Hoose 6 - ጌሻ ማጻፋ

አሳይ ጾሳኮ ስሞዋ ማላትሴዳ

¹ እስራኤልያ አሳይ ሀዋዳን ያጌ፤ “ሃይተ! አነ መና ጎዳኮ ስሞይተ። እ ኑና መንሬዳ፥ ሽን እ ኑና ፓና፤ እ ኑና ማዱዳ፥ ሽን እ ኑ ማዱ ቃቻናዋ።

² ላኡ ጋላሳፐ ጉይያን፥ እ ኑና ፓና፤ ሄዘን ጋላስ ኑን አ ስንን ደአና ማላ፥ እ ኑና ደንና።

³ መና ጎዳ አነ ኤሮይተ፤ አ ኤራና ማላ፥ ምንሲደ አነ አ ካሎይተ። አዋይ ሞክያዌ ቱማ ግድያዋዳን፥ እካ ቱሙ ቤታና። ባሳ እራዳን፥ ቢታ አልያ ባልጉዋ እራዳን፥ እ ኑኮ ያና” ያጌ።

⁴ ጾሳይ ሀዋዳን ያጌ፤ “ኤፍሬማ አሳዉ፥ ታን ህንተና ዋቶሻ! ይሁዳ አሳዉ፥ ታን ህንተና ዋቶሻ! አያዉ ጎፐ፥ ህንተ ሲቁ ዎንታ ሻርያ ማላ፤ ኤለካ ይያ ጉራ ከተርሳ ማላ።

⁵ ሄዋ ድራዉ፥ ታን ትምቢትያ ኦድያዋንቱ ባጋና ህንተና ቃንጸሬድ፤ ታ ዶናፐ ከሴዳ ቃላን ታን ህንተና ዎድ። ታ ፕርዳይካ ህንተ ቦላ ዋልቃንዳን ዋልቃማና።

⁶ አያዉ ጎፐ፥ ታን አገና ሲቁዋ ኮያይፐ አትና፥ ያርሹዋ ኮይከ፤ ጾሳ ኤርያዋ ኮያይፐ አትና፥ ጹግያ ያርሹዋ ኮይከ።

⁷ “ሽን ኡንቱንቱ አዳመዋዳን፥ ጫቁዋ ኮሌድኖ፤ ያን ታዉ አማነተናን እጼድኖ።

⁸ ጋላኣደ ካታማይ ኢታ ኦሱዋ ኦያ አሳቱ ደእያ ካታማ፤ ሄ ካታማይ አሳ ሱን ባይ ኡቴዳ።

⁹ ፓንጋቱ አሳ ዎናዉ ቆሰት ኡቲደ ናግያዋዳን፥ ቄሳቱ ዋ ጭታይካ ሄዋዳን ናጌ፤ ሰኬማ ካታማ አፍያ ኦግያን አሳ ዎ። ኤ፥ ኡንቱንቱ ዬላይያ ኮባባ ኦኖ።

¹⁰ ታን እስራኤልያ አሳን ዳጋንያባ በኣድ። ኤፍሬማ ግዶን ሻርሙጻተይ ደኤ፤ እስራኤልካ ቱኔዳ።

¹¹ “ይሁዳ ቢታ አሳቶ፥ ህንተናካ ሙራና ጋላሳ ታን ኬራ ዎድ።