Hizik'k'eela 8 - ጌሻ ማጻፋ

ጌሻ ጎልያን ኤቃ ጎይና

¹ ኑን ኦሞደቴዳ ኡሱፑን ላይን፥ ኡሱፑን አግናን፥ እቼሻን ጋላሳን፥ ታን ታ ሶን ኡት ደእሽን፥ ይሁዳ ጭማቱካ ታ ስንን ኡት ደእሽን፥ ኡባ ሞድያ መና ጎዳ ዎልቃይ ታና ሞዴዳ።

² ታን ትሽ ኡዳደ ጼልያ ዎደ፥ አሳ ማላትያዋ በኣድ፤ አዉ ጼሳፐ ጋርሳ ባጋ ማላትያ ሳአይ ታማ ማላቴ፤ ቃይ ጼሳፐ ቦላ ባጋ ማላትያ ሳአይ ጶልያ ናስያ ብራታ ማላቴ።

³ እ ኩሽያ ማላትያዋ ታኮ የዲደ፥ ታ ሁጲያ ብናና ኦይቄዳ። አያናይ ታና ሳኣፐነ ሳሉዋፐ ግዶ ፑደ ደንደ፥ ጾሳ ሳጻን ታና የሩሳላመ አፌዳ። ሁጲሳ ባጋና ጌሻ ጎልያ ግዶ ዳባባ ገልያ ፐንግያና ገልሲደ፥ ጾሳ ቃናትያ ደንያ ኤቃይ ኤቄዳዋ በሴዳ።

⁴ ካሰ ታን ካባራ ሻፋ ማታን ሳጻን በኤዳዋዳን፥ እስራኤልያ ጾሳ ቦንቹዋ ሄዋን በኣድ።

⁵ ሄዋን እ ታዉ ሀዋዳን ያጌዳ፤ “ኔኖ አሳ ናአዉ፥ ሁጲሳ ባጋ ጼላ” ያጌዳ። ታን ጼልያ ዎደ፥ ጾሳ ቃናትያ ደንያ ኤቃ ምስልያ ስንን ደእያ ያርሽያ ሳ ማታን ደእያዋ በኣድ።

⁶ ቃይካ እ ታዉ ሀዋዳን ያጌዳ፤ “ኔኖ አሳ ናአዉ፥ ኡንቱንቱ ኦያዋ በአይ? ታና ታ ጌሻ ጎልያፐ ሃሳናዉ እስራኤልያ አሳይ ኦያ ዎልቃማ እጸትያ ኤቃ ጎይኑዋባ በአይ? ሄዋፐካ አያ ኢትያ ኤቃ ጾሳቱዋ ጎይና ኔን ብሮ በአና” ያጌዳ።

⁷ ሄዋፐ ጉይያን፥ ታና ጌሻ ጎልያ ዳባባ ፐንገ አሄዳ፤ ሄኮ ታን ጼልያ ዎደ፥ ጎዳን ጾኢ ደእያዋ በኣድ።

⁸ እ ታና፥ “ላ አሳ ናአዉ፥ ጎዳ ቦካ” ያጌዳ፤ ታን ቦክያ ዎደ፥ እት ፐንጊ ሄዋን ደእያዋ በኣድ።

⁹ ቃይ እ ታና፥ “ገላ፤ ኡንቱንቱ ሀዋን ኦያ ኢታነ ሸነይያ ኤቃ ጾሳቱዋ ጎይኑዋ በአ” ያጌዳ።

¹⁰ ታን ግዶ ገላደ ጼልያ ዎደ፥ ጎዳ ቦላን ዩይ አደ ቢታና ጎሸትያ መታቱ ምስሊ፥ ጌሻ ግደና ዶአቱዋ ምስሊ ኡባይነ እስራኤልያ አሳ ኤቃቱዋ ኡባ ምስሊ ኩሜዳዋ በኣድ።

¹¹ ኡንቱንቱፐ ስን ባጋና እስራኤልያ አሳፐ ላፑን ታሙ ጭማቱ ኤቄድኖ፤ ቃይ ሻፋና ናኣ ያዛኒካ ኡንቱንቱ ግዶን ኤቄዳ። ኡባይካ እጻና ጩዋይያዋ ባረንቱ ኩሽያን ኦይቄድኖ፤ እጻና ጩዋይካ ቱሉ ጌ።

¹² ቃይ እ ታና ሀዋዳን ያጌዳ፤ “ላ አሳ ናአዉ፥ ሀዋ እስራኤልያ አሳ ጭማቱ ኡባይካ ማን ባረንቱ ኤቃ ምስልያ ጎልያን ኡንቱንቱ ኦያዋ በአይ? አያዉ ጎፐ፥ ኡንቱንቱ፥ መና ጎዳይ ኑና በኤና፤ መና ጎዳይ ሀ ቢታ አጌዳ ያጊኖ” ያጌዳ።

¹³ ቃይካ እ ታና፥ “ሄዋፐካ አያ እጸቴዳ ኤቃ ጎይኑዋ ኔን ብሮ በአና” ያጌዳ።

¹⁴ ሄዋፐ ጉይያን፥ እ ታና ጌሻ ጎልያ ሁጲሳ ባጋ ፐንግያኮ አፍና፥ ሄዋን ታሙዛ ግያ ባረንቱ ጾሳዉ ኡቲደ ዬክያ ማጫ አሳቱዋ በኣድ።

¹⁵ እ ታና፥ “ኔኖ አሳ ናአዉ፥ ሀዋ በአይ? ሄዋፐ አያ እጸቴዳ ኤቃ ጎይና ኔን ብሮ በአና” ያጌዳ።

¹⁶ ሄዋፐ ጉይያን፥ እ ታና መና ጎዳ ጎልያ ግዶ ዳባባ አፌዳ፤ ሄዋን ጌሻ ጎልያ ፐንገን ባራንዳፐነ ያርሽያ ሳፐ ግዱዋን ላታማነ እቼሹ አቱማ አሳ ግድያዋ በኣድ። ኡንቱንቱ ባረንቱ ዞክያ መና ጎዳ ጌሻ ጎልያኮ፥ ባረንቱ ሶምኡዋ አዋይ ዶልያ ባጋ ዛሪደ፥ አዋይ ዶልያ ባጋና አዋዉ ጎይኒኖ።

¹⁷ እ ታና ሀዋዳን ያጌዳ፤ “ኔኖ አሳ ናአዉ፥ ሀዋ በኣድ? ይሁዳ አሳዉ ሀ እጸቴዳ ኤቃ ጎይኑዋ ሀዋን ኦያዌ ኡባይ ላፋባ ግዴዴ? ኡንቱንቱ ቢታ ማካላ ኦሱዋን ኩንደ፥ ዛር ዛሪደ ታና ሀንቀትሳናዉ በሲ? በአ፥ ኡንቱንቱ ባረንቱ ዳንዳዬዳ ኬናን ታና ኢሲደ ጫሺኖ።

¹⁸ ሄዋ ድራዉ፥ ታን ኡንቱንቱና ሀንቁዋን ጋከታና። ታን ኡንቱንቶ ቃረትከነ ኡንቱንቱፐ እቱዋነ አሽከ። ኡንቱንቱ ባረንቱ ኮሻ ቁ ኦደ፥ ታ ሀይን ዋስናካ፥ ታን ኡንቱንቶ ስስከ” ያጌዳ።