Isiyaasa 46 - ጌሻ ማጻፋ

ባብሎና ኤቃቱዋ

¹ ቤላ ግያ ባብሎነ ኤቃይ ጎይኔ፤ ናባ ግያ ኤቃይካ ሆኬ። ካሰ ህንተ ቶክያ ኤቃቱ ሀእ ጫና መህያ ቦላን ጫነቲደ፥ ኡንቱንቶ ዴጾ ቶኩዋ ግዴድኖ።

² ጫና መሄቱ ዴጹዋፐ ደንዴዳዋን፥ ጫናና እትፐ ኩንዴድኖ፤ ኤቃቱ ባረና አሻናዉ ዳንዳየና ድራዉ፥ ባረንቱ ሁጲያዉካ ኦሞደቲደ ቤድኖ።

³ ጾሳይ ሀዋዳን ያጌ፤ “ህንተኖ፥ እስራኤልያፐ አቴዳዋንቶ፥ ያቆባ ዛረቶ፥ ታን ኦድያዋ ስስተ፤ ህንተ የለቴዳ ዎድያፐ ዶማደ ታን ህንተና ቶካድ።

⁴ ህንተ ጭማና ጋካናዉካ ታን ታናካ፤ ህንተ ፑሉማና ጋካናዉካ፥ ታን ህንተና ማዳና። ታን ህንተና መድ፤ ታን ህንተና ደንና፤ ታን ህንተና ቶካናነ አሻና።

⁵ “ታና ኦ ማላ ጊተ? ቃይ ኦናና ልኪቴ? ኑን እት ማላ ግዳናዳን፥ ታና ኦናና ጋ ጼሊቴ?

⁶ ዎርቃ ባረንቱ ቃርጪታፐ ቆልያዋንቱነ ብራ ሚዛናን ዎደ ልክያዋንቱ ሄዋ ኡንቱንቶ ጾሳ ኦደ መና ማላ፥ ዎርቃ ትግያዋ ቃጻሪኖ። እካ ጾሳ ኦደ መ፤ ያትና፥ ኡንቱንቱ ሄ ኤቃ ስንን ሆኪደ ጎይኒኖ።

⁷ ኡንቱንቱ አ ደንደ፥ ባረንቱ ሀሽያን ቶኪኖ፤ አ ሳኣን አ ዎኖ። ያቶፐ እ ሄዋን ኤቂ አጌ፤ ሄዋፐ ያ ሃ ቃጸና። እት አሳይ አዉ ዋሶፐካ፥ ዛሩዋ እመና፤ ቃይ አ መቱዋፐካ አ አሸና።

⁸ “ህንተኖ ናጋራንቻቶ፥ ሀዋ ሀሳይተነ ቆፕተ፤ ህንተ ዎዛናን ካሀን ዎተ።

⁹ በን ዎደ ሀኔዳ የዎቱዋ ሀሳይተ። አያዉ ጎፐ፥ ታን ጾሳ፤ ሀራይ ባዋ። ታን ጾሳ፤ ታ ማላይ ኦንነ ባዋ።

¹⁰ ‘ታ ቆፋይ ምናና፤ ቃይ ታንካ ታ ሀልቹዋ ኡባ ፖላና’ ያጋይ። ዉርሰን ትምቢትያ ዶመን፥ ቃይ ብሮ ሀንቤና የዎቱዋ በን ዎድያፐ ዶማደ አዋያይ።

¹¹ አዋይ ዶልያ ባጋፐ ቦንቂያ ካፉዋ፥ ሃኮ ጋድያፐ ታ ቆፋ ፖልያ አሳ ታን ጼሳደ፥ ታን ጌዳዋ ታን ፖላና፤ ታን ሀልቼዳዋካ ታን ኦና።

¹² “ህንተኖ ዎዛናይ ሙሜዳዋንቶ፥ ጽሎተፐካ ሃኬዳዋንቶ፥ ታን ኦድያዋ ስስተ፤

¹³ ታን ታ ጽሎተ ማታ አያይ፤ እካ ሀሳኮ ግደና። ታ አቶተይ ጋምኤና፤ ታን ታ አቶተ ጽዮንዉ፥ ታ ቦንቹዋካ እስራኤልያዉ እማና” ያጌ።