያርሹዋ ያርሽያ ዎደ፥ እርሹዋ የጊደ ኡኬዳ ኡክና ያርሾፕተ። ፓስጋ ቦንችያ ጋላሳዉ ያርሼዳ ያርሹዋፐ ዎንትዉ አያይነ አቶፖ።

²⁶ “ህንተንቱ ጋደን ባይራ ካኤዳ ካፐ ኮይሮ ሙሩታ መና ጎዳ ህንተንቱ ጾሳ ጎልያ አህተ። “ዴሻ ማራ አ አት ማን ዶይሶፕተ” ያጌዳ።

²⁷ መና ጎዳይ ሙሳ፥ “ታን ኔናናነ እስራኤልያ አሳና ቃላ ጫቁዋ ገልያዌ ሀ ቃላቱ ግያ ማራና ግድያ ድራዉ፥ ሀ ቃላቱዋ ጻፋ” ያጌዳ።

²⁸ ሙሴ ቁማ ሜናንነ ሃ ኡሸናን፥ ኦይታሙ ጋላሳነ ኦይታሙ ቃማ መና ጎዳና ያን ጋምኤዳ፤ ቃላ ጫቁዋ ቃላቱዋ፥ ታሙ አዛዙዋ ማሰቴዳ ሹቻን ጻፌዳ።

ሙሴ ሶምእ ፖኤዳ

²⁹ ሙሴ ጾሳና ሃሳዪደ ጋምኤዳ ድራዉ፥ ሄ ላኡ ማርካተ ሹቻቱዋ እ ባረ ኩሽያን ኦይቂደ ሲና ደርያፐ ዱገ ዎዳ ዎደ፥ አ ሶምኢ ፖኤዳ፤ ሽን እ ሄዋ ኤርቤና።

³⁰ አሮነነ እስራኤልያ አሳይ ኡባይ ሙሳ ጼሊደ፥ አ ሶምኢ ጶልያዋ በኤድኖ፤ ኡንቱንቱ አኮ ሺቃናዉ ያዬድኖ።

³¹ ሽን ሙሴ ኡንቱንታ ጼስና አሮነነ ሽቁዋ ካለያ ካፓቱ ኡባይ አኮ ስሜድኖ፤ እ ኡንቱንታ ሃሳይሴዳ።

³² ሄዋፐ ጉይያን እስራኤልያ አሳይ ኡባይ አኮ ሺቅና መና ጎዳይ አዉ ሲና ደርያን እሜዳ አዛዙዋ ኡባ እ ኡንቱንቶ እሜዳ።

³³ ሙሴ ኡንቱንቶ ኦድያዋ ዉርሴዳ ዎደ፥ ባረ ዴሙዋ ናጻላን ካሜዳ።

³⁴ ሽን ሙሴ መና ጎዳ ስን አናና ሃሳያናዉ ገልያ ዎደ አዉደነ ከሳና ጋካናዉ፥ ናጻላ ባረ ሶምኡዋፐ ቃር ድጌ። ሄዋፐ ከሲደ፥ መና ጎዳይ አዛዜዳዋ እስራኤልያ አሳዉ ኦዴ።

³⁵ ኦድያ ዎደ፥ ኡንቱንቱ አ ሶምኢ ጶልያዋ በኤድኖ። ሄዋ ድራዉ፥ ሙሴ መና ጎዳና ሃሳያናዉ ባና ጋካናዉ፥ ባረ ዴሙዋ ዛረደካ ናጻላን ካሜ።