Isiyaasa 54 - ጌሻ ማጻፋ

ጾሳይ እሜዳ ህዶታ ናግያዋ ግዱሳ ( ኢሳ. 54:1—55:13 ) ጾሳይ እስራኤልያ ሲቅያ ሲቁዋ

¹ መና ጎዳይ ሀዋዳን ያጌ፤ “ሀነ፥ የላቤና ማይናቴ፥ የጻ! ኔኖ፥ ኦይይ ኦይቂ ኤረናኔ፥ ነ ቃላ ቁ ኦደ እልላ! አያዉ ጎፐ፥ ባረ አስናና ደእያ ማጫን ናናቱዋፐ፥ ባረካ ደእያ ማጫን ናናይ ዳራና።

² ነ ዱንካንያ ሳኣ አሳ፤ ቃይ ኔን ደእያ ሳኣን ጋርዳቱዋካ ፕድ ኦደ ምጫ። ጉየ ጎፓ፤ ዎዶሩዋካ አዱሳ፤ ሽካልያካ ምንሳ።

³ ኔን ኡሸቻ ባጋናነ ሀድርሳ ባጋና አካና፤ ነ ዛራቱ ካዉተቱዋ ላታና፤ ኡንቱንቱ መላ ካታማቱዋን ኬጺደ ኡታና።

⁴ “ያዮፓ፤ አያዉ ጎፐ፥ ኔን ዬላታካ። ዳጋሞፓ፤ አያዉ ጎፐ፥ ኔን ካዉሻካ። ኔን ነ ያላጋተ ዬላ ዶጋና፤ ነ አምኤተ ቦርያካ ሀዋፐ ስንን ሀሳያካ።

⁵ አያዉ ጎፐ፥ ኔና መዳዌ ነዉ አስና፤ አዉ ሱንይካ ኡባፐ ዎልቃማ መና ጎዳ። እስራኤልያ ጌሻይ ኔና ዎዜዳዋ፤ እ ቢታ ኡባ ጾሳ ጌተቴ” ያጌ።

⁶ ነ ጾሳይ ሀዋዳን ያጌ፤ “አስናይ ኡባና አግ ባሽና፥ ዶገታደ ካዮትያ ማጫ ምሽራቲዳንነ ያላጋተን አስና ጎለፐ ከሴዳ ምሽራቲዳን ኔን ሀና ደእሽን፥ ታን መና ጎዳይ ኔና ዛራ ጼሳድ።

⁷ “እት ጉ ዎድያዉ ታን ኔና አጋድ፤ ሽን ዎልቃማ ማሮታን ኔና ታን ዛራ ሺሻና።

⁸ ሱልያ ሀንቁዋን፥ ታን ታ ዴሙዋ ኔፐ ጉ ዎድያዉ ገንድ፤ ሽን መና ሲቁዋን ታን ነዉ ቃረታና” ያጌ። መና ጎዳይ፥ ኔና ዎዝያዌ ሀዋ ኦዴ።

⁹ ነዉ ቃረትያ መና ጎዳይ ሀዋዳን ያጌ፤ “ሀዌ ታዉ ኖሄ ዎድያ ማላ። ሄ ዎደ ታን ኖሄ ዎዴ ባሻ ሃይ ላኤንዋ ሳኣ ምተናዳን ጫቃድ፤ ሄዋዳንካ፥ ኔና ላኤን ሀንቀተናንነ ሴረናን አጋናዉ ታን ጫቃድ።

¹⁰ ደረቱ ቃጻናዉ፥ ዞዘቱካ ባረንቱ ደኢያሳፐ ክቻናዉ ዳንዳዪኖ፤ ሽን ታ አገና ሲቁ ኔፐ ሻከተና፤ ታ ሳሮተ ጫቁካ ክቼና” ያጌ።

¹¹ ጾሳይ ሀዋዳን ያጌ፤ “ኔኖ፥ መቶቴዳ ካታማቴ! ጎቲ ያነ ሃነ ሾጬዳነ፥ ምንያብ ዬዳነ፥ በአ፥ ታን ኔና ቦንቾ ሹቻን አሌቂሳደ ኬጻና፤ ነ ባሱዋንካ ሳምፔርያ ግያ ሹቻ ሂጻና።

¹² ነ አዱሳ ሹቻ ግምቢያን ደእያ ጉምቡዋ ታን እንቁዋ ግያ ዳሮ አልኦ ዞኦ ሹቻን ግምባና፤ ነ ፐንግያ ጶልያ አልኦ እንቁዋን፥ ነ ድርሳ ኡባካ ቦንቾ ሹቻን ግምባና።

¹³ ነ አቱማ ናናቱዋ ኡባ መና ጎዳይ ታማርሳና፤ ነ ናናቱ ሳሮተይካ ዳራና።

¹⁴ ኔን ጽሎተን ምናደ ኤቃና፤ ሱገይነ ኡቁናይ ኔፐ ሃካና። ኔን አያዉካ ያያካ፤ ዳጋማይካ ኔኮ ሺቀና።

¹⁵ ኔና ኦላናዉ ደንድያዌ ደኦፐ፥ ሄዌ ታ ሸንያ ኦና፤ ታን ነ ባጋ ግድያ ድራዉ፥ ኔና ኦላናዉ ደንድያ ኡባይ ኩንዳና።

¹⁶ “በአ፥ ዎምፒናን ታማ ፑኒደ፥ ባረ ሀልቾ ሀንያ ኦላ ሚሻ ቆጽያ አሳቱዋ ታን መድ። ቃይ ባይዛናዳን፥ ባይዝያዋንታካ ታን መድ።

¹⁷ ኔና ቆሀናዉ ኦዳ አይ ሚሻይነ ኔና ቆሂደ ካን ከሰና። ኔና ሞትያ እንጻርሳ ኡባዉ ግድያ ዛሩዋ ኔን እማና። መና ጎዳ ቆማቱ ላታይ ሀዋ፤ ኡንቱንታ ታን ሻትንና” ያጌ። መና ጎዳይ ሄዋ ኦዴ።