Iyyooba 7 - ጌሻ ማጻፋ

¹ “አሳ ደኡ ሳኣ ቦላን ዎልቃማ ባጸ ግደኔየ? አ ደኡዋ ላይይ ከራ ኦያ አሳ ደኡዋ ላይ ማላ ግደኔየ?

² ኩዋ አሞትያ ቆማዳን፥ ዎይ ባረ ድርጉዋ አካናዉ ናግያ ኦሳንቻዳን፥

³ ሄዋዳን ታዉ መላ አግናቱነ ቱጋ ቃማቱ እመቴድኖ።

⁴ ታን ግስያ ዎደ፥ ‘አዉደ ቤጎታንድታሻ?’ ያጋይ። ሽን ቃማይ ታዉ አዱቄ፤ ሳአይ ዎንታና ጋካናዉ ሂጻን አ አ ዎይ።

⁵ ታ ቦላይ ጉጹንያነ ፖቁዋ ማዬዳ፤ ታ ማዱፐ ጊሻይ ጎጌ።

⁶ ታ ላይይ ሸማይንያ ሙኩካፐካ አ ኤሌሌ፤ አይ ህዶታይነ ባይናን ታ ላይይ ዉሬ።

⁷ “አቤት ጾሳዉ፥ ታ ላይይ ሲያና ሸምፕያ እት ሸምፑዋ ማላ ግድያዋ ሀሳያ! ታ አይፊ ላኤን ኬካባ በኤናን አቴዳ።

⁸ ኔን ታና ሀእ በኣሳ፤ ሽን ላኤን በአካ፤ ኔን ታና ኮዮፐ፥ ታን ያድ።

⁹ “ሻሪ ፕስክ ጊደ ይያዋዳን፥ ዱፉዋ ዎዳ ኡራይ ስሚደ ከሰና።

¹⁰ ባረ ጎለካ ላኤን ስሚደ ዬና፤ አ ኤርያ አሳይካ አ ዶጌ።

¹¹ “ሄዋ ድራዉ፥ ታን ጮኡ ጊከ፤ ታን ታ ቱጋ ድራዉ ሃሳያና፤ ታ ደኡ ጫሜዳ ድራዉ ዙዙማና።

¹² ሀዋ ኬሻ ኔን ታና አያዉ ናጋይ? ታን ነዉ አባ ዎይ አባ ግዶ ሀምባዝያ ጋድየ?

¹³ ታን፥ ‘ታ ሂጻይ ታና ምንንዴ፤ ታ አልጋይካ ታና ዙዙንፐ ሸምፕሳንዴ!’ ያግያ ዎደ፥

¹⁴ ኔን ታና አኩሙዋን ያሽሳሳ፤ ሳጻንካ ታና ዳጋንሳ።

¹⁵ ታን ሀ ሳክያ ቦላና ደአናዋፐ ሱለትያዋነ ሀይቂያዋ ዶራይ።

¹⁶ ታን ታ ደኡዋ ካድ፤ ታን መናዉ ደአናዉ ኮይከ። ታ ላይይ ሲያና ሸምፕያ እት ሸምፑዋ ማላ ግድያ ድራዉ፥ ኔን ታና አጋ ባሻ።

¹⁷ “ኔን አ ዎጋባዳን ጼላናዉ አሳይ አዬ? ኔን አባዉ አያዉ ቦንቾ ሳኣ እማይ?

¹⁸ ዎንታ ዎንታ ኔን አ ብዳሳ፤ ቃይ ዎድያን ዎድያን አ ፓጫሳ።

¹⁹ ኔን ታኮ ጼልያዋ ሙለካ አግኪ? ዎይ ታን ታ ጩቻ ምትያ ዎድያካ ታዉ እምኪ?

²⁰ አቤት አሳ ዎችያዎ፥ ታን ናጋራ ኦዳዋ ግዶፐ፥ ኔና አያይ ቆሄዴ? ኔን አያዉ ታና ጫድ ካእያዋ ኦዲ? ነዉ ታን ዴጾ ቶኩዋ ግዳድታየ?

²¹ ታ ባላፐ አያዉ ታና ማረናን እጻይ? ታ ናጋራካ አያዉ አቶ ጌናን አጋይ? ስም ታን ዱፉዋ ዎያ ዎዲ ጋኬዳ፤ ኔን ታና ኮይያ ዎደካ፥ ታን ቤትከ” ያጌዳ።