Hizik'k'eela 5 - ጌሻ ማጻፋ

የሩሳላመ ቦላ ይያ ባሻ ማላታ

¹ “ኔኖ አሳ ናአዉ፥ ቃራ ማሻ አካደ፥ ነ ሁጲያነ ነ ቡቻ ሁጲያ ጊግስያዋንቱ ምላጭያዳን አን ሜዳ። ያታደ ሚዛናን ልካደ፥ ነ ብናና ሄዙ ከሳደ ሻካ።

² ኔን ዶድያ ዎዲ ዉርያ ዎደ፥ ነ ሻኬዳ ብናናዉ እት ኩሽያ የሩሳላመ ካታማ ምስልያዉ ግዱዋን ታማን ጹጋ። ላኤን ኩሽያ ካታማ ዩሹዋን ኡባን ማሻን ቃንጸሬ። ሄዘን ኩሽያ ቃይ ጫርኮ ላላ፤ አያዉ ጎፐ፥ ታን ኡንቱንታ ማሻን የደርሳና።

³ ቃይ ሄዋፐ ጉ ብናና አካደ፥ ነ ማዩዋ ጼራን ቃቻ።

⁴ ሄ ኔን ቃቼዳዋፐ ጉ አካደ፥ ታማን ኦላደ ጹጋ። ሄዋን ዶሜዳ ታማይ እስራኤልያ አሳ ኡባ ጋካናዋ” ያጌዳ።

⁵ ኡባ ሞድያ መና ጎዳይ ሀዋዳን ያጌ፤ “ሀዌ የሩሳላመ ካታማ፤ ታን ቢታቱዋ እዝ ዩሹዋን ዎደ፥ ካዉተቱዋ ኡባዉ ግዶ ጉልአን እዞ ዎድ።

⁶ ሽን እዛ ባረ ኢታ ኦሱዋን፥ ባረ ዩሹዋን ደእያ ቢታቱዋፐነ ካዉተቱዋፐ ያ ኢታደ፥ ታ ህግያነ ታ ዎጋ ናገናን እጻዱ፤ ቱሙካ እዛ ታ ህግያዉ ማካላዱ፤ ታ ዎጋካ ካለናን እጻዱ” ያጌ።

⁷ ሄዋ ድራዉ፥ ኡባ ሞድያ መና ጎዳይ ሀዋዳን ያጌ፤ “ህንተንቱ ህንተ ዩሹዋ ካዉተፐ አደ መቱዋ መድታ፤ ታ አዛዙዋ ካለናንነ ታ ዎጋ ናገናን እጼድታ። ሀራይ አቶ ሽን ህንተንቱ ዩሹዋን ደእያ ካዉተቱዋ ዎጋካ ናግበይክታ” ያጌ።

⁸ ሄዋ ድራዉ፥ ኡባ ሞድያ መና ጎዳይ ሀዋዳን ያጌ፤ “ኔኖ፥ የሩሳላመ፥ ታን ነዉ ሞርከ፤ ሀራ ካዉተቱ ኡባይ በእሽና፥ ነ ቦላ ታ ፕርዳ አሀና።

⁹ ኔን ታን እጽያ ኤቃ ጎይና ኡባ ኦዳ ድራዉ፥ ታን ሀዋፐ ካሰ ሀንቤናዋ፥ ቃይ ሀዋፐ ስንዉካ ሀነና ፕርዳ ነ ቦላ አሀና።

¹⁰ ሄዋፐ ደንዴዳዋን፥ ህንተ ግዶን አዎቱ ባረንቱ ናናቱዋ ማና፤ ቃይ ናናቱካ ባረንቱ አዎቱዋ ማና። ታን ህንተ ቦላ ፕርዳ አሀና፤ ህንተፐ አቴዳዋንታካ ኦይዱ ጫርኩዋ ሚዛና ኡባዉ ላላና።

¹¹ “ሄዋ ድራዉ፥ ታን ኡባ ሞድያ መና ጎዳይ ታ ደኡዋን ጫቃይ: ህንተ ህንተ ሸነይያ ኤቃቱዋንነ ቱና ኦሶቱዋን ታ ጌሻ ጎልያ ቱንሴዳ ድራዉ፥ ታንካ ህንተና ቡ ይሳና። ህንተዉ ቃረትከነ ህንተፐ እቱዋነ አሽከ።

¹² ነ አሳፐ እት ኩሺ ካታማ ግዶን ኢታ ሀርግያን ዎይ ኮሻን ሀይቃና፤ ላኤን ኩሺ ካታማፐ ካረና ኦላን ዉራና፤ ቃይ ሄዘን ኩሽያ ታን ኦይዱ ጫርኩዋ ሚዛናዉ ኡባዉ ላላደ፥ ኡንቱንታ ማሻን የደርሳና።

¹³ “ታ ይሉ ዉራና፤ ታን ኡንቱንቱ ቦላ ሀንቀቴዳ ሀንቁካ ኤቃና፤ ያቶፐ ታ ሀንቁ ዶቻና። ታን ኡንቱንቱ ቦላን ሀንቀቴዳ ሀንቁዋ ዉርስያ ዎደ፥ ታን መና ጎዳይ ቃናትያን ሃሳዬዳዋ ኡንቱንቱ ኤራና።

¹⁴ “ህንተንቱ ዩሹዋን ደእያ ካዉተቱዋ ግዶንነ ህንተ ማታና አያ ኡባ ስንን ታን ህንተና ባዙዋነ ቅሊጭያዋ ኦና።

¹⁵ ታን ህንተና ታ ሀንቁዋን፥ ታ ይሉዋንነ ቃረታይ ባይና ሴራን ፕርድያ ዎደ፥ ህንተ ህንተ ዩሹዋን ደእያ ካዉተቶ ቅሊጮነ ሸቃዉ፥ ህንተና በኤዳ አሳዉ ናገትያባነ ዳጋምያባ ግዳና። ታን መና ጎዳይ ሀዋ ኦዳድ።

¹⁶ ታን ህንተ ቦላ ዎያነ ይስያ ኮሻ ዎንዳፍያ ዱክያ ዎደ፥ ህንተና ይሳናዉ ዱካና። ህንተዉ ኮሻ ያ ያ ዳርሳና፤ የሩሳላመ ካታማ ካይ ገለናዳን፥ ታን ድጋና።

¹⁷ ታን ኮሻነ ባዞ ዶኣ ህንተ ቦላ የድና፥ ኡንቱንቱ ህንተ ናናቱዋ ይሳና። ታን ኢታ ሀርግያ፥ ሱ ጉስያዋነ ኦላ ህንተ ቦላ አሀና። መና ጎዳይ ሀዋ ኦዳድ” ያጌ።