Isiyaasa 8 - ጌሻ ማጻፋ

አሶረ ካትያ ዩሳ

¹ መና ጎዳይ ታና ሀዋዳን ያጌዳ፤ “ዎልቃማ ጻ ዋራቃታ አካደ፥ ‘ኦሞዶ ኤሌላ! ቦንቂያዉ ኤሌላ!’ ያጋደ፥ ናባበትያ ፕዶልያን ጻፋ።

² ቄስያ ኦርዮናነ ይባራክያ ናኣ ዛካራሳ አማንያ ማርካቱዋ ኦደ ታን ሱንና” ያጌዳ።

³ ሄዋፐ ጉይያን፥ ታን ትምቢትያ ኦድያ ታ ማቻትና ግሳድ፤ ያትና፥ አ ሻሃራደ እት ናኣ የላዱ፤ መና ጎዳይ ታና ሀዋዳን ያጌዳ፤ “አ ሱን፥ ‘ማሀር-ሻላል-ሀሽ-ባዝ’ ያጋደ ሱን።

⁴ ናአይ፥ ‘ታ አዎ፥ ታ አቴ’ ያጊደ ጼስያዋ ኤራናፐ ካሰ፥ አሶረ ጋድያ ካቲ ዳማስቆ ዱረተነ ሳማርያ ኦሞዱዋ አኪደ አፋና” ያጌዳ።

⁵ መና ጎዳይ ቃይካ ታዉ ሀዋዳን ያጊደ ሃሳዬዳ፤

⁶ “ሀ አሳይ ሎዳን ጎግያ ሳልሆማ ሃቱዋ እጺደ፥ ራጺናነ ራማልያ ናኣ ናሸቲደ አኬድኖ።

⁷ ሄዋ ድራዉ፥ ታን ጎዳይ ምኖነ ዳሮ ግድያ ኤፍራጺሳ ሃ፥ አሶረ ካትያ አ ቶራንቻቱዋ ኡባና አሀና ሀናይ። እ ሻፍያ ኡባ ኩሚደ ከሳና፤ ጋጻ ኡባ ማዪደ ጎጋና።

⁸ ክጺደ ጎጊደ፥ ይሁዳ ገላና፤ ኤሊደ ያና አና፤ ኩን ቆያ ጋካና። አቤት አማኑኤላ፥ ካፉ ባረ ቀፍያ ምጭያዋዳን፥ ሃ ኩን ነ ጋድያ ኡባ ቦላን ምጨታና” ያጌዳ።

⁹ ህንተኖ ካዉተቶ፥ እትፐ ሺቅተ! ሽን ህንተ መኤረታና! ሃኮ ቢታ ኡባን ደእያ አሳቶ፥ ስስተ! ኦላዉ ጊግተ! ሽን ህንተ መኤረታና! ኤ፥ ኦላዉ ጊግተ፤ ሽን ህንተ መኤረታና!

¹⁰ ኦላ ኦለታናዉ ማቀትተ፤ ሽን ህንተ ማቁ ላለታና፤ ህንተ ሀልቹዋ ሃሳይተ፤ ሽን ህንተ ሀልቹዋ ሀላና፤ አያዉ ጎፐ፥ ጾሳይ ኑናና ደኤ።

ጾሳን አማነቱሳ

¹¹ መና ጎዳይ ባረ ምኖ ኩሽያ ታ ቦላ ዎደ፥ ታዉ ሃሳዬዳ፤ ታን ሀ አሳ ኦግያ ካለና ማላ፥ ታና ሀዋዳን ያጊደ ሴሬዳ፤

¹² “ሀ አሳይ ማካላ ማቆ ግያዋ ኡባ ማካላ ማቆ ጎፕተ፤ ኡንቱንቱ ያይያባዉ ያዮፕተ ዎይ ዳጋሞፕተ።

¹³ ህንተ ጌሻ ጋናዉ በስያዌ ኡባፐ ዎልቃማ መና ጎዳ፤ ህንተ አዉ ያያናዉነ ዳጋማናዉ በሰ።

¹⁴ እ ጌሻ ሳ ግዳናዋ፤ ሽን ይሁዳ ጋድያ አሳዉነ እስራኤልያ ጋድያ አሳዉ እ ቢያ ሹቻነ ኩንድስያ ዛላ ግዳናዋ፤ የሩሳላመን ደእያ አሳዉ እ ግትያነ ጲረ ግዳናዋ።

¹⁵ ኡንቱንቱፐ ዳሩ በታና፤ ኩንዲደካ መአና፤ ጲርያን ኦይቀቲደካ ኦሞደታና” ያጌዳ።

¹⁶ ታን ኦዴዳዋ ናጋ፤ ታ ኤርስያ ቆማቱ ግዶን ህግያ አታማ።

¹⁷ ታን ባረ ሶምኡዋ ያቆባ ዛራቱዋፐ ገንያ መና ጎዳ ናጋና፤ ቃይ አን አማነታና።

¹⁸ ታናነ ታዉ መና ጎዳይ እሜዳ ናናቱዋ በእተ። ኑን ጽዮነ ደርያን ደእያ ኡባፐ ዎልቃማ መና ጎዳፐ እስራኤልያዉ ማላታነ ማርካ።

¹⁹ “ሳሱኪደነ ዙዙሚደ ሃሳይያ ሻሬቾቱዋነ ሞይትልያ ሃሳይስያዋንታ ኦችተ” ያጊደ ህንተና ዞርያ አሳይ ደኤ። ሀይቄዳዋንታ ፓጻ ደእያዋንቱባ ኦችያዋፐ፥ አሳይ ባረንቱ ጾሳ ኦቻናዉ በሰኔ?

²⁰ ህግያነ ጾሳይ ኦድያዋ ስስተ! ሄ አሳቱ ሀ ቃላዳን ሃሳያና ዮፐ፥ ኡንቱንቶ ሳአይ ዎንተና።

²¹ አሳይ ዋየቲድነ ኮሻቲደ፥ ጋድያን ቶይላካታና፤ ኡንቱንቱ ኮሻቴዳ ዎደ ይሎቲደ፥ ፑደ ጼሊደ ባረንቱ ካትያነ ባረንቱ ጾሳ ሸቃና።

²² ሳኣኮ ዱገ ጼሊደ፥ ዋይያ፥ ማነ ያሽያ ሾኑዋ በአና፤ ኡንቱንቱ ባራ ማዉ ኦለታና።