Kessaa 25 - ጌሻ ማጻፋ

ጌሻ ዱንካንያነ ጎይና ዎጋ ( 25:1—40:38 ) ጾሳ ዱንካንያ ቶካናዉ እመቴዳ እሞታ

¹ መና ጎዳይ ሙሴዉ ሀዋዳን ያጌዳ፤

² “ታዉ እምያዋ አሀናዳን ኔን እስራኤላቶ ኦዳ፤ ታዉ እማናዉ አ ዎዛናይ አ እማ እማ ግያ አሳ ኡባ እሞታ ኔን ታዉ አካ።

³ ህንተንቱ ኡንቱንቱፐ አካና እሞታይ ሀዋ: ዎርቃ፥ ብራ፥ ናሃስያ ብራታ፥

⁴ ሳሉዋ ማላትያ፥ ኦቻ ቴራ ማላትያነ፥ ዞኦ ሊቆ ቃጭና፥ ዴሻ እስክያ፥

⁵ ዶርሳ ኦርግያ ጋልባ ዞኦ ቃላምያን የግ ከሴዳዋ፥ ሀራ ጋልባ፥ ኦዶሩዋ፥

⁶ ጾምፕያዉ ዎጋራ ዛይትያ፥ ኦክያ ዛይትያነ እጻና ሳዌያ ቅማምያ፤

⁷ ቄሳቱዋ ካፑዋ ኤፉድያንነ ትራን ዎያዋን የግያ ማርግድያ ጌተትያ ሹቻቱዋነ ሀራ ጶልያ አልኦ ሹቻቱዋ አሆ።

⁸ “ያቲደ ታን ኡንቱንቱ ግዶን አቃናዳን፥ ኡንቱንቱ ታዉ ጌሻ ሳኣ ጊግስኖ።

⁹ ልከ ታን ኔና በሴዳ ሌምሱዋ ኡባዳን ጾሳ ዱንካንያነ አ ግዶን ደእያ ሚሻቱዋ ኦተ።

ቃላ ጫቁዋ ታቦታ

¹⁰ “ኡንቱንቱ ኦዶሩዋ ምፐ አዱሳተይ ላኡ ዋነ ባጋ፥ ጎምፓይ እት ዋነ ባጋ፥ ጌሳይ ቃይ እት ዋነ ባጋ ግዴዳ ታቦታ መኖ።

¹¹ ሶያነ ካርያ ዋላካይ ባይና ዎርቃን ሼሻ፤ አ ዩሹዋካ ዎርቃ ትገን ዩሻ አ።

¹² ሄ ታቦታዉ ኦይዱ ዎርቃ ሳጋየቱዋ ትጋደ ኦይዱ ገደቱዋን እት ባጋና ላኡ ሳጋየቱዋ፥ ቃይ የንኮ ባጋና ላኡ ሳጋየቱዋ አ።

¹³ ሄዋፐ ጉይያን ኦዶሩዋፐ ካሱዋ ከሳደ ዎርቃን ሼሻ።

¹⁴ ታቦታ ቶካናዉ፥ ታቦታ ምይያን ደእያ ሳጋየቱዋን ካሱዋ አ።

¹⁵ ቶክያ ካሶቱ ታቦታ ሳጋየቱዋ ግዶን ደእኖ፤ ኡንቱንቱ ሄዋፐ ኡባካ ከሶፕኖ።

¹⁶ ታቦታ ግዶን ታን ነዉ እምያ፥ ታሙ አዛዛቱ ጻፈት ኡቴዳ ላኡ ማሰቴዳ ማርካተ ሹቻቱዋ ዎ።

¹⁷ “ዋላካይ ባይና ዎርቃፐ ላኡ ዋነ ባጋ አዱቂያ፥ እት ዋነ ባጋ አክያ አቶ ግያ ሳኣ ቁምእያ መ።

¹⁸ ቁምእያዉ ዉርሰ ላኡ ባጋ ጋጻን ላኡ ክሩቤልያ፥ ቆጸቴዳ ዎርቃፐ መ።

¹⁹ እት ክሩብያ እት ባጋ ጋጻን፥ ላኤን ክሩብያ የንኮ ባጋ ጋጻን ላኡዋካ ቁምእያና ጋ ኦይደ መ።

²⁰ ክሩበቱ ባረንቱ ቀፍያ ደንደ፥ አቶ ግያ ሳኣ ቁምእያ ባረንቱ ቀፍያን ኩዋይ ዎኖ፤ ቃይ እቱ እቱዋኮ ስም ኡቲደ፥ ቁምእያ ጼልኖ።

