Iyyooba 13 - ጌሻ ማጻፋ

¹ “ሀዋ ኡባ ታ አይፊ በኤዳ፤ ታ ሀይይካ ስሲደ አኬኬዳ።

² ህንተ ኤርያዋ ታንካ ኤራይ፤ ታን ህንተፐ ላፍከ።

³ ሽን ታን ኡባ ዳንዳይያ ጾሳዉ ሃሳያናዉ ኮያይ፤ ህንተናና ግደና። ታን ታ ሞቱዋ አናና ሞተታናዉ አሞታይ።

⁴ ህንተ ቱሙዋ ዎርዱዋን ካሚታ፤ ህንተ ኡባይካ ፓና አክማቱዋ።

⁵ ህንተ ኡባይ ጮኡ ጌዳ ግዴርክቴሻ! ያትንቶ፥ ህንተና አሳይ አዳ ኤራንቻ ጋና ሽን!

⁶ “ሀእ ታ ሞቱዋ ስስተ፤ ታ ዶናፐ ከስያ ፓሉምያ ሀይዝተ።

⁷ ህንተ ጾሳ ዶና ግዲደ፥ ዎርዱዋ ሃሳዪቴየ? አ ድራዉ ኤቂደ፥ ጭሙዋ ሃሳዪቴየ?

⁸ ህንተ አ ማድያዌ ደኢ? ዎይ አዉ አባካቶ ግዲደ ሞተቲቴ?

⁹ እ ህንተና ፕልግ ጼልንቶ፥ ህንተፐ ሎኦባ ደማኔ? ህንተ አሳ ጭምያዋዳን፥ አ ጭማናዉ ዳንዳዪቴየ?

¹⁰ ህንተ ጌማን አሳ ሶምኡዋ ጼሊደ ማዶፐ፥ ጾሳይ ቱሙ ህንተና ሴራና።

¹¹ አ ቦንቹ ህንተና ዳጋንኔ? አ አንጋይ ህንተና ያሸኔ?

¹² ህንተ ኦድያ ሌምሶቱ ብድን ማላ ፓናዋንታ፤ ህንተ ሺሽያ ፓሉሚ ኡርቃፐ መቴዳ ጎንዳልያ ማላ።

¹³ “አነ ጮኡ ጊተ! ሃሳያና፤ ሀዋፐ ጉይያን፥ ባረ ሀኖዋ ሀኖ።

¹⁴ ታን ታ ሁጲያ አያዉ ህርጋ ጋርሳን ዎይታ? ታ ሸምፑዋካ አያዉ ታ ኩሽያን ኦይቃይታ?

¹⁵ በእተ፥ ጾሳይ ታና ዎያዋ ግዶፐነ፥ ታን አ ዳንዳያን ናጋና። ግዶፐነ፥ ታን ታ ሞቱዋ አ ስን ሺሻና።

¹⁶ ናጋራንቻ አሳይ አ ስን ሺቃናዉ ዳንዳየና ድራዉ፤ ሀዌ ታን ሺቃናዉ ጻልያዌ፥ ኦን ኤሪ፥ ታ አቶተዉ ጋሶ ግዳናዉ ዳንዳዬ።

¹⁷ ታ ሃሳያ አኬኪደ ስስተ፤ ታን ኦድያዌ ህንተ ሀይን ገሎ።

¹⁸ በእተ፥ ታን ታ ሞቱዋ ጊግሳድ፤ ሻትማናዋካ ኤራይ።

¹⁹ “አቤት ጾሳዉ፥ ኔን ታና ሞታናዉ ያይ? ኔን ታና ባይዛንቻ ከሶፐ፥ ታን ጮኡ ጋደ ሀይቃና።

²⁰ ሽን ኔን ታዉ ሀ ላኡባቱዋ ኦ፤ ታን ኔፐ ጌምከ።

²¹ ታና ሙርያዋ አጋ፤ ነ አንጋን ታና ዳጋንፓ።

²² ሄዋፐ ጉይያን፥ ታና ጼሳ፤ ታን ኮያና። ዎይ ታን ሃሳይና፥ ታዉ ዛራደ ሃሳያ።

²³ ባረዉ፥ ታን ባይዜዳ ባይዙነ ናጋራይ አፑኔ? ታ ባላነ ታ ናጋራ አነ ታና በሳ።

²⁴ “ኔን አያዉ ነ ሶምኡዋ ታፐ ገንይ? ቃይ ታና አያዉ ነ ሞርክያዳን ፓይዳይ?

²⁵ ታና፥ ጫርኩ አፍያ ቦንጭያ ማላ፥ ያሽሳዪ? ዎይ መሌዳ ሱላ ማላ የደርሳይ?

²⁶ ኔን ታ ቦላ ጻፌዳ ሞቱ ጫማ፤ ሀራይ አትና፥ ታን ያላጋተን ደኣደ ኦዳ ባይዙዋነ አሻባካ።

²⁷ ኔን ታ ገድያ ገድያ ብራታን ቃቻዳ፤ ታ ታንግያ ታንጉዋ ኡባ ዎቻሳ፤ ታ ገድያ ኮትያ ፕልጋ ጼላሳ።

²⁸ ታን ዎቄዳባዳን ሀናይ፤ ብልአይ ሜዳ አፍላዳንካ ዎቃይ።