²¹ ቁምእያ ታቦታዉ ቦላ ባጋን ዎ፤ ቃይ ታን ነዉ እምያ አዛዛቱ ጻፈቲደ ማሰቴዳ ሹቻቱዋ ታቦታ ግዶን ዎ።

²² ማርካተ ታቦታ ቦላ ቁምእያ ቦላ ደእያ ላኡ ክሩበቱዋፐ ግዱዋን ታን ኔናና ጋከታደ እስራኤልያ አሳዉ ታን እምያ አዛዙዋ ኡባ ያን ነዉ እማና።

ኡክ ዎያ ጻርጴዛ

²³ “ኦዶሩዋ ምፐ አዱሳተ ላኡ ዋ፥ ጎምፓይ እት ዋ፥ ጌሳይ ቃይ እት ዋነ ባጋ ግድያ እት ጻርጴዛ መ።

²⁴ ያታደ ዋላካይ ባይና ዎርቃን ሼሻ፤ ቃይ አ ዩሹዋን ዎርቃ ትገ ዩሻ አ።

²⁵ ሄዋዳንካ፥ ቃይ ጎምፓይ ታካ ግዴዳ ሻሽያ አ ቦላ ዩሻ አ። ያታደ አ ቦላ ዎርቃ ትገ ዩሻ።

²⁶ ሄ ጻርጴዛዉ ኦይዱ ዎርቃ ሳጋየቱዋ መደ፥ ጻርጴዛ ገደቱ ደእያ ኦይዱ ጋጻን ዎ።

²⁷ ጻርጴዛ ቶካናዉ ካሱዋ አያ ሳጋየቱ ጻርጴዛዉ ሻሽያ ጋጻን ሺቂደ ደእኖ።

²⁸ ሄ ቶክያ ካሱዋ ኦዶሩዋፐ ከሳደ፥ ዎርቃን ኡንቱንታ ሼሻ።

²⁹ ሄዋዳንካ፥ ቃይ ሻታቱዋነ ጭልፓቱዋ፥ ዱቂያባቱዋነ ጹአቱዋ ዋላካይ ባይና ዎርቃፐ መ።

³⁰ ታ ስን አያ ጌሻ ኡክይ ኡባ ዎደካ ጻርጴዛ ቦላ ዮፖ።

ጾምፕያ ዎያ ባላ

³¹ “ጾምፕያ ዎያ ባላ ቆጸቴዳ ዋላካይ ባይና ዎርቃፐ መ፤ ሄ ባላይ ኤቂያ ገዲካ፥ ቃይ ግዶ ቶማይካ ኡባይ ቆጸቴዳ ዎርቃፐ ኦሰታናዉ ኮሼ። አ ዋንጫቱ፥ አ ኩኩሞቱ አ ጪሻቱ ኡባይ አናና እትፐ ኦይቀት መታናዉ ኮሼ።

³² ምይያና ኡሱፑን ማራቱ አዉ ከሲኖ፤ ማራቱዋፐ ሄዛቱ እት ባጋና፥ ቃይ ሄዛቱ የንኮ ባጋና ደእኖ።

³³ ኡሱፑን ማራቶካ ሁጲያን ሁጲያን ሄዙ ሄዙ ኩኩሙነ ጪሻይ ደእያ ላዉዝያ ጪሻ ማላትያ ዋንጫይ ደኦ።

³⁴ ጾምፕያ ዎያ ባላዉ ግዶ ቶማይ፥ ኩኩሞቱዋ ጪሻቱ ደእያ ላዉዝያ ጪሻ ማላትያ ኦይዱ ዋንጫይ ደኦ።

³⁵ ላኡ ላኡ እትፐ ዋን ደእያ ሄዙ ማራቱዋፐ ጋርሳና እት እት ኩኩሙ ደኦ።

³⁶ ኩኩማቱነ ማራቱ ኡባይ ጾምፕያ ዎያ ባላና እትፐ፥ ኦይቀት እቱዋ ግዲደ፥ ዋላካይ ባይና ዎርቃፐ ቆጸቲደ መትኖ።

³⁷ “ሄዋፐ ጉይያን ጾምፕያ ዎያ ባላዉ ላፑን ጾምፐቱዋ ጊግሳደ፥ ኡንቱንቱ ስን ግዶዉ ፖአና ማላ ቁ ኦደ ዎ።

³⁸ ጾምፕያ ቶይስያ ቃጰቱዋነ ኡንቱንታ ዎያዋንታ ዋላካይ ባይና ዎርቃፐ መ።

³⁹ ጾምፕያ ዎያ ባላይነ አን ጎኤትያ ሚሻ ኡባይ ሀታማነ እቼሹ ኪሎ ግራመ ግዴዳ ዋላካይ ባይና ዎርቃፐ መቲኖ።

⁴⁰ አኬካ፤ ታን ኔና ደርያ ሁጲያን በሴዳዋዳን ኪተታ